பெண் மீது சிறுநீர் ஊற்றிய சம்பவம் நடவடிக்கை எடுப்பதில் போலீசார் தயக்கம்

by **சிவா** Wed Apr 20, 2011 8:11 pm

ஹரிப்பாடு : ஓட்டுச் சாவடியில், காங்கிரஸ் கட்சி கூட்டணி தேர்தல் பெண் ஏஜன்ட் மீது, சிறுநீர் ஊற்றிய சம்பவத்தில், குற்றவாளிகளை இதுவரை போலீசார் கைது செய்யவில்லை என, புகார் எழுந்துள்ளது. கேரளாவில், கடந்த 13ம் தேதி, சட்டசபை தேர்தலுக்கான ஓட்டுப்பதிவு நடந்தது. அப்போது, ஆலப்புழா மாவட்டம் ஹரிப்பாடு தொகுதி காங்கிரஸ் கட்சியின் தேர்தல் ஏஜன்ட்டாக சேதுலட்சுமி(43) என்பவர், மண்ணார்சாலா ஆரம்பப் பள்ளியில், 49ம் எண் ஓட்டுச் சாவடியில் பணியாற்றினார். ஓட்டுப் பதிவு முடிந்ததும், காங்கிரஸ் கட்சி உள்ளூர் பிரமுகர்களுடன் சேதுலட்சுமி பேசிக் கொண்டிருந்த போது, அங்கு வந்த மார்க்சிஸ்ட் கம்யூனிஸ்ட் கட்சியைச் சேர்ந்த சிலர், காங்கிரஸ் கட்சியைச் சேர்ந்த முரளி என்பவரை அடித்து உதைத்தனர்.

இதுகுறித்து, அப்பகுதி ஊராட்சி தலைவரிடம் முறையிட காங்கிரசார் சென்றனர். அங்கும் வந்த அதே கும்பல், தப்பித்து ஓட முயன்ற சேதுலட்சுமியின் முதுகில் குத்தியது. பிறகு, கையில் வைத்திருந்த பாட்டிலிலிருந்து, சேதுலட்சுமியின் தலை மீது, சிறுநீரை ஊற்றினர். சிறுநீர் அப்பெண்ணின் உடல் முழுவதும் பரவும் வரை, அவரை பிடித்து வைத்திருந்த அக்கும்பல், தகாத வார்த்தைகளால் திட்டியும், மிரட்டியும் சென்றது. அப்பெண், போலீசில் புகார் செய்த போது, முதலில் புகாரை வாங்க மறுத்த போலீசார், பிறகு சரக ஐ.ஜி., ஸ்ரீலேகா உத்தரவின்படி, வழக்கு பதிந்தனர்.

இச்சம்பவத்தில் ஊராட்சி தலைவர் பி.எம்.சந்திரன், அவரது மனைவி, மகன் ஆகியோரை போலீசார் இதுவரை கைது செய்யாமல் இருப்பது, அவர்களுக்கு ஜாமீன் கிடைப்பதற்கான மறைமுக உதவியாக இருக்கும் என, புகார் எழுந்துள்ளது. இடதுசாரி ஜனநாயக முன்னணி வேட்பாளர் ஜி.கிருஷ்ண பிரசாத் மற்றும் ஆளும் கட்சியினர், "இது பொய் வழக்கு, இதுபோன்ற சம்பவம் நடக்கவில்லை' எனவும் கண்டனம் தெரிவித்தனர்.

தினமலர்