விஜயகாந்தை தோற்கடிக்க வரிந்துகட்டும் தி.மு.க., நிர்வாகிகள்

by தாமு Sun Apr 03, 2011 5:52 am

விஜயகாந்த்தை தோற்கடிக்க தி.மு.க., நிர்வாகிகள் வரிந்துகட்டி களமிறங்கியுள்ளனர். தே.மு.தி.க., தலைவர் விஜயகாந்த் போட்டியிடும் ரிஷிவந்தியம் தொகுதியில் அவரை எதிர்த்து காங்., வேட்பாளர் சிவராஜ் களமிறங்கியுள்ளார். இவர் கடந்த நான்கு முறையாக எம்.எல்.ஏ.,வாக தொடர்ந்து நீடித்ததால் மக்களிடம் எதிர்ப்பு அலை இருக்கும். தி.மு.க., எம்.பி., ஆதிசங்கர்- சிவராஜ் எம்.எல்.ஏ., மோதல், இவையெல்லாம் தனக்கு சாதகமாக இருக்கும். எனவே நேரடியாக தி.மு.க.,விடம் இருந்து விலகி காங்., கட்சியுடன் மோதலாம் என்ற எண்ணத்தில் தான் விஜயகாந்த் ரிஷிவந்தியத்தை தேர்வு செய்ததாக அக்கட்சியினர் கணித்திருந்தனர்.
துவக்கத்தில் விஜயகாந்தின் கணிப்பு சரியாகத்தான் இருந்தது. சிவராஜுக்கு எதிராக எதிர்ப்பு அலை பலமாக வீசியது. சிவராஜ்- ஆதிசங்கர் மோதலும் சூடுபிடித்தது. ஆதிசங்கர் தனது ஆதரவாளர்களை கட்டுப்படுத்தி வைத்திருந்தார். தனது சொத்தை அபகரித்துக் கொண்டதாக சிவராஜுக்கு எதிராக ஒரு பெண்ணும் களமிறங்கினார். இதனால் காங்., கட்சியினருக்கு மிகப்பெரிய தலைவலி ஏற்பட்டது.
கருணாநிதியையும், அவரது குடும்பத்தையும் சகட்டு மேனிக்கு விமர்சனம் செய்து வரும் விஜயகாந்தை இந்த தேர்தலில் எப்படியும் தோற்கடித்தே தீர வேண்டும் என்று கங்கனம் கட்டிக் கொண்டிருக்கும் தி.மு.க.,விற்கு காங்., வேட்பாளர் சிவராஜ் சந்தித்துவரும் சிக்கல்கள் வருத்தத்தை அளித்தது. சிவராஜ், ஆதிசங்கரின் நீண்டநாள் பகையை சரி செய்து ஆதிசங்கரை தேர்தல் பணியில் களமிறக்க தி.மு.க., தலைமை திட்டமிட்டது. அதற்காக அமைச்சர் பொன்முடியை தூதுவராக அனுப்பியது தலைமை. அமைச்சர் எ.வ.வேலுனும் பேச்சு நடத்தினார், இதிலும் தீர்வு ஏற்படவில்லை.
நேரடியாக களத்தில் இறங்கினார் ஸ்டாலின். ஆதிசங்கரை தொலைபேசியில் அழைத்து நமக்கு ஜெ., முக்கியம் அல்ல, அவர் நமக்கு ஒரு எதிரியே அல்ல, இந்த தேர்தலுடன் அவர் அரசியல் பயணத்தை முடித்துக் கொள்வார். ஆனால் விஜயகாந்த் ஜெயித்து விட்டால் அரசியலில் நாம் 40 ஆண்டுகள் போராட வேண்டி இருக்கும். அவரை தோற்கடித்துவிட்டுதான் என் முகத்தில் விழிக்க வேண்டும் என கண்டிப்புடன் கூறிவிட்டார். இதயைடுத்து சுறுசுறுப்பாக தனது களப்பணியை துவக்கியுள்ளார் ஆதிசங்கர்.
பணத்தை தண்ணீராக செலவழித்து தொகுதி மக்களை ஒரு முறைக்கு பலமுறை நேரில் சந்தித்து மண்ணின் மைந்தர், உங்கள் குறையை தீர்க்க ஓடோடி வருவோம் என்ற வாக்குறுதிகளால் எதிர்ப்பு அலை ஓய்ந்து அமைதி வீசுகிறது. சிவராஜுக்கு தேவையான அனைத்து உதவிகளையும் செய்ய தி.மு.க., தயாராகி விட்டது.
ஒருவழியாக சிக்கலில் இருந்து வெளியேறிய சிவராஜ், ஆதிசங்கர் எம்.பி.,யின் ஆதரவுடன் தொகுதி மக்களின் ஆரவாரத்திற்கிடையே வலம் வந்து கொண்டிருக்கிறார். விஜயகாந்த் பாதுகாப்பான தொகுதி என ரிஷிவந்தியத்தை தேர்வு செய்த நிலையில் பல்வேறு சிக்கல்களை சந்திக்க வேண்டிய கட்டாயத்தில் உள்ளார். கட்சி தலைவர் என்ற நிலையில் இதனை விஜயகாந்த் எப்படி சமாளிக்கப் போகிறார் என்ற எதிர்பார்ப்பு தொகுதி மக்களிடையே ஏற்பட்டுள்ளது.
-நமது சிறப்பு நிருபர்-

தினமலர்.