எம தர்ம ராசனுக்கு எளியோனின் வணக்கமுங்க!

by **rameshnaga** Sun Jun 05, 2011 11:22 am

சாதி, மதம் பார்க்காமல்-சஞ்சலமும் இல்லாமல்
சனங்க உசிரெடுக்கும்-
எமதர்ம ராசனுக்கு - எளியோனின் வணக்கமுங்க.
காடு, மேடு, விளைஞ்சிருக்க-
உறவில்- என் கல்யாணப் பெண்ணிருக்க
அய்யா-நானும்
கனவுகள் வளர்த்து வைச்சேன்!
என்னா அவசரமின்னு
என்னை இழுத்து வந்தீங்க?!
எம ராசா உங்க பேரு!
எவன் சேத்தான் ஊடா "தர்மம்"?
அய்யா!எமராசா!
"எம தர்ம ராசன்" பேர் கிடைக்க-
எவன் வீட்டுப் பொண்டுகளை-
சூதா வைச்சு ஆடினீக?
தொண்ணூறு தொக்கி நிக்க--
சிலும்பி நிக்கும் சின்னச் சிங்கம்-என்னை
சீக்கிரமா இழுத்து வந்த
உன் தப்பான கணக்கையெல்லாம்
தர்மமின்னு எவன் சொன்னான்?
ஊரில் நூறு கோவிலுண்டு.
அதில்-சாதிக்கொரு சாமியுண்டு.
ஊரிடுக்கில் சுற்றி வந்தும்
உனக்கொரு கோவிலுண்டா?
அய்யா-ஊர்ப்பாவம் சேத்து வைச்சா
உன்னை எவன் கும்பிடுவான்?
போனதெல்லாம் போகட்டும்-அய்யா!
உன்னிடம் ரகசியம் நான் பேசிடணும்!
எம் ஊரில்-
என்ன ஒரு கணக்கானாலும்
"ஆல்டர்"-பண்ண வசதியுண்டு.
உன் கணக்கைக் கிறுக்கி வைக்க
உனக்கு எம்மாம் நான் தரவேணும்?
பணக்காரன் படுத்துக்கிட்டா
பத்து வருஷம் கழிச்சு வாரே!
பத்துப் பைசாக்கு வக்கில்லைனா
பட்டுனு நீ நூல் விடறே!
தப்பு தப்பா கணக்கெழுதி
ஏழைக் கனவையெல்லாம்
கலைச்சுவைச்ச - தர்மராசா!
உன் கணக்கை-
எந்த ஊரு சாமி பாக்கும்?.