வாக்காளர்களை நேரிடையாக "கவர' முக்கிய கட்சிகள் பூத் கமிட்டி அமைப்பு

by SK Thu Jan 06, 2011 5:45 pm

தி.மு.க., அ.தி.மு.க., சார்பில், வாக்காளர்களை நேரிடையாக கவரும் வகையில் பூத் கமிட்டி அமைக்கும் பணி, தீவிரப்படுத்தப்பட்டு வருகிறது.

சட்டசபை தேர்தல் வருவதையொட்டி, அரசியல் களம் இப்போதே சூடு பிடிக்க துவங்கியுள்ளது. முதல் கட்டமாக, அ.தி.மு.க.,சார்பில், வாக்குச்சாவடி வாரியாக, 18 பேர் கொண்ட, பூத் கமிட்டி, மண்டல, ஒன்றிய கமிட்டி, தொகுதி, மாவட்ட, மாநில பொறுப்பாளர்கள் நியமிக்கப்பட்டு, தேர்தல் குழு தயார் நிலையில் உள்ளது. தி.மு.க.வோ, அதற்கும் மேலே ஒரு படி சென்று,100 வாக்காளர்களுக்கு மூன்று பேர் என்ற வீதம் பூத் கமிட்டி அமைத்துள்ளது. பூத் கமிட்டி உறுப்பினர் ஒருவரின் வேலை, தனக்காக ஒதுக்கப்பட்ட 33 வாக்காளர்களை "கவனிப்பது'தான். அவர்களின் பெயர், விலாசம், உள்ளூர்-வெளியூர் விபரம், மொபைல் எண் ஆகியவற்றை தெளிவாக தெரிந்து வைத்திருக்க அறிவுறுத்தப்பட்டுள்ளது. இரண்டு கட்சிகளும் இப்போதே வரிந்து கட்டி வேலையை கவனிப்பதால், வாக்காளர்கள், வாக்களிக்காமல் தப்பிக்க வழியில்லை.

அதே போல்தான் அவர்களின் அன்பான கவனிப்பும் இருக்குமென எதிர்பார்க்கப்படுகிறது. இரண்டு கட்சிகளும் முக்கிய நிர்வாகிகளின் போட்டோ, மொபைல், ஏ.டி.எம். எண்களை, கேட்டு வைத்திருப்பதால் சட்டசபை தேர்தல், திருமங்கலம் தேர்தலை நினைவூட்டினாலும் ஆச்சர்யபடுவதற்கு ஒன்றுமில்லை.