நத்தைகளை சுட்டுத் திண்ணும் ஈழத் தமிழர்களின் நிலை

by நிசாந்தன் Sun Dec 19, 2010 10:14 pm

கடந்த ஓகஸ்ட் மாதம் 31ம் திகதி இந்தியாவில் இருந்து அவுஸ்திரேலியா நோக்கி புறப்பட்ட கப்பலில் 96 பேர் பயணித்துள்ளனர். கைக்குழந்தைகள், சிறுவர்கள் மற்றும் பெண்கள் என பலர் இதில் பயணம் செய்துள்ளனர். 15 நாட்களில் நீங்கள் அவுஸ்திரேலியா சென்றுவிடுவீர்கள் என்று முகவர் சொல்லி பணத்தைப் பெற்றது மட்டுமல்லாது, 15 நாட்களுக்குத் தேவையான உணவைக் கொடுத்து அனுப்பியுள்ளார். வேலைசெய்யாத திசையறி கருவி, சாதாரண செல் போனை சட்டலைட் செல்போன் எனக்கூறி இவர் 96 பேரின் உயிரோடு பணத்துக்காக விளையாடியுள்ளார். கப்பல் சென்று கொண்டிருந்தவேளை திடீரென எஞ்சின் பழுதாகி அவர்கள் நடுக்கடலில் பல நாட்களாக தத்தளித்துள்ளனர்.

கொண்டுசென்ற சாப்பாடு முடிந்ததால் அவர்கள் மழைத் தண்ணீரையும், உப்புத் தண்ணீரை மட்டும் அருந்தி 10 நாட்கள் தவித்துக் கொண்டிருந்தனர். அவ்வழியால் சென்ற கப்பல் ஒன்று இவர்கள் நிலை கண்டு சிறு பிள்ளைகள் சாப்பிடாமல் இருப்பதை உணர்ந்து நூடில்ஸ் பாக்கெட்டையும், குடி தண்ணீர் சிலவற்றையும் வழங்கிச் சென்றதாக அகதிகள் தெரிவித்தனர். மொத்தமாக 40 நாட்கள் கடலில் தத்தளித்த வேளை தொலைவில் ஒரு கப்பல் செல்வதைப் பார்த்த 2 இளைஞர்கள் தாம் நீந்திச் சென்று உதவிபெற்று திரும்புவதாகக் கூறி கடலில் குதித்து நீந்தியுள்ளனர். ஆனால் அவர்கள் இறந்துவிட்டனர்.

இறுதியில் கப்பல் பாறையோடு மோதி, உடைந்ததில் அனைவரும் நீரில் மூழ்கி கடற்கரை என்ற படியால் கரையை அடைந்துள்ளனர். அச் சிறு தீவில் வசித்த காட்டுவாசிகள் சிலர் அவர்களைக் காப்பாற்றி கரைக்கு கொண்டு வந்துள்ளனர். ஆற்றங்கரையில் உள்ள நத்தைகளை நெருப்பில் சுட்டு சாப்பிட்டு சில நாட்கள் உயிர்வாழ்ந்துள்ளனர். நத்தைகளை உண்டதால் சில சிறுவர் சிறுமியர் வாந்தி எடுத்தும் அஜீரணக் கோளாறுகளுக்கும் உள்ளாகியுள்ளனர். அதனைத் தொடர்ந்து அங்கே வந்த இந்தோனேசிய கடற்படையினர் மீதமுள்ள 93 பேரையும் ஜகார்த்தா கொண்டுசென்று அடைத்துவைத்துள்ளனர்.