“மனைவியைக் கட்டுப்படுத்த” தவறியதால் கணவரை வேறு இடத்திற்கு மாற்றுவதற்கு ஜோகூர் கல்வித் துறை முயற்சி செய்தது .

தெனாங் இடைத் தேர்தலில் பாஸ் சார்பில் போட்டியிடும் நோர்மலா சுடிர்மானுடைய கணவரை “அவர் மனைவியைக் கட்டுப்படுத்தத் தவறியதற்காக” ஜோகூர் பாருவுக்கு இடமாற்றம் செய்வதற்கு ஜோகூர் கல்வித் துறை முயற்சி செய்தது.

நோர்மலாவின் கணவரான மாக்ரோப் அப்துல் முத்தாலிப் அடுத்த 24 மணி நேரத்துக்குள் ஜோகூர் பாருவுக்கு மாறிச் செல்ல வேண்டும் என்ற திடீர் உத்தரவு அந்தத் தம்பதியினர் ஆட்சேபம் தெரிவித்த பின்னர் மீட்டுக் கொள்ளப்பட்டது.

“பாஸ் கட்சியில் என் மனைவியின் ஈடுபாட்டைக் கட்டுப்படுத்தத் தவறியதால் அந்த உத்தரவு பிறப்பிக்கப்படுவதாக தலைமையாசிரியர் என்னிடம் கூறினார்”, என்று மாக்ரோப் கூறினார்.

அவர் தெனாங்கில் உள்ள அந்தப் பள்ளிக்கூடத்தில் 13 ஆண்டுகளுக்கு மேலாக பணியாற்றி வருகிறார்.

அந்தத் தொகுதியில் ஜனவரி 30ம் தேதி நடைபெறவிருக்கும் இடைத்தேர்தலில் தமது மனைவி போட்டியிடக் கூடும் என்ற ஊகங்கள் வலுவாக இருந்த சில நாட்களுக்கு முன்பு தமக்கு அந்த இடமாற்ற அறிவிப்பு கிடைத்ததாக மாக்ரோப் சொன்னார்.

என்றாலும் அந்தக் கடிதத்தில் தாம் இடமாற்றம் செய்யப்படுவதற்கான அதிகாரத்துவ காரணம் தெரிவிக்கப்படவில்லை என்றார் அவர்.

“நாங்கள் மாவட்ட கல்வித் துறையிடம் ஆட்சேபம் தெரிவித்தோம். நோர்மலா தமது ஆசிரியர் பதவியை ஏற்கனவே ராஜினாமா செய்து விட்டார். அவர்கள் இவ்வாறு செய்யக் கூடாது. அவர்கள் அந்த உத்தரவை மீட்டுக் கொள்ளாவிட்டால் நாங்கள் மலேசிய ஊழல் தடுப்பு ஆணையத்திடம் கொண்டு செல்வோம் அல்லது நிருபர்களைச் சந்திப்போம் என்று கூறினோம். பின்னர் அவர்கள் அதனை மீட்டுக் கொண்டனர்”, என மாக்ரோப் தெரிவித்தார்.

அருகில் உள்ள சிகாமாட்டில் ஒர் ஆசிரியையான நோர்மலா முழு நேரமும் கட்சிப் பணியில் ஈடுபடுவதற்காகத் தமது பதவியை அண்மையில் ராஜினாமா செய்தார்.

எதிர்க்கட்சிகளை ஆதரிக்கும் துணைவர்களை அல்லது துணைவியர்களைக் கொண்ட ஆசிரியர்களுக்கு எதிராக பாகுபாடு காட்டப்படுவதையே அந்த இடமாற்ற அறிவிப்பு குறிப்பதாகவும் மாக்ரோப் சொன்னார்.

இதனிடையே ஜோகூர் கல்வித் துறையின் உத்தரவு அரசியல் நோக்கம் கொண்டது என ஜோகூர் தகவல் பிரிவுத் தலைவர் மஸ்லான் அலிமான் வருணித்துள்ளார்.

