ஆண்கள் மட்டுமே கொண்டாடும் திருவிழா!

by **krishnaamma** Fri May 20, 2011 8:36 am

ஆத்தூர்: ஆத்தூர் அருகே மகா தேவதை அம்மனுக்கு நள்ளிரவில், "கிடா வெட்டி சிறப்பு பூஜை செய்யப்பட்டது. இதில், ஆண்கள் மட்டுமே கலந்து கொண்டனர். ஆத்தூர் பகுதியில், 24 தெலுங்கு மனை செட்டியார் சமுதாயத்தினர் வசித்து வருகின்றனர். இச்சமுதாய மக்கள், ஐந்தாண்டுக்கு ஒருமுறை குலதெய்வ வழிபாடு செய்கின்றனர். அதன்படி, கொத்தாம்பாடி வழியாக செல்லும் வசிஷ்ட நதிக்கரையில், பிரசித்தி பெற்ற மகா தேவதை அம்மன் எனும் வன தேவதை கோவில் விழா நடந்து வருகிறது. நேற்று முன்தினம் நள்ளிரவு, 12 மணியளவில், மண்ணில் உருவாக்கப்பட்ட அம்மன் சிலைக்கு பூங்கரகம் எடுத்தல் நிகழ்ச்சி நடந்தது. தொடர்ந்து, மகா தேவதை அம்மனுக்கு நேர்த்திக் கடனாக விடப்பட்ட, 42 "கிடா ஆடுகளை வெட்டி பலி பூஜை செய்யப்பட்டது. பின், ஆண்கள் மட்டுமே கலந்து கொண்டு பலி பூஜை செய்த ஆட்டுக் கறியை சமைத்து சாப்பிட்டனர். அதில், மீதப்பட்ட கறி, சாப்பாடு, ஆட்டின் தோல், எலும்பு உள்ளிட்டவைகளை துண்டுகளாக்கி மண்ணில் புதைத்தனர். பின், மகா தேவதை அம்மனுக்கு புஷ்ப அலங்காரம் செய்து வழிபாடு செய்தனர். இந்த வினோத பூஜையில், ஏராளமான பக்தர்கள் கலந்து கொண்டு வழிபாடு செய்தனர். அதேபோல், ஆத்தூர் அருகே ஒட்டம்பாறை பகுதியிலுள்ள மாரியம்மன் கோவிலில் நேற்று முன்தினம் நள்ளிரவு 12 மணியளவில், சக்தி அழைத்தல் நிகழ்ச்சி நடந்தது. தொடர்ந்து பக்தர்கள், பூங்கரகம் மற்றும் வேப்பிலை கரகம் எடுத்து வந்தனர். பின், நள்ளிரவில் பெண்கள் உள்ளிட்ட நூற்றுக்கும் மேற்பட்ட பக்தர்கள் அலகு குத்தியபடி அம்மனுக்கு சிறப்பு வழிபாடு செய்தனர். அப்போது புஷ்ப அலங்காரத்தில் மாரியம்மன் திருவீதி உலா வந்தார். இதில், ஆத்தூர், துலுக்கனூர், ஒட்டம்பாறை, அம்மம்பாளையம் பகுதியை சேர்ந்த பக்தர்கள் கலந்து கொண்டு வழிபாடு செய்தனர்.