டில்லியில் சாதிக்குமா இந்தியா?: டெஸ்ட் தொடரை கைப்பற்ற வாய்ப்பு

இந்திய, ஆஸ்திரேலிய அணிகள் மோதும் மூன்றாவது டெஸ்ட் இன்று டில்லியில் துவங்குகிறது. இதில் வெற்றி பெற்று, தொடரை கைப்பற்ற இந்திய அணி தயாராக இருக்கிறது. பல்வேறு சர்ச்சைகளில் சிக்கி தவிக்கும் ஆஸ்திரேலிய அணி மிகவும் இக்கட்டான நிலையில் உள்ளது.இந்தியா வந்துள்ள ஆஸ்திரேலிய அணி நான்கு டெஸ்ட் போட்டிகளில் கொண்ட தொடரில் பங்கேற்கிறது. மொகாலி டெஸ்டில் இந்தியா அபார வெற்றி பெற்று, தொடரில் 1-0 என முன்னிலை வகிக்கிறது. மூன்றாவது டெஸ்ட் இன்று டில்லி பெரோஷா கோட்லா மைதானத்தில் துவங்குகிறது.


ராசியான களம்: டில்லியை பொறுத்தவரை இந்தியாவுக்கு ராசியான இடம். கடந்த 7 டெஸ்ட் போட்டிகளில் இங்கு வென்று சாதனை படைத் துள்ளது. ஆஸ்திரேலிய அணியை பொறுத்தவரை 1959ல் தான் வென்றுள்ளது. சேவக், காம்பிர் இணைந்து அசத்தல் துவக்கம் தருவது இந்தியாவுக்கு பலம் சேர்க் கிறது. டில்லியில் சதம்அடிக்கும் ஆசையை சேவக் நிறைவேற்றும் பட்சத்தில் எதிரணிக்கு "கிலி' தான். தொடரில் அதிக ரன்கள் குவித்து முதலிடத்தில் இருக்கும் காம்பிரும் உறுதியாக கலக்குவார்.


சச்சின் உறுதி: சச்சினின் சாதனை ஆட்டம்,டிராவிட்டின் உறுதியான பேட்டிங்கும் இந்தியாவுக்கு கைகொடுக்கிறது. தனது கடைசி தொடரில் ஆடும் கங்குலி ஒவ்வொரு பந்தையும் அனுபவித்து ஆடுகிறார். தோனி தன்பங்கிற்கு அற்புதமான ஆட்டத்தை வெளிப்படுத்துகிறார். லட்சுமண் இன்று மீள்வார் என நம்பலாம்.வேகம் பலம்:இந்திய அணியின் வேகப்பந்து வீச்சாளர்கள் இந்த தொடரில் அசத்தி வருகிறார்கள். புதிய பந்தில் "ஸ்விங்' செய்து, ஜாகிர்கானும், இஷாந்த் சர்மாவும் ஆஸ்திரேலிய விக்கெட்டுகளை துவக்கத்திலேயே பதம் பார்த்து விடுகின்றனர். ஜாகிர்கான் ஹைடனையும், இஷாந்த் பாண்டிங்கையும், சொல்லி வைத்து வெளியேற்றுகின்றனர். இதனால் அந்த அணி பெரிய அளவில் ஸ்கோர் செய்யமுடியாமல் போய்விடுகிறது.

கும்ளே நிச்சயம்: டில்லியில் எப்போதும் சுழல் அலை வீசும். இந்தமுறையும் ஆடுகளம் சுழலுக்கு சாதகமாக தயாரிக்கப்பட்டு இருக்கிறது. காயம் குணமடைந்து அணிக்கு திரும்பும் கும்ளே கூறுகையில்,"" 100 சதவீதம் காயத்தில் இருந்து குணமடைந்துள்ளேன். ரசிகர்களின் எதிர்பார்ப்பை பூர்த்தி செய்வேன். முதலில் பேட் செய்து அதிக ரன்களை குவித்த எதிரணியின் 20 விக்கெட்டுகளை கைப்பற்ற முயற்சிப் போம். உள்ளூரை சேர்ந்த சேவக், காம்பிர் உதவுவார் கள். அநேகமாக தொடரில் வெற்றி பெறும் அணி இங்கு முடிவு செய்யப்படும்,'' என்றார். பிரச்னை அதிகம்: ஆஸ்திரேலிய அணிக்கு நிறைய பிரச்னைகள். கேப்டன் பாண்டிங்-பிரட் லீ இடையிலான மோதல் சிக்கல் ஏற்படுத்தலாம். பேட்டிங்கில் அதிகமாக திணறுகிறது.


பிரட் லீ சொதப்புகிறார்: இந்தியாவில் கலக்கும் மைக்கேல் கிளார்க், ஹைடன் இருவரும் "பார்ம்' இல்லாமல் தவிக் கின்றனர். ஹசி, வாட்சன் மட்டும் சிறப்பான ஆட்டத்தை தருகின்றனர். ஐ.பி.எல்., ஹீரோ ஷான் மார்ஷ் டெஸ்ட் அணிக்கு வந்துள்ளது நம்பிக்கை அளிக்கும். மெக்ராத் இடத்தை நிரப்புவார் என எதிர்பார்க்கப்பட்ட பிரட் லீ தொடர்ந்து சொதப்புகிறார். சிடிலுக்கு பதில் ஸ்டூவர்ட் கிளார்க் இன்று பங்கேற்க உள்ளார். சுழற்பந்துக்கு இம்முறை கிரெஜ்ஜா இடம் பெறுகிறார். இது குறித்து பாண்டிங் கூறுகையில்,"" ஆடுகளம் சுழற்பந்துவீச்சுக்கு சாதகமாக இருக்கிறது. இதனால் ஒன்று அல்லது இரு சுழல் வீரர்களுடன் களமிறங்க உள்ளோம். ஹர்பஜனுக்கு பதில் இடம் பெறும் மிஸ்ராவை பற்றி மொகாலியில் தெரிந்து கொண்டோம், கும்ளேவையும் நன்கு தெரியும். இம்முறை அவர்களுக்கு எதிராக சிறப்பாக செயல்படுவோம்,'' என்றார்.


ஹர்பஜன் சந்தேகம் : ஹர்பஜனுக்கு கால் முன் பகுதியில் காயம் ஏற்பட்டுள்ளது. இதனால் இவர் பயிற்சியில் முழுமையாக கலந்து கொள்ளவில்லை. இவருக்குப் பதிலாக மெகாலி டெஸ்டில் சுழலில் அசத்திய அமித் மிஸ்ரா வாய்ப்பு பெறலாம். இது பற்றி கேப்டன் கும்ளே கூறுகையில்,""ஹர்பஜன் அணியின் முக்கியமான வீரர். இவர் அணியில் இடம் பெறுவது குறித்து இன்று காலையில் முடிவு செய்யப்படும்,'' என்றார்.