ஜப்பானில் கதிர்வீச்சின் அளவு அதிகரிக்கிறது: தீயை அணைக்க ராணுவ ஹெலிகாப்டர் முயற்சி தோல்வி

ஜப்பானில் அணுக்கதிர் வீச்சின் அபாய அளவு அதிகரித்து வருகிறது. கதிர் வீச்சு அபாயம் காரணமாக, அணு உலை மீது தண்ணீரை தெளிக்க ராணுவ ஹெலிகாப்டரை பயன்படுத்தும் முயற்சி தோல்வியில் முடிந்தது.

அணுசக்தி பாதுகாப்பு ஏஜென்சி

ஜப்பானில் கடந்த வெள்ளியன்று 9 ரிக்டர் அளவில் ஏற்பட்ட மிகப்பெரிய பூகம்பத்தால் புகுஷிமா அணுமின் நிலையத்தில் உள்ள 4 அணு உலைகளும் கடுமையாக பாதிக்கப்பட்டு வெடித்துள்ளன. 4-வது அணு உலையில் தீ விபத்து ஏற்பட்டு ஹைட்ரஜன் வாயு பரவி வருகிறது. 3-வது அணு உலையில் அணு மூலப் பொருட்கள் மேலும் உருகாமல் தடுக்க முயற்சிகள் நடைபெறுகின்றன.

தற்போது, 50 ஊழியர்கள் அங்கு பணியில் இருப்பதாக கருதப்படுகிறது. அதே நேரத்தில், காற்றில் கதிர்வீச்சின் அளவும் வேகமாக அதிகரித்து வருகிறது. மணிக்கு 10 மில்லி சிவியர் வேகத்தில் அணுக்கதிர் வீச்சு உயருவதாக அந்த நாட்டின் அணுசக்தி பாதுகாப்பு ஏஜென்சி அறிவித்துள்ளது. நேற்று காலை 11 மணி அளவில் இந்த அறிவிப்பு வெளியானது. மேலும், 2-வது அணு உலையில் இருந்தும் கதிரியக்கம் வேகமாக வெளியேறுகிறது.

70 சதவீதம் சேதம்

அணு எரிபொருள் குழாயைப் பொறுத்தவரை, 1-வது அணு உலையில் 70 சதவீதமும் 2-வது அணு உலையில் 33 சதவீதமும் சேதம் அடைந்துள்ளன. குறைந்தபட்ச அளவிலான தடுப்பு பணிகளை கூட தொழிலாளர்களால் மேற்கொள்ள முடியவில்லை. ஏற்கனவே, அந்த உலைகளில் இருந்து 700 ஊழியர்கள் வெளியேற்றப்பட்டு விட்டனர்.

அதே நேரத்தில், 4-வது அணு உலையில் விட்டு விட்டு தீ விபத்து தொடருகிறது. அங்கிருந்து ஹைட்ரஜன் வாயு வேகமாக வெளியேறுகிறது. கதிர்வீச்சு மற்றும் ஹைட்ரஜன் வாயு வெளியேற்றத்தால் கதிர் வீச்சின் அளவு உயர்ந்து கொண்டே இருக்கிறது. கதிரியக்கத்தின் தாக்கம் காரணமாக, தீ விபத்து ஏற்பட்டுள்ள அணு உலை மீது ராணுவ ஹெலிகாப்டர் மூலமாக தண்ணீரை தெளிக்கும் முயற்சி தோல்வியில் முடிந்தது.

மன்னர் அகிகிடோ அறிக்கை

இதற்கிடையே, அணுக்கதிர் வீச்சு தொடர்பாக ஜப்பான் மன்னர் அகிகிடோ நேற்று அறிக்கை வெளியிட்டார். சுனாமி, நிலநடுக்கம் போன்ற பேரழிவைத் தொடர்ந்து ஏற்பட்டுள்ள இந்த இக்கட்டான சூழ்நிலையில், முதன் முதலாக அவர் தனது கருத்தை வீடியோ பதிவு மூலமாக வெளியிட்டு இருக்கிறார்.

அதில் அவர், ``மக்கள் அனைவரும் நலமாக வாழ வேண்டும் என என்னுடைய அடி ஆழ இருதயத்தில் இருந்து நம்பிக்கை தெரிவிக்கிறேன். தற்போதைய, கடினமான தருணத்தில் மக்கள் அனைவரும் ஒருவருக்கொருவர் இரக்கத்துடனும், கருணையுடனும் இணைந்து பணியாற்ற வேண்டும்'' என தெரிவித்துள்ளார்.

ஜப்பான் இந்த நிலைமையிலிருந்து மீண்டு வரவும் மக்கள் நலம் பெற இதயம் பணிந்து இறைவனை வேண்டிகொள்கின்றேன்.