காலிறுதியில் நுழைந்தது இலங்கை! தில்ஷன், தரங்கா அதிரடி சதம்

பல்லேகெலே: உலக கோப்பை லீக் போட்டியில் தில்ஷன்(144), தரங்கா(133) சதம் அடிக்க, இலங்கை அணி, ஜிம்பாப்வேயை 139 ரன்கள் வித்தியாசத்தில் வீழ்த்தியது. இதன் மூலம் காலிறுதிக்கு "சூப்பராக' முன்னேறியது.

இந்திய துணைக் கண்டத்தில் பத்தாவது உலக கோப்பை தொடர் நடக்கிறது. நேற்று இலங்கையில் உள்ள பல்லேகெலேவில்(கண்டி) நடந்த "ஏ' பிரிவு லீக் போட்டியில் இலங்கை, ஜிம்பாப்வே அணிகள் மோதின. இலங்கை அணியில் மெண்டிஸ், ஹெராத் நீக்கப்பட்டு, குலசேகரா, திசரா பெரேரா வாய்ப்பு பெற்றனர். ஜிம்பாப்வே அணியில் சார்லஸ் கவன்ட்ரிக்கு பதிலாக மொபோபு சேர்க்கப்பட்டார். "டாஸ்' வென்ற ஜிம்பாப்வே கேப்டன் எல்டன் சிகும்புரா "பீல்டிங்' தேர்வு செய்தார்.

அசத்தல் துவக்கம்:

இலங்கை அணிக்கு தில்ஷன், தரங்கா இணைந்து அசத்தல் துவக்கம் தந்தனர். பன்யங்கராவின் முதல் ஓவரில் 3 பவுண்டரி, ஒரு சிக்சர் அடித்தார் தில்ஷன். பின் மொபோபு ஓவரில் தரங்கா வரிசையாக 3 பவுண்டரி அடித்தார். தொடர்ந்து பவுண்டரிகளாக விளாசிய இவர்களை வெளியேற்ற முடியாமல் ஜிம்பாப்வே பவுலர்கள் தவித்தனர். சிகும்பரா பந்தை ஒரு ரன்னுக்கு தட்டி விட்ட தில்ஷன், உலக கோப்பை அரங்கில் முதல் சதம் எட்டினார். இது ஒரு நாள் போட்டிகளில் இவரது 9வது சதம். மறுபக்கம் தனது அதிரடி ஆட்டத்தை தொடர்ந்த தரங்கா, பிரைஸ் பந்தை பவுண்டரிக்கு அனுப்பி சதம் கடந்தார். இதன் மூலம் உலக கோப்பை வரலாற்றில் துவக்க வீரர்கள் இருவரும் முதல் முறையாக சதம் அடித்து சாதனை படைத்தனர். பின் லாம்ப் ஓவரில் தரங்கா 3 பவுண்டரி அடிக்க, ஸ்கோர் "ஜெட்' வேகத்தில் உயர்ந்தது. தரங்கா 133 ரன்களுக்கு(17 பவுண்டரி) மொபோபு பந்தில் அவுட்டானார். தில்ஷன் 144 ரன்களுக்கு(16 பவுண்டரி, 1 சிக்சர்) உத்சேயா வலையில் சிக்கினார். இவர், இலங்கை சார்பில் உலக கோப்பை அரங்கில் அதிக ரன் எடுத்த அரவிந்தா டி சில்வாவின்(145 ரன், எதிர் கென்யா, 1996) சாதனையை தகர்க்க தவறினார்.

அடுத்து வந்தவர்கள் ரன் வேகத்தை உயர்த்தும் நோக்கில் விக்கெட்டுகளை விரைவாக பறிகொடுத்தனர். மொபோபு வீசிய போட்டியின் 48வது ஓவரில் ஜெயவர்தனா(9), மாத்யூஸ்(0), சமரசில்வா(4) அவுட்டாகினர். இலங்கை அணி 50 ஓவரில் 6 விக்கெட்டுக்கு 327 ரன்கள் குவித்தது. சங்ககரா(11) அவுட்டாகாமல் இருந்தார்.

