புதுப் புதுத் திட்டங்கள் - நகைச்சுவை

by **சிவா** Mon Jun 20, 2011 1:33 am

சமுக நலத்திட்டங்களைச் சர்க்கார் வெளியிடுமுன் 'வீட்டு நலத்திட்டங்கள்' என்பதை வெளியிட்டிருக்கவேண்டும். சர்க்கார் செய்யாத காரியத்தை நாம்தான் செய்வோம் என்ற எண்ணத்தில் ஒரு வீட்டுத் திட்டத் தயாரிப்பாளர் சில திட்டங்கள் தருகிறார்:

1. நீர்ப்பாசன வசதி : (அ) குழாய் நீரைப் பிடித்து வைத்துக் கொள்ள ஒரு சிமெண்டுத் தொட்டி அமைத்தல். (ஆ) மேற்படி பிடித்த நீரை நம் வீட்டு வானரங்கள் பிடுங்கி, விடாமலிருக்கப் பலமான கட்டையாகப் பார்த்துச் செருகுதல். (நம்மாலும் கட்டையைப் பிடுங்க இயலாமல் நீர் பாசி பிடித்தாலும் பரவாயில்லை.)

2. மின் சக்தி : மீட்டரிலுள்ள கோளாறைக் கவனிப்பதற்கான நடவடிக்கை எடுத்துக் கொள்ளுதல். கூடக் குடியிருப்பவர் லைட்டைப் போட்டால் நாம் பாய்ந்து சென்று அணைக்கும் 'அணைப்பு நடிவடிக்கை' எடுத்தல்.

3. உணவு உற்பத்தி : பக்கத்து வீட்டு அவரைக்கொடி நம் வீட்டுக்கு வரும் வகையில் அதனைக் கவர்வது; நீளமான மூங்கில்களையோ விறகுக் குச்சிகளையோ சுவரில் சாய்த்துக் கொடியின் போக்கை நம் வீட்டுப் பக்கம் திருப்புதல்.

4. ரசாயன உரங்கள் : வடிகட்டின காப்பித் தூளையும் சாம்பலையும் வென்னீரில் நன்றாகக் கரைத்து; நமக்குப் பிடிக்காத கீரைச் செடிகள் மீது ஊற்றினால் செடிகள் பட்டென்று உடனே மடிகின்றன; வெறும் சாம்பல் பல்லை விலக்குவதற்கு (!) ஒரு நல்ல பொருளாகப் பயன்படும்.

5. கைத்தொழில் அபிவிருத்தி : மேஜை விரிப்புகளுக்கும் தலையணை உறைகளுக்கும் மனைவியைப் பூவேலை செய்யச் சொல்லுதல். சமையலுக்கு, சமைக்கத் தெரிந்த ஆளாக ஒருவரைச் சம்பளத்துக்கு அமர்த்தல்.

6. கால்நடை அபிவிருத்தி : கைவசம் ஏதேனும் சைக்கிள் இருந்தால். ஏமாந்தவர் யாரையாவது தேடி அதை விற்பது. சகல காரியங்களுக்கும் நடந்தே செல்வது.

7. கல்வி மற்றும் பொருளாதாரம் : பல வாசகசாலைகளுக்குச் சந்தா கட்டுவது விதவிதமான நாவல்களையும் கதைகளையும் படிப்பது. மனத்துக்குப் பிடித்த ஒரு கதையை இங்கே கொஞ்சம் அங்கே கொஞ்சம் பெயர் மாற்றி, ஏதாவது ஒரு பத்திரிகைக்கு எழுதி அனுப்புதல்.

8. மாதர்கள் நலன் : அடிக்கடி சினிமாவுக்குச் செல்வதால் கண்கள் கெட்டுப்போகுமென்று சொல்லி அவர்களைத் தடுத்தல்; 'சுத்தமான காற்றை சுவாசிப்பதிலுள்ள ஆனந்தம் வேறெந்தப் பொழுதுபோக்கில் இருக்கிறது என்று கூறி அவர்களைத் தினசரி ஒரு மைல் நடக்க வைப்பது.

9. சுகாதாரம் : குளிக்குமிடத்திலுள்ள சிறு பள்ளங்களில் நீர் தேங்கினால் கொசு அபிவிருத்தி அடையலாம். அதற்காகக் கூடுமானவரை குளிக்காமலிப்பது.

10. குறைந்த வருமானக்காரர்களுக்கு வீடுகள் : அதாவது குழந்தைகளுக்கான வீடுகள். ஒரு ஞாயிறு தினம் உட்கார்ந்து நாமே கட்டித்தர வேண்டியதுதான் : வேலைப்பாட்டின் கோரத்தைப் பார்த்துக் குழந்தைகள் அக்கணமே வீட்டுப் பிரசினையை மறந்து விடுவார்கள்.

11. சேமிப்புத் திட்டம் : காரியாலய மேஜைக்குள்ளேயே ஓர் ஒதுப்புறத்தில், சம்பளம் வாங்கியதும் சேமிக்க உத்தேசித்துள்ள ரூபாய்களைப் போட்டு வைப்பது. அதை நாமே கண்டு பிடிக்க முடியாதபடி, மேஜைக்குள் பல காகிதப் குப்பைகளை திணிப்பது. அல்லது மேஜையைப் பூட்டி சாவியை எங்காவது கெட்டுப் போக்கி விடுவது.

பாக்கியம் ராமசாமி