உங்கள் ஊரும் இப்படித்தான் இருக்கிறதா?

by **rameshnaga** Wed Jun 01, 2011 8:04 pm

ஊரோரம் ஒரு விளக்கு;-அது அந்திநேரம்
எரிவதாய் என் ஊரில் ஒரு கணக்கு.
என் விழியிரண்டின் வெளிச்சத்தில்
அவ் விளக்கெரிந்து பார்த்ததில்லை.
அது எரிகின்ற நாள் வரலாம்-
அமாவாசை நிலவு வந்தால்.
தெருவோரம் ஒரு பைப்பு;-அதைத்
திருக வேண்டும் தனி டைப்பாய்;
அதில் நீர் வந்து பார்த்ததில்லை;-ஆனாலும்
நப்பாசை மனிதர்களோ நம்பிக்கையை இழப்பதில்லை.
பைப்பைத் திறந்து விட்டால்-பெருமூச்சாய் காற்று வரும்;
காலன் உங்கள் பக்கம் நின்றால்-கல்லும் பாம்பும் சேர்ந்து வரும்.
இரவின் தூக்கம் கெட்ட பெண்களுக்கோ-
கண் அடைக்கத் துக்கம் வரும் .
ஊர் முழுக்கச் சாக்கடைகள்;-அதில்
திரி நூலாய் பிரிந்து நிற்கும்
பஸ் செல்லும் வழித்தடங்கள்--அங்கே
கல்லும்,மண்ணும் கலைந்திருக்கும்.
ஒட்டிக்கொள்ளும் தார் கூட ஒட்டாமல் பிரிந்து நிற்கும்;
ஏழையின் வயிறு போல ஏகமாய் குழி இருக்கும்.
இதை பஸ் ரூட் என்றிடுவார் - பாவங்கள் செய்த மக்கள்;
நடந்தால் பாவம் - பல்லி கூடத் தடுக்கி விழும்.
இத்தனையும் வேதனைகள்;-சாதனைகள் சில உண்டு.
வருடத்திற்கு இரண்டு முறை வீட்டு வரி ஏற்றிடுவார்;
வராத தண்ணீருக்கோ வரி மட்டும் வாங்கிடுவார்;
சாக்கடையைக் காப்பாற்றி, கொசு வளர்ச்சி காத்திடுவார்.
வாய் நுழையா நோய்க்கெல்லாம் வழி வகுத்துத் தந்திடுவார்.
இதை-"நகராட்சி" என்றிடுவார் ஆளும் மக்கள்-என்றாலும்
"நரகத்தின் ஆட்சி"-என்றே எழுதி வைப்பார்
நோய் வந்து சாகும் மக்கள்.
-

by தாமு Thu Jun 02, 2011 5:27 am

////ஒட்டிக்கொள்ளும் தார் கூட ஒட்டாமல் பிரிந்து நிற்கும்;
ஏழையின் வயிறு போல ஏகமாய் குழி இருக்கும்.////

சூப்பருங்க

by மகா பிரபு Thu Jun 02, 2011 6:06 am

அட, இந்தியா வில் உள்ள எல்லா ஊரோட நிலைமையும் இதுதான் நண்பா.

by **சிவா** Thu Jun 02, 2011 8:32 am

நகர வாழ்க்கை நரக வாழ்க்கை என சும்மாவா சொல்லி வைத்துள்ளார்கள்! மிகவும் அழகான சமுதாயக் கவிதையைப் படைத்ததற்கு வாழ்த்துக்கள் ரமேஷ்!

சொர்க்கமே என்றாலும் அது கிராமத்தைப் போல் வருமா?