பிரண்டன் அதிரடி:

கடின இலக்கை விரட்டிய ஜிம்பாப்வே அணிக்கு பிரண்டன் டெய்லர் அதிரடி துவக்கம் தந்தார். இலங்கை பவுலர்களை ஒருகை பார்த்த இவர் பவுண்டரிகளாக விளாசினார். மலிங்கா, குலசேகரா, முரளிதரன் பந்துகளை விளாசித் தள்ளிய இவர், அரைசதம் கடந்தார். இவருக்கு நல்ல ஒத்துழைப்பு அளித்த சகப்வா(35) முரளிதரன் "தூஸ்ராவில்' போல்டானார். இதற்கு பின் விக்கெட்டுகள் வரிசையாக சரிந்தன. மாத்யூஸ் வேகத்தில் சங்ககராவின் சூப்பர் "கேட்ச்சில்' தைபு(4) காலியானார். அபாரமாக ஆடிய பிரண்டன் டெய்லர் 80 ரன்களுக்கு(9 பவுண்டரி, 1 சிக்சர்), மாத்யூஸ் பந்தில் வெளியேறினார்.

நழுவிய "ஹாட்ரிக்':

தில்ஷன் சுழலில் உத்சேயா(4) சிக்கினார். இவரது அடுத்த ஓவரின் 3வது பந்தில் எர்வின்(17) அவுட்டானார். 4வது பந்தில் ஜெயவர்தனாவின் கலக்கல் "கேட்ச்சில்' லாம்ப்(0) நடையை கட்டினார். இதையடுத்து தில்ஷனுக்கு "ஹாட்ரிக்' வாய்ப்பு காத்திருந்தது. 5வது பந்தில் கிரிமர் கொடுத்த "கேட்ச்சை' இம்முறை ஜெயவர்தனா நழுவவிட, அரிய வாய்ப்பு வீணானது.

பல்லேகெலேவில் தனது கடைசி சர்வதேச போட்டியில் பங்கேற்ற முரளிதரன் வலையில் மொபோபு(1) வெளியேற, ஜிம்பாப்வே அணி 39 ஓவரில் 188 ரன்களுக்கு ஆல் அவுட்டாகி தோல்வி அடைந்தது. "ஏ' பிரிவில் 7 புள்ளிகளை பெற்ற இலங்கை அணி காலிறுதிக்கு முன்னேறியது.

"ஆல்-ரவுண்டராக' அசத்திய தில்ஷன் ஆட்ட நாயகன் விருதை தட்டிச் சென்றார்.

முதல் முறை

ஜிம்பாப்வே அணிக்கு எதிராக துவக்க வீரர்களாக களமிறங்கிய இலங்கையின் உபுல் தரங்கா (133), தில்ஷன் (144) இருவரும் சதம் அடித்தனர். இதன்மூலம் உலக கோப்பை அரங்கில், துவக்க வீரர்கள் இருவரும் சதம் அடித்தது இதுவே முதல் முறை. இது, சர்வதேச ஒருநாள் போட்டி கிரிக்கெட் அரங்கில், 22வது முறைய. இதில் இலங்கை துவக்க வீரர்கள் 6 முறை சதம் கடந்துள்ளனர்.
---

