நகரமயமாக்கல், குவாரிகளால் வரலாற்று சின்னங்கள் அழிக்கப்படும் அபாயம்- கருத்தரங்கில் தகவல்

.தருமபுரி, மே 23: நகரமயமாக்கல் நடவடிக்கைகளாலும், குவாரிகள் பெருக்கத்தாலும் பெரும்பான்மையான வரலாற்று தகவல்களும், சின்னங்களும் அழிக்கப்படும் அபாயம் உள்ளது என்று அதியமான் சமூக, வரலாற்று ஆய்வு மைய கருத்தரங்கில் வலியுறுத்தப்பட்டது.

தருமபுரி அருகேயுள்ள பாப்பாரப்பட்டியில் அதியமான் சமூக, வரலாற்று ஆய்வு மைய தொடக்க விழா மற்றும் கருத்தரங்கு ஞாயிற்றுக்கிழமை நடைபெற்றது. விழாவில் பல்வேறு துறை அறிஞர்கள் பேசினார்.
மையத்தின் செய்தி மடலை வெளியிட்டு மாவட்ட நீதித்துறை குற்றவியல் முதன்மை நடுவர் ஜி.பழனியப்பன் பேசியது:

அரசர்கள் காலத்து வரலாற்றுச் செய்திகளை அடிப்படையாகக் கொண்ட ஆய்வுகளைவிட கிராமங்கள் சார்ந்த வரலாற்று ஆய்வுகள் அதிகரிக்க வேண்டும். பண்டைய கால கிராம மக்களின் வாழ்க்கை முறைகளை வெளியுலகுக்கு தெரியப்படுத்தும் வகையிலான ஆய்வுகள் அதிகரிக்கப்பட வேண்டும். ஆய்வுகளை கிராமங்களில் இருந்து தொடங்க வேண்டும் என்றார்.

பெரியார் பல்கலைக்கழக தமிழ்த்துறைத் தலைவர் பெ.மாதையன் பேசுகையில், எழுதப்பட்ட வரலாறுகள் குறித்த ஆய்வுகளைப் போன்று, எழுதப்படாத வரலாற்றுகளை உலகுக்கு உணர்த்தும் வகையில் ஆய்வுகள் மேற்கொள்ள வேண்டும். தருமபுரி, கிருஷ்ணகிரி மாவட்டங்களில் ஏராளமான வரலாற்று சின்னங்கள், நடுகற்கள், புராதான கல்வெட்டுகள் உள்ளன. இவற்றுள் புதைந்துள்ள வரலாற்று தகவல்களை வெளிக் கொணர வேண்டும் என்றார்.

மத்திய செம்மொழி ஆய்வு மைய முனைவர் மே.து. ராசுகுமார் பேசுகையில், கல்வெட்டு மொழிகளுடன், சங்க இலக்கிய மொழிகளையும் ஒப்பிட்டு ஆய்வுகள் நடத்தப்பட வேண்டும். ஒவ்வொரு துறைக்கும் ஒரு வரலாறு உண்டு. இதேபோல், கிராமங்களின் மக்கள் வாழ்க்கை முறைக்கும் வரலாற்று சான்றுகள் உள்ளன. அவற்றைத் தேடிச் சென்று ஆராய வேண்டும் என்றார்.

நிகழ்ச்சியில் பேசிய அனைவருமே, நகரமயமாக்கல் நடவடிக்கைகளாலும், குவாரிகள் பெருக்கத்தாலும் பெரும்பான்மையான வரலாற்று தகவல்களும், சின்னங்களும் அழிக்கப்படும் நிலையுள்ளதால் அவற்றைப் பாதுகாக்க மத்திய, மாநில அரசுகள் நடவடிக்கை எடுக்க வேண்டும் என வலியுறுத்தினர்.


4tm

புராதானசின்னங்கள் காப்பாற்றபடல் வேண்டும்

ரபீக் wrote:புராதானசின்னங்கள் காப்பாற்றபடல் வேண்டும்

ஆனால் அதை நிறைய பேர் யோசிப்பதே இல்லையே