ஏழைகளுக்கு வேட்டி, புடவை அசத்தும் தொண்டு நிறுவனம்

by **krishnaamma** Sun May 15, 2011 9:01 pm

மும்பை: டில்லியைச் சேர்ந்த தன்னார்வ தொண்டு நிறுவனம், நகர்ப்புறங்களில் வசிக்கும் மக்களிடம் இருந்து, வேட்டி, புடவை உள்ளிட்ட துணிகளை சேகரித்து, அவற்றை கிராமப் புறங்களில் வசிக்கும் ஏழை மக்களுக்கு, வழங்கி வருகிறது.
டில்லியை மையமாக கொண்டு கூன்ச் என்ற தன்னார்வ தொண்டு நிறுவனம் செயல்படுகிறது. இந்த அமைப்பு, வித்தியாசமான உதவிகளை, ஏழை மக்களுக்கு செய்து வருகிறது. இந்த அமைப்பைச் சேர்ந்த அன்ஷû குப்தா என்பவர் கூறியதாவது: கிராமங்களில் வசிக்கும் ஏழை மக்கள், மிகவும் வறுமையில் வாடுகின்றனர். அதே நேரத்தில், நகர்ப்புறத்தில் வசிப்பவர்கள், பல பொருட்களை தேவைக்கு அதிகமாக வைத்திருந்து வீணடிக்கின்றனர். தேவைக்கு அதிகமாக வைத்திருக்கக் கூடிய துணிகள் உள்ளிட்ட பொருட்களை சேகரித்து, அவற்றை கிராமப் புறங்களில் வசிக்கும் ஏழை மக்களுக்கு வழங்கி வரும் பணியைச் செய்து வருகிறோம். உடை என்பது, ஒரு மனிதனின் அடையாளம். எனவே தான், உடைகளுக்கு முக்கியத்துவம் கொடுத்து, சேவை செய்து வருகிறோம்.
கிராமங்களில் சாலைகள் பழுது பார்ப்பது, மூங்கில் பாலம் அமைப்பது போன்ற பணிகளை செய்து வருகிறோம். இந்த பணிகளைச் செய்யும் மக்களுக்கு ஊதியமாக, வேட்டி, சேலை போன்ற பொருட்களை கொடுத்து வருகிறோம். கிராமங்களில் வசிக்கும் பெண்களுக்கு, "சானிட்டரி நாப்கின்' பயன்படுத்த வேண்டியதன் அவசியத்தை விளக்கி கூறுகிறோம். இதற்காக, அவர்கள் பழைய துணிகளை பயன்படுத்தும் பழக்கத்தை வைத்துள்ளனர். பழைய துணிகளை பயன்படுத்தக் கூடாது என, அவர்களுக்கு அறிவுறுத்துகிறோம். மேலும், நகர்ப்புறங்களில் பெற்ற துணிகளை மறு சுழற்சி செய்து, அவற்றை நாப்கின்களாக மாற்றி தயாரிக்கிறோம். தன்னார்வ தொண்டு நிறுவனம் என்ற வட்டத்துக்குள் மட்டும் செயல்படாமல், ஒரு குறிக்கோளுடன் செயல்பட விரும்புகிறோம். இவ்வாறு அன்ஷû குப்தா கூறினார்.