மம்தாவின் திடீர் பயணங்களால் போலீசார் அதிர்ச்சி

by kitcha Mon May 30, 2011 11:19 am

மேற்கு வங்காளத்தில் முதல் அமைச்சராக பொறுப்பேற்றுள்ள மம்தா பானர்ஜி, முன்அறிவிப்பு இல்லாமல் பல்வேறு இடங்களுக்கு திடீர் ஆய்வுக்கு செல்வதால் போலீசார் அதிர்ச்சி அடைந்துள்ளனர்.

மேற்கு வங்காளத்தில் முதல் பெண் முதல் அமைச்சராக கடந்த 20ந் தேதி மம்தா பானர்ஜி பதவியேற்றார். பதவியேற்றதும் கவர்னர் மாளிகையில் இருந்து தலைமைச்செயலகத்துக்கு நடந்தே சென்று முதல் அமைச்சர் அலுவலகத்தில் பொறுப்பேற்றார். வழி நெடுகிலும் ஆயிரக்கணக்கான மக்கள் திரண்டு வந்து அவரை வாழ்த்தினார்கள். அப்போது ஏற்பட்ட நெரிசலில் பாதுகாப்பு தடுப்பு வளையங்கள், தடுப்பு கம்பிகள் போன்றவற்றை மக்கள் தள்ளி விட்டனர். முதல் அமைச்சர் அலுவலகம் முன்பும் கும்பல் சேர்ந்ததால் பாதுகாப்பு போலீசார் மிகுந்த அதிர்ச்சி அடைந்தனர்.

இசட் பிளஸ் பாதுகாப்பில் இருக்கும் முதல் அமைச்சர் மம்தா பானர்ஜிக்கு குண்டு துளைக்காத கார் மற்றும் அவருடைய பயணத்தின்போது முன்அறிவுப்பு செய்ய பைலட் கார் போன்றவை அளிக்கப்பட்டன. ஆனால், குண்டு துளைக்காத கார் மற்றும் பைலட் கார் ஆகியவற்றை திருப்பி அனுப்பிவிட்டார்.

மேலும், சாலையில் செல்லும்போது போக்குவரத்தை நிறுத்தி தனக்காக கூடுதல் ஏற்பாடுகள் எதையும் செய்ய வேண்டாம் என்றும் போலீசாருக்கு உத்தரவிட்டுள்ளார். சாதாரண மக்களைப் போலவே போக்குவரத்து சிக்னலை மதித்து தனது காரும் சிக்னலில் நின்று செல்லும் என உறுதியாக தெரிவித்து விட்டார். அதுவும், கட்சியினர் அளித்த காரிலேயே இப்போதும் பயணம் செய்கிறார்.

இதனால், மம்தா பானர்ஜிக்கு பாதுகாப்பு அளிப்பது குறித்து போலீசார் மிகுந்த அதிர்ச்சி அடைந்துள்ளனர். பயணத்தின்போது கூடுதல் கார்கள், பைலட் கார், குண்டு துளைக்காத கார் எதுவும் தேவையில்லை என முதல் அமைச்சர் மம்தா கூறி விட்டார்' என்று மாநில போலீஸ் டி.ஜி.பி. நபராஜித் முகர்ஜி தெரிவித்துள்ளார்.

எனினும், மம்தா பாதுகாப்புக்காக சாதாரண உடை அணிந்த போலீசாரை அதிக அளவில் பணியில் அமர்த்தி இருப்பதாகவும், மம்தாவை சுற்றி வளையம் போல எப்போதும் அவர்கள் பாதுகாப்பில் ஈடுபடுவார்கள் என்றும் முதல் அமைச்சரின் பாதுகாப்பு விஷயத்தில் எந்தவித சமரசமும் செய்ய முடியாது என்றும் நபராஜித் தெரிவித்தார்.

நக்கீரன்