பண்பாடு

by **சிவா** Sun Jun 12, 2011 8:20 pm

நகரத்தில் ஒரு பெரிய பல்பொருள் அங்காடி இருந்தது. ஒரு அம்மாவும், அவர்களின் நான்கு வயது மகளும் அந்த அங்காடிக்குச் சென்றார்கள். அங்கு இருந்த ஒரு சின்னஞ் சிறிய கரடி பொம்மையை எடுத்தாள் சிறுமி. அதைத் தனக்கு வாங்கித் தரும்படி அம்மாவிடம் கேட்டாள்.

""அதைப் பிறகு வரும்போது வாங்கிக் கொள்ளலாம். இப்போது எடுத்த இடத்திலேயே அதை வைத்துவிடு'' என்று அம்மா சொன்னார்கள். வேறு வழியில்லாமல் சிறுமி சம்மதித்தாள். அம்மா, பொருட்கள் வாங்கிவிட்டு பணம் கொடுக்க முற்படும்போது தன் மகளின் சட்டைப் பையில் அந்தப் பொம்மை இருப்பதைப் பார்த்தார்கள். அவர்கள் கோபத்தை அடக்கிக்கொண்டு கேட்டார்கள்: ""நீ எதற்கு இதை எடுத்தாய்?''

சிறுமி அச்சத்தோடு சொன்னாள்: ""நீங்கள் வாங்கித் தராததால் நானாகவே எடுத்து என் சட்டைப் பையில் வைத்துக்கொண்டேன் அம்மா!''

அம்மா கடைக்காரரிடம் சொன்னார்கள்:

""மன்னித்துக்கொள்ளுங்கள். தவறு நடந்துவிட்டது!''

கடைக்காரர் புன்னகையுடன் சொன்னார்: ""பரவாயில்லை மேடம். பாவம் அவள் குழந்தைதானே...அவள் பொம்மையை எடுத்து தன் பையில் வைப்பதை நான் பார்த்துக்கொண்டுதான் இருந்தேன். நீங்கள் நல்லவர்கள் என்று உங்களைப் பார்த்தாலே தெரிகிறது. அதனால்தான் நான் எதுவும் பேசாமல் இருந்தேன். உங்களைத் தொந்தரவு செய்ய வேண்டாம் என்று நினைத்தேன்.

நீங்கள் வீட்டிற்குச் சென்றவுடன் பொம்மையைப் பார்ப்பீர்கள் என்றும், அதைத் திரும்பக் கொண்டுவந்து கொடுப்பீர்கள் என்றும் எனக்கு நம்பிக்கை உண்டு!''

கடைக்காரரின் வார்த்தைகளைக் கேட்ட அம்மா மனம் நெகிழ்ந்தார்கள். தன்னால்தான் அம்மா வருந்துகிறார்கள் என்று அறிந்த சிறுமியும் சங்கடப்பட்டாள்.

இது உண்மையில் நடந்த கதை.

நம்முடைய ஒவ்வொரு சிறிய செயலிலும், நடையுடை பாவனைகளிலும் நம் பண்பாடும் நாகரிகமும் பிரதிபலிக்கும். நம் பேச்சைவிடவும், நம் பண்பாட்டை மற்றவர்களுக்கு அறிவிப்பது நம் நடத்தைதான். மற்றவர்கள் நம் பேச்சை மட்டும் வைத்து நம்மை எடைபோட மாட்டார்கள். நம் நடத்தையின் தன்மையை வைத்துத்தான் நம்மைக் கணிப்பார்கள். நல்ல நாகரிகமும் பண்பாடும்தான் நம்மை முழுமையான மனிதர்களாக்கும்.

சிறுவர்மணி

by றினா Sun Jun 12, 2011 9:53 pm

உண்மைதான்

நம்முடைய ஒவ்வொரு சிறிய செயலிலும், நடையுடை பாவனைகளிலும் நம் பண்பாடும் நாகரிகமும் பிரதிபலிக்கும். நம் பேச்சைவிடவும், நம் பண்பாட்டை மற்றவர்களுக்கு அறிவிப்பது நம் நடத்தைதான். மற்றவர்கள் நம் பேச்சை மட்டும் வைத்து நம்மை எடைபோட மாட்டார்கள். நம் நடத்தையின் தன்மையை வைத்துத்தான் நம்மைக் கணிப்பார்கள். நல்ல நாகரிகமும் பண்பாடும்தான் நம்மை முழுமையான மனிதர்களாக்கும்.