கல்வித் துறை இயக்குநர் நடவடிக்கை வீடியோவில் பதிவானது

கடந்த வாரம் ஜோகூர் கல்வித் துறை இயக்குநர் மார்க்கோம் ஜிரான், தெனாங்கில் உள்ள ஆசிரியர்களிடையே பிஎன்னுக்கு வெளிப்படையாக ஆதரவு தேடியது வீடியோவில் பதிவாகி இருக்கிறது.

“அந்த இடைத்தேர்தலில் அரசாங்கம் வெற்றி பெறுவதற்கு உதவுமாறு” மார்கோம் ஆசிரியர்களை மன்றாடிக் கேட்டுக் கொள்ளும் வீடியோ ஒளிப்பதிவு யூ டியூப்பில் சேர்க்கப்பட்டுள்ளது.”

ஆசிரியர்கள் மாணவர்களுக்கு தன்முனைப்புத் துண்டல் பயிற்சிகளுக்கு ஏற்பாடு செய்ய வேண்டும் என்றும் அதற்கு பின்னர் அவர்கள் மாணவர்களுடைய பெற்றோர்களைச் சந்தித்து அவர்கள் பிஎன் ஆதரவாளர்களா அல்லது எதிர்க்கட்சி ஆதரவாளர்களா என்பதை அடையாளம் காண வேண்டும் என்றும் மார்கோம் கூறியது அந்த வீடியோவில் பதிவாகியுள்ளது.

தெனாங் சட்டமன்றத் தொகுதியில் 15 பள்ளிக்கூடங்கள் உள்ளன. அவற்றில் தன்முனைப்புத் தூண்டல் நிகழ்வுகளை மாணவர்களுக்கு நடத்த கல்வித் துறை திட்டமிடுகிறது. அந்த நிகழ்வில் ஆசிரியர்கள், மாணவர்களுடைய பெற்றோர்களை சந்திக்க வேண்டும் என்று அவர் சொன்னார்.

“பெற்றோர்களைச் சந்திக்கும் போது நீங்கள் அவர்களை நான்கு நிறங்களில் அடையாளம் கண்டு பிரிக்க வேண்டும்- பச்சை, நீலம், பழுப்பு, வெள்ளை என்பது அந்த நிறங்களாகும். பச்சை என்பது தீவிர எதிர்க்கட்சி ஆதரவாளர்களைக் குறிக்கும். நீலம் என்பது பிஎன் ஆதரவாளர்களைக் குறிக்கும்,” என்றும் மார்கோம் அதில் தெரிவித்துள்ளார்.

‘பழுப்பு நிறத்தைச் சேர்ந்த மதில் மேல் பூனையாக இருக்கின்றவர்கள் பற்றி நீங்கள் எங்களுக்குத் தகவல் கொடுக்க வேண்டும். நாங்கள் அவர்களை நீலமாக மாற்றுவதற்கு முயற்சி செய்ய அது உதவும்”, என்றார் அவர்.

மார்கோம் பிரச்சாரத்தில் ஈடுபட்டது பற்றி ஜோகூர் பாஸ் துணை ஆணையாளர் சுல்கெப்லி அகமட் போலீசில் புகார் செய்துள்ளார்.

தெனாங் இடைத்தேர்தலுக்கு ஜனவரி 22 வேட்பாளர் நியமன நாள் ஆகும். வாக்களிப்பு ஜனவரி 30ம் தேதி நடைபெறும். அந்தத் தொகுதிக்கான பிஎன் சட்டமன்ற உறுப்பினர் சுலைமான் தாஹா டிசம்பர் 17ம் தேதி காலமானதைத் தொடர்ந்து இடைத்தேர்தல் நடத்தப்படுகிறது.

மலேசியா இன்றுhttp://www.malaysiaindru.com/?p=63736