மஹிந்தவுக்கு அதிர்ச்சிக்கு மேல் அதிர்ச்சி மன்னிப்புச் சபையும் ஐ.நா. விசேட பிரதிநிதியும் இனப்படுகொலை விசாரணைக்கு வலியுறுத்து

by நிசாந்தன் Thu Dec 02, 2010 5:14 am

அடி மேல் அடி வாங்கிக் கொண்டு அழுத்தங்களை எதிர்கொண்டிருக்கும் ஜனாதிபதி மஹிந்த ராஜபக்ஷவுக்கு ஐ.நா.வின் விசேட பிரதிநிதியொருவரும் தன் பங்குக்கு அதிர்ச்சி வைத்தியம் கொடுத்துள்ளார்.
இலங்கை இராணுவத்தால் மேற்கொள்ளப்பட்டதாகக் கூறப்படும் தமிழ்ப் பெண்கள் மீதான பாலியல் துஷ்பிரயோகம் உட்பட ஏனைய யுத்தக் குற்றச் செயல்கள் தொடர்பாக பிரிட்டனின் சனல் - 4 தொலைக்காட்சி புதிதாக வெளியிட்டுள்ள ஆதாரங்கள் குறித்து விசாரணைகள் நடத்தப்பட வேண்டும் என சட்டவிரோத கொலைகள் தொடர்பாக விசாரணை நடத்தும் ஐக்கிய நாடுகள் சபையின் விசேட பிரதிநிதி பேராசிரியர் கிறிஸ்டொப் ஹேன்ஸ் கேட்டுள்ளார்.
இதனிடையே சர்வதேச மன்னிப்புச் சபையும் தன் பங்குக்கு பிரிட்டனின் சர்வதேச சட்டங்களின் கீழ் இலங்கை ஜனாதிபதி மகிந்த ராஜபக்ஸ மற்றும் இலங்கை அதிகாரிகள் மீதும் யுத்தக் குற்றச்சாட்டுக்கள் தொடர்பாக விசாரணைகள் நடத்தப்பட வேண்டும் என வேண்டுகோள் விடுத்துள்ளது.
தமிழ் மக்கள் மீதான ஒட்டுமொத்தப் படுகொலைகள் மற்றும் கற்பழிப்புகள் தொடர்பாக தம்மிடம் நூற்றுக்கணக்கான படங்களும் காணொளி காட்சிகளும் கிடைத்துள்ளதாக சனல் - 4 நிர்வாகம் அறிவித்துள்ளது.
தம்மிடமிருந்த காணொளிகளில் இருந்து இலங்கை தொடர்பான ஐக்கிய நாடுகள் சபையின் ஆலோசனைக் குழுவுக்கு ஐந்து நிமிட நேர காணொளிக் காட்சியொன்றையும் சனல் - 4 அனுப்பி வைத்துள்ளது.
சுமார் ஒன்றரை வருடங்களுக்கு முன் வெளியிட்டது போன்ற மேலும் பல காட்சிகளை மீண்டும் சனல் - 4 வெளியிட்டுள்ளது. முன்னைய காட்சிகளை சித்தரிக்கப்பட்டது என்று கூறி இலங்கை அரசு நிராகரித்த போதிலும் பின்னர் அதை ஐ.நா விசாரணையாளர்கள் ஏற்றுக் கொண்டனர்.
தற்போதைய புதிய காணொளிகளையும் போலியானவை என்று லண்டனிலுள்ள இலங்கைத் தூதரகம் நிராகரித்திருப்பதுடன் ஜனாதிபதியின் விஜயத்தின் போது அவரைத் தர்மசங்கடத்துக்குள்ளாக்கும் நோக்குடன் அவை வெளியிடப்பட்டிருப்பதாகவும் குற்றம் சாட்டி கடுமையான கண்டனத்தை வெளியிட்டுள்ளது.
புதிதாக வெளியிடப்பட்டுள்ள காட்சிகளில் நிர்வாணமாக ஏழு பெண்கள் இறந்து கிடக்கும் காட்சிகள் காணப்படுகின்றன. இவற்றுக்கருகில் நின்று உரையாடுபவர்களின் உரையாடல்களிலிருந்து இந்தப் பெண்கள் கொல்லப்படுவதற்கு முன் கற்பழிக்கப்பட்டுள்ளார்கள் என்ற முடிவுக்கு வரக்கூடியதாக இருக்கின்றது.
சனல் - 4 விரிவாக இந்தக் காட்சிகளை ஒளிபரப்பிய போதிலும் ஒரு கட்டத்தில் அதற்கு மேல் காட்சிகள் ஒளிபரப்பமுடியாத அளவுக்கு காட்சிகள் கொடூரமாக இருக்கின்றன. பெண்கள் சுட்டுக் கொல்லப்படுவது, பெண்களின் நிர்வாண உடம்புகள், மற்றும் சூழ நின்று கொண்டிருப்பவர்களின் மோசமான வார்த்தைப் பிரயோகங்கள் உள்ளடங்கிய உரையாடல்கள் என்பன காரணமாக தொடர்ந்து ஒளிபரப்ப முடியவில்லை என்று அதன் அறிவிப்பாளர் கூறினார்.
இந்தக் காட்சிகள் மற்றும் கருத்துக்கள் என்பனவற்றை அடிப்படையாகக் கொண்டுதான் இலங்கை அரசின் மீதும், அரச அதிகாரிகள் மீதும் யுத்தக்குற்ற விசாரணைகள் நடத்தப்படவேண்டும் என சர்வதேச மன்னிப்புச் சபை கோரிக்கை விடுத்துள்ளது. ஐ.நா. விசேட பிரதிநிதியும் அதனை வழிமொழிந்துள்ளார்.