பழநி கோவிலில் தரை விரிப்பு :பக்தர்கள் பாதம் இனி நோகாது!

by **krishnaamma** Fri May 20, 2011 11:46 am

பழநி : பழநி மலைக்கோவிலில் பிரகாரம் வலம் வரும் பக்தர்களின் வசதிக்காக தரைவிரிப்பு (மேட்) அமைக்கப்பட்டுள்ளது. பழநி தண்டாயுதபாணி சுவாமி மலைக்கோவில் வெளிப்பிரகாரத்தில், மேற்குபுற பகுதி தாழ்வான நிலையில் இருந்தது. தங்கரத ஓட்டத்தின் போது, அதன் வேகத்தில் மாறுபாடு நிலவியது. பக்தர்கள் பிரகார வலம் வருதிலும் சிரமம் இருந்தது. இதனால், வெளிப்பிரகாரத்தில் கற்கள் தோண்டி எடுக்கப்பட்டு, "பாலீஷ் செய்து பதிக்கப்பட்டுள்ளன. பள்ளமான பகுதிகள் சமப்படுத்தப்பட்டுள்ளன. வெயில் காலங்களில் அதிக வெப்பத்தால், பக்தர்கள் அவதிப்பட்டனர். இதற்காக அவ்வப்போது தண்ணீர் தெளிக்கப்படும். தற்போது பக்தர்களின் பாதங்கள் நோகாமல் இருக்க, 250 மீட்டர் நீளம், மூன்றடி அகலத்தில், வெளிப்பிரகாரத்தில் தரை விரிப்பு அமைக்கப்பட்டுள்ளது. இது, காலை 11 முதல் மாலை 5 மணி வரை மட்டுமே பயன்படுத்தப்படும்.

நாளை விஸ்வரூப தரிசனம்: அக்னி நட்சத்திரம் நிறைவை முன்னிட்டு, பழநி கோயிலில் நாளை அதிகாலை 4 மணிக்கு விஸ்வரூப தரிசனம் நடக்கிறது. பழநி தண்டாயுதபாணி சுவாமி கோயில் மலையில், அரியவகை மூலிகைகள் உள்ளன. மேலும், அக்னி நட்சத்திர விழாக் காலத்தில் (சித்திரை மாத கடைசி ஏழு, வைகாசியின் முதல் ஏழு நாட்கள்) மலையில் சஞ்சீவி மூலிகை காற்று வீசும் என்பது நம்பிக்கை. இந்தாண்டு அக்னி நட்சத்திர விழா, மே 8ல் துவங்கியது. சஞ்சீவி காற்று வாங்க, கிரிவல பக்தர்களின் எண்ணிக்கை அதிகரித்தது. நாளையுடன் அக்னி நட்சத்திரம் நிறைவடைகிறது. மலைக்கோயிலில் அதிகாலை 4 மணிக்கு நடை திறக்கப்பட்டு, விஸ்வரூப தரிசனம், பின் வழக்கம்போல பூஜைகள் நடக்கும்.