இரண்டாவது முறை

நேற்றைய போட்டியில் இலங்கை அணியின் துவக்க வீரர்களான உ<புல் தரங்கா, தில்ஷன் ஜோடி முதல் விக்கெட்டுக்கு 282 ரன்கள் சேர்த்தது. இதேபோல ஜிம்பாப்வே அணியின் துவக்க வீரர்களான பிரண்டன் டெய்லர், ரிகிஸ் சகப்வா ஜோடி முதல் விக்கெட்டுக்கு 116 ரன்கள் சேர்த்தது. இதன்மூலம் உலக கோப்பை அரங்கில், இரண்டாவது முறையாக, ஒரு போட்டியில் இரு அணிகளின் துவக்க ஜோடிகள், முதல் விக்கெட்டுக்கு, நூறு அல்லது அதற்கு மேல் ரன்கள் சேர்த்தன. முன்னதாக கடந்த 2007ல் ஆஸ்திரேலியாவின் ஹைடன், கில்கிறிஸ்ட் ஜோடி முதல் விக்கெட்டுக்கு 106 ரன்கள் சேர்த்தது. இப்போட்டியில் தென் ஆப்ரிக்காவின் ஸ்மித், டிவிலியர்ஸ் ஜோடி முதல் விக்கெட்டுக்கு 160 ரன்கள் சேர்த்தது.
---

ஸ்கோர்போர்டு

இலங்கை

தரங்கா(கே)சிகும்புரா(ப)மபோபு 133(141)
தில்ஷன்(கே)பன்யான்காரா(ப)உட்சேயா 144(131)
பெரேரா(கே)சிகும்புரா(ப)பிரைஸ் 3(5)
ஜெயவர்தனா(கே)சகப்வா(ப)மபோபு 9(7)
சங்ககரா-அவுட் இல்லை- 11(7)
மாத்யூஸ்(கே)சிகும்புரா(ப)மபோபு 0(1)
சில்வா(கே)பன்யான்காரா(ப)மபோபு 4(2)
சமரவீரா-அவுட் இல்லை- 8(7)
உதிரிகள் 15
மொத்தம் (50 ஓவரில், 6விக்.,) 327

விக்கெட் வீழ்ச்சி: 1-282(தரங்கா), 2-289(தில்ஷன்), 3-296(பெரேரா), 4-300(ஜெயவர்தனா), 5-302(மாத்யூஸ்), 6-308(சில்வா).

பந்துவீச்சு: மபோபு 7-0-62-4, பன்யான்காரா 6-0-51-0, பிரைஸ் 9-1-46-1, சிகும்புரா 3-0-20-0, உட்சேயா 10-0-50-1, கிரீமர் 7-0-42-0, லாம்ப் 8-0-51-0.

ஜிம்பாப்வே

டெய்லர்(கே)ஜெயவர்தனா(ப)மாத்யூஸ் 80(72)
சகப்வா(ப)முரளிதரன் 35(61)
தைபு(கே)சங்ககரா(ப)மாத்யூஸ் 4(6)
உட்சேயா(ஸ்டம்)சங்ககரா(ப)தில்ஷன் 4(11)
எர்வின்-எல்.பி.டபிள்யு.,(ப)தில்ஷன் 17(21)
சிகும்புரா(கே)பெரேரா(ப)முரளிதரன் 6(11)
லாம்ப்(கே)ஜெயவர்தனா(ப)தில்ஷன் 0(1)
கிரீமர்-அவுட்இல்லை 14(27)
பிரைஸ்(கே)சமரவீரா(ப)பெரேரா 11(15)
பன்யான்காரா-எல்.பி.டபிள்யு.,(ப)தில்ஷன் 0(4)
மபோபு(ப)முரளிதரன் 1(5)
உதிரிகள் 16
மொத்தம் (39 ஓவரில், "ஆல்-அவுட்') 188

விக்கெட் வீழ்ச்சி: 1-116(சகப்வா), 2-125(தைபு), 3-132(டெய்லர்), 4-150(உட்சேயா), 5-156(எர்வின்), 6-156(லாம்ப்), 7-165(சிகும்புரா), 8-185(பிரைஸ்), 9-185(பன்யான்காரா), 10-188(மபோபு).

பந்துவீச்சு: மலிங்கா 8-0-51-0, குலசேகரா 8-0-33-0, பெரேரா 6---0-33-1, முரளிதரன் 9-0-34-3, மாத்யூஸ் 5-0-29-2, தில்ஷன் 3-1-4-4.

தினமலர்