ரஜினியுடன் நடிக்க மாதுரி மறுப்பு!

by **சிவா** Mon 21 Mar 2011 - 16:15

இந்தியாவின் கனவுக்கன்னியாக திகழ்ந்தவர் பிரபல நடிகை மாதுரி திட்சித். இவர் தமிழில் அரவிந்தசாமியுடன் `என்ஜினீயர்' என்ற படத்தில் நடித்தார். ஆனால் படம் பாதியிலேயே நின்று போனது. அதன்பின்னர் தமிழில் நடிக்க பலர் முயற்சித்தும் நடிக்க மறுத்துவிட்டார்.

திருமணம் செய்து அமெரிக்காவில் செட்டில் ஆன மாதுரி, அதன் பின்னர் படங்களில் நடிப்பதை குறைத்துக் கொண்டார். தற்போது தனக்குப் பிடித்தமான வேடங்களில் மட்டுமே நடித்து வருகிறார். இந்நிலையில் சூப்பர் ஸ்டார் ரஜினிகாந்துடன் நடிக்க வந்த வாய்ப்பை மறுத்துவிட்டார் மாதுரி!

அடுத்து ரஜினி நடிக்கும் புதிய படமான ரானா, வரலாற்றுப் பின்னணியை கொண்ட ஆக்ஷன் படம். இதில் ரஜினி ஜோடியாக தீபிகா படுகோனே, அருந்ததி படத்தில் வில்லனாக நடித்த சோனு சுத் ஆகியோர் நடிக்கின்றனர். இந்த படத்தில் ரஜினியின் தங்கை வேடத்தில் நடிக்க மறுத்து விட்டார் மாதுரி.

இதுகுறித்து மாதுரி கூறுகையில், ``ரானா படத்தில் ரஜினிகாந்துடன் சேர்ந்து நடிக்கும் வாய்ப்பு வந்தது. ஆனால் அது தங்கை வேடம் என்பதால் மறுத்து விட்டேன். சரியான வேடம் கிடைத்தால் நடிப்பேன்'' என்றார். 1987-ம் ஆண்டில் வெளிவந்த `உத்தர் தக்ஸின்' என்ற படத்தில் ரஜினிகாந்துடன், மாதுரி திட்சித் ஜோடியாக நடித்தவர் என்பது குறிப்பிடத்தக்கது.