தேர்தல் கமிஷன் நடவடிக்கை சிறப்பு : மாஜி தேர்தல் அதிகாரி அதிரடி பேட்டி

by தாமு Sun 3 Apr 2011 - 7:27

திருச்சி : ""தேர்தல் கமிஷன் நடவடிக்கை சிறப்பாக உள்ளது. அப்படித் தான் இருக்க வேண்டும்,'' என, தமிழக முன்னாள் தலைமைத் தேர்தல் அதிகாரி நரேஷ்குப்தா கூறினார். திருச்சி தேசியக் கல்லூரி 92ம் ஆண்டு விழா, கல்லூரி வளாகத்தில் நேற்று நடந்தது. இதில் கலந்து கொண்ட தமிழக முன்னாள் தலைமைத் தேர்தல் அதிகாரி நரேஷ்குப்தா பேசியதாவது: தேர்தலில் ஓட்டுப் போடுவது, நம் அனைவரின் கடமை. 1920ம் ஆண்டு மகாத்மா காந்தி எழுதிய, "யங் இந்தியா' என்ற நூலில், "வாக்காளராகிய ஒவ்வொருவரும் நேர்மையான, நல்ல வேட்பாளர்களை தேர்வு செய்ய வேண்டும்' என வலியுறுத்தியுள்ளார். அதேபோல், இந்த தேர்தலில் நல்ல, நேர்மையான வேட்பாளரை நாம் தேர்வு செய்ய வேண்டும். இவ்வாறு நரேஷ் குப்தா பேசினார்.
பின்னர் நிருபர்களிடம் அவர் கூறியதாவது: ஓட்டளிக்கும் நேரம் காலை 7 மணி முதல், மாலை 5 மணி வரை இருந்தது. தற்போது, காலை 8 மணி முதல், மாலை 5 மணியாக குறைக்கப்பட்டுள்ளது. தமிழகத்தில் மட்டும் ஓட்டளிக்கும் நேரம் குறைக்கப்படவில்லை. இந்தியா முழுவதும் இந்த நேரம் குறைக்கப்பட்டுள்ளது.
இந்த நேரக்குறைப்பு பென்னாகரம் இடைத்தேர்தலின் போதே வந்து விட்டது. எலக்ட்ரானிக் ஓட்டுப்பதிவு இயந்திரம் சரியாக உள்ளதா என்பதை, "மாக் போல்' நடத்தி பார்க்கவே இந்த நேரக்குறைப்பு. ஒவ்வொரு தொகுதிக்கும், 15 வேட்பாளர் போட்டியிடும் போது, இயந்திரத்தை சரி செய்ய நேரம் வேண்டும். அதாவது ஒவ்வொரு வேட்பாளரின் ஏஜன்ட்களும் இயந்திரம் சரியாக உள்ளதா என்பதை சரி செய்வதற்காக, 100 முறை ஓட்டளிக்க வேண்டும்.
தேர்தல் கமிஷன் நடவடிக்கை சிறப்பாக உள்ளது. அப்படித் தான் இருக்க வேண்டும். அப்படியிருந்தால் தான், ஓட்டுக்கு பணம் அளிப்பது, பிரியாணி, குவாட்டர் மற்றும் பரிசுப் பொருட்கள் வழங்குவது போன்ற விஷயங்களை தடுக்க முடியும். தேர்தல் நெருங்குவதால், வாகன சோதனையை இன்னும் தீவிரப்படுத்த வேண்டும். அமைச்சர் அழகிரிக்கு பாதுகாப்பு வாபஸ் வாங்கியது பற்றி நான் ஏதும் கூற முடியாது. அது தேர்தல் கமிஷன் நடவடிக்கை. இவ்வாறு நரேஷ்குப்தா கூறினார்.

தினமலர்.