பெண் என்ற காரணத்திற்காக கனிமொழிக்கு ஜாமீன் வழங்கிட கூடாது!: ஜெயலலிதா

by தாமு Wed May 25, 2011 4:31 pm

கனிமொழி ஓர் பெண் என்ற காரணத்தை மட்டும் அடிப்படையாக கொண்டு, அவருக்கு ஜாமீன் வழங்கி விட கூடாது என தமிழக முதல்வர் ஜெயலலிதா தெரிவித்தார்.

அமைச்சரவை பதவியேற்பின் பின் இன்று முதன் முறையாக ஊடகவியலாளர்களை சந்திப்பை மேற்கொண்டார். அதன் போது கனிமொழி கைது விவகாரம் தொடர்பில் கருத்து தெரிவித்த அவர், ஓர் பெண் என்பதால் ராஜ்யசபா எம்.பி கனிமொழிக்கு ஜாமீன் வழங்கப்படவேண்டும் என்பதை ஏற்றுக்கொள்ள முடியாது. நீங்கள் ஒரு பெண் என்பதால் அரசியலில் எந்தவொரு சலுகையும் உங்களுக்கு வழங்கப்படுவதில்லை. அது போலத்தான் குற்றம் செய்தவர்களுக்கும்! யாராக இருப்பினும் அவர்கள் தண்டனைக்குரியவர்களே. பெண் என்பதை காரணம் காட்டி ஜாமீன் வழங்கப்படுவது என்பது ஏற்புடையதல்லவே என்றார். மேலும் கனிமொழி கைது செய்யப்பட்டு சிறையில் இருப்பது, இறுதியில் சட்டம் தன் கடமையை செய்வதை உணர்த்துகிறது என தெரிவித்தார்.

முன்னர், கனிமொழியின் ஜாமீன் மீதான மனு விசாரணை வழக்கில், அவருடைய தரப்பில் ஆஜரான வழக்கறிஞர் ராம் ஜெத்மலானி, கனிமொழி ஓர் பெண் என்ற அடிப்படையில் அவருக்கு ஜாமீன் வழங்க வேண்டுமென வாதாடிய போது, விதிவிலக்கான வழக்குச்சிக்கல் என்பதால் அவ்வாதத்தினை நீதிபதி ஏற்றுக்கொள்ள மறுத்திருந்தது குறிப்பிடத்தக்கது.

இதேவேளை எதிர்வரும் ஜூன் 3ம் திகதி இடம்பெறும் ஆளுனர் உரையின் போது, தனது தேர்தல் வாக்குறுதிகளில் முன்வைக்கப்பட்டட திட்டங்கள் சிலவற்றை நடைமுறைப்படுத்துவது தொடர்பில் விளக்கவுள்ளதாகவும், திமுக அரசில் நடமுறையிலிருந்த காப்புறுதி திட்டம், வீட்டுக்கடன் திட்டம், மெட்ரோ ரயில் திட்டம் போன்றவற்றை மீண்டும் சீர்தூக்கி பார்க்கவிருப்பதாகவும் தெரிவித்தார்.

மேலும் அதிமுக அரசு கொண்டுவரவிருக்கும் திட்டங்கள் பற்றி ஊடகவியலாளர்கள் தொடர்ச்சியாக கேள்வி எழுப்பிய போது பதில் அளித்த முதல்வர்,
ஆட்சி பொறுப்பு ஏற்று 8 நாட்கள் தான் ஆகிறது. இன்னும் மற்றவர்கள் எல்லாம் ஆட்சி பொறுப்பு ஏற்க முன்னமே நாங்கள் ஆட்சி பொறுப்பை ஏற்று செயற்படுத்த ஆரம்பித்துவிட்டோம். என்னிடம் நீங்கள் இத்தனை கேள்வி கேட்கிறீர்கள். இதைவிட வேகமாக வேறு யாராவது செயற்பட்டதாக இந்தியாவில் நீங்கள் காட்ட முடியுமா? என தெரிவித்தார்.

4tm