(கல்சியம் கார்பைட்டால்) சுட்ட பழம் வேண்மா? சுடாத பழம் வேண்டுமா?

by கண்ணன்3536 Fri May 27, 2011 10:20 am

Viruvirupu, Friday 27 May 2011, 02:44 GM

• இயல்பிலேயே ‘உஷார் பார்ட்டி’களான மதுரைக்காரர்களுக்கேயா?

மதுரை, இந்தியா: தமிழகத்தில் தொடங்கியுள்ள மாம்பழ சீசனுக்கு, மதுரையில் ஸ்டார்டிங் டிரபிள்! திடீரென ஒருநாள் பழக்கடைகளில் மாம்பழங்களே இல்லை. விசாரித்தால், “அதிகாரிகள் வாரிக்கொண்டு போய்விட்டனர்” என்றார்கள். மறுநாள் மாம்பழங்கள் இருந்தன. ஆனால், வாங்குவதற்கு ஆளில்லை.

“என்னய்யா இது, உள்ளே-வெளியே விளையாட்டா?” என்று விசாரித்தால்தான், சுட்ட பழம்-சுடாத பழம் கதை வெளிவருகிறது.

தமிழகத்தில் மாம்பழ சீசன் ஏப்ரலில் தொடங்கினால், ஆகஸ்ட் இறுதிவரை நீடிக்கும். மதுரை பழக்கடைகளில் இந்த வருடம் கொஞ்சம் லேட்டாகவே சீசன் தொடங்கியது. மதுரைக்கு மாம்பழங்கள் வருவது, அருகிலுள்ள அலங்காநல்லூர், சோழவந்தான் ஆகிய இடங்களில் இருந்துதான். பழ வரவு குறைந்தால் ஆந்திராவிலிருந்தும் வருவதுண்டு.

மே மாத நடுப்பகுதியில், மாம்பழங்களைச் சாப்பிட்டவர்களில் பலர் டாக்டர்களிடம் படையெடுக்கத் தொடங்கினர். வயிற்றுக் கோளாறு, வாந்தி என்றெல்லாம் கூப்பாடுகள். அதையடுத்து, மாம்பழங்களை விரைவில் பழுக்க வைக்க ஏதோ ரசாயனம் பயன்படுத்தப்படுவதாக அல்லோலகல்லோலப்பட்டது மதுரை.

கதை உண்மைதான். இதில் பயன்படுத்தப்படும் ரசாயனம், கல்சியம் கார்பைட் படிவங்கள்.

விஷயம் கலெக்டர் ஆபீஸ்வரை போகவே, இந்த வாரம் மதுரை, மற்றும் புறநகர் பழக்கடைகளில் அதிரடிச் சோதனைகள் நடாத்தப்பட்டன. கல்சியம் கார்பைட் படிவங்கள் பயன்படுத்தப்படுவது உறுதியானது. அப்படிப் பழுக்க வைக்கப்பட்ட பழங்களை பறிமுதல் செய்து, வாரிக்கொண்டு போனார்கள் அதிகாரிகள்.

மொத்தம் 80,000 கிலோ மாம்பழங்கள் பறிமுதல் செய்யப்பட்டதாக ஆவணங்கள் கூறுகின்றன. அதன் மார்க்கெட் மதிப்பு, கிட்டத்தட்ட 40 லட்சம் ரூபா.

அதனால்தான், திடீரென இரவோடு இரவாக பழக்கடைகளில் மாம்பழங்களே இல்லாத நிலை மதுரையில் ஏற்பட்டது. எல்லாம் ஒருநாள்தான். அடுத்த நாளே கடைகளில் மாம்பழங்கள் வந்துவிட்டன.

ஆனால், முதல் நாளைய பறிமுதல் விஷயம் பப்ளிக் ஆகிவிட்டதில், மாம்பழத்தை யாரும் வாங்குவாரில்லை. விலை பாதியாகக் குறைந்தது. அப்போதும் மூவிங் இல்லை.

இப்போது பழக்கடைக்காரர்களே, “மாம்பழம், மாம்பழம்” என்று கூவுவதற்குப் பதிலாக, “சுட்ட பழம் இல்லீங்க.. இது சுடாத பழம், மாமோய்” என்று கூவி விற்கத் தொடங்கியிருக்கிறார்கள்.

இயல்பிலேயே ‘உஷார் பார்ட்டி’களான மதுரைக்காரர்கள், மாம்பழத்தில், கல்சியம் கார்பைட் மணம் வீசுகிறதா என்று பழக்கடைகளில் முகர்ந்து பார்த்த பின்னரே வாங்குவதை மதுரையில் எங்கும் காணக்கூடியதாகவுள்ளது.

மாமோய்.. கல்சியம் கார்பைட்டுக்கு தூக்கலான மணம் கிடையாது!

nanri viruviruppu