அமெரிக்காவின் எதிர்ப்பையும் மீறி வடகொரியாவிலிருந்து ஆயுதங்கள் தருவிக்கப்பட்டுள்ளது

by நிசாந்தன் Thu 9 Dec 2010 - 7:03

அமெரிக்க இராஜாங்கத் திணைக்களத்துடன் பரிமாறப்பட்ட செய்திகளை அதிரடியாக வெளியிட்டு வரும் விக்கிலீக்ஸ் இணையம், இலங்கைக்கு வடகொரியாவிலிருந்து ஆயுதங்கள் தருவிக்கப்பட்டதாகக் கூறியுள்ளது. விக்கிலீக்ஸ் கொடுத்த தகவல்களை வெளியிட்ட தி நியூயோர்க் ரைம்ஸ் பத்திரிக்கையே இச்செய்தியை நேற்றையதினம் பிரசுரித்துள்ளது. பதற்றம் நிறைந்துள்ள உலகின் பகுதிகளுக்கு இவ்வாயுதங்கள் செல்வதைத் தடுப்பதற்கு அமெரிக்க இராஜதந்திரிகள் முயற்சி எடுத்திருந்ததாகவும், ஆனால் அதையும் மீறி வடகொரியாவிலிருந்து இலங்கைக்கு ஆயுதங்கள் வந்துள்ளதாகவும் அதில் குறிப்பிடப்பட்டுள்ளது.

விக்கிலீக்ஸ் வழங்கியுள்ள ஒரு தகவல் பரிமாற்றத்தில், ஹிஸ்புல்லா போராளிகளுக்கு ஆயுதங்களை விநியோகிக்கப்போவதில்லை என்று சிரியா நாட்டுத் தலைவர் பஹ்சார் அல்-அஸ்ஸாட் உறுதியளித்திருந்து ஒரு வாரத்திலேயே நவீனரக ஆயுதங்களை அவர் விநியோகித்துள்ளார் என்று கண்டனம் தெரிவிக்கப்பட்டுள்ளது. கடந்த பெப்ரவரி மாதத்தில் ஹிலாரி கிளின்ரன் அனுப்பிய தகவலே இதுவாகும். ஹிஸ்புல்லா இயக்கத்துக்கு ஆயுத விநியோகம் நடக்கும் இச்செயலை எமது அரசாங்கம் மிகுந்த கவனத்தில் எடுக்க வேண்டும் என்றும் ஹிலாரி அதில் வலியுறுத்தியுள்ளார்.

இதேவேளை, யேமன் நாட்டுக்கு செர்பியன் கறுப்புச் சந்தையிலிருந்து ஸ்னைப்பர் துப்பாக்கிகள் விற்கப்படுவது, பாகிஸ்தானுக்கு ஏவுகணைத் தொழில்நுட்பத்தைச் சீனா விற்பது, நச்சுவாயுவை உற்பத்தி செய்யும் இரசாயனப் பொருட்களை இந்தியா ஏற்றுமதி செய்வது போன்ற செயற்பாடுகளையும் நிறுத்துவதற்கு அமெரிக்க இராஜதந்திரிகள் முயற்சி எடுத்தனர் என மேலும் தெரிவிக்கப்பட்டுள்ளது.

2009 ஆம் ஆண்டின் தொடக்கத்தில் வடகொரியாவானது இலங்கைக்கு ரொக்கட் லோஞ்சர்களை விற்பனை செய்ததாகவும், இந்த வியாபாரத்துக்கான பணத்தைப் பெறுவதற்கு சீன வங்கிகள் பயன்படுத்தப்பட்டதாகவும் நியூயோர்க் ரைம்ஸ் தெரிவித்துள்ளது. 2009 ஆம் ஆண்டு ஜூலை மாதம் சிரேஷ்ட அமெரிக்க திறைசேரியின் அதிகாரி ஸ்டுவார்ட் லெவேயினால் அமெரிக்க இராஜாங்கத் திணைக்களத்துக்கு அனுப்பப்பட்ட செய்தியில் இவை குறிப்பிடப்பட்டுள்ளதாகத் தெரிகிறது.