ஆந்திராவில் காங்கிரசை உதறிய ஜெகன்மோகன் ரெட்டிக்கு சிக்கல்

ஆந்திராவில் மறைந்த முன்னாள் முதல்வர் ராஜசேகர ரெட்டியின் மகன் ஜெகன்மோகன் ரெட்டி காங்கிரஸ் கட்சியிலிருந்து விலகினாலும், அவரது சித்தப்பா உள்ளிட்டோர் தொடர்ந்து காங்கிரஸ் கட்சிக்கு ஆதரவளிப்பதால், புதிய கட்சி துவக்குவதில் ஜெகன்மோகனுக்கு சிக்கல் ஏற்பட்டுள்ளது.

இரங்கல் யாத்திரை என்ற பெயரில் கட்சிக்கு எதிராக செயல்பட்டு வந்ததால், இந்த யாத்திரையை மேற்கொள்ள, கட்சி மேலிடம் தடை விதித்தது. இந்த தடையை மீறி ஜெகன்மோகன் யாத்திரை நடத்தி வந்தார்.இந்நிலையில், கடந்த வாரம் முதல்வர் ரோசய்யா தனது பதவியை ராஜினாமா செய்தார். ஜெகன்மோகனுக்கு பாடம் கற்பிக்கும் வகையில் கட்சி மேலிடம், சபாநாயகராக இருந்த கிரண்குமார் ரெட்டியை முதல்வராக்கியது. இதற்கிடையே, ராஜசேகர ரெட்டியின் இளைய சகோதரர் விவேகானந்தா ரெட்டி, டில்லி சென்று சோனியா உள்ளிட்ட மேலிட தலைவர்களை சந்தித்து அமைச்சர் பதவிக்காக பேசினார். இந்த சம்பவங்களால் கொதிப்படைந்த ஜெகன்மோகன் ரெட்டி, காங்கிரஸ் கட்சியிலிருந்து விலகினார்; கடப்பா தொகுதி எம்.பி., பதவியையும் ராஜினாமா செய்தார். இவருக்கு ஆதரவாக இவரது தாய் விஜயலட்சுமியும் புலிவெந்துலா சட்டசபை தொகுதி எம்.எல்.ஏ., பதவியை ராஜினாமா செய்தார்.கட்சியிலிருந்து விலகிய ஜெகன்மோகன், "அரசியல்' என்ற பெயரில் தனது குடும்பத்தை பிளவுபடுத்த சூழ்ச்சி செய்வதாக சோனியாவுக்கு காரசாரமாக கடிதம் எழுதினார்.ஆந்திர மாநிலத்தின் செல்வாக்கு பெற்ற தலைவரின் மகன் காங்கிரஸ் கட்சியிலிருந்து விலகியதால், கட்சி பிளவுபடும் அபாயம் ஏற்பட்டுள்ளது. ஜெகன்மோகனுக்கு ஆதரவாக 36 எம்.எல்.ஏ.,க்கள் உள்ளனர்.

இது குறித்து மாநில காங்கிரஸ் தலைவர் சீனிவாஸ் குறிப்பிடுகையில், "ஜெகன்மோகன், காங்கிரஸ் கட்சியிலிருந்து விலகியதால் கட்சிக்கு எந்த பாதிப்பும் ஏற்படவில்லை. எனினும், கட்சியின் எம்.எல்.ஏ., மற்றும் எம்.எல்.சி.,க்களின் செயல்பாடுகளை கவனித்து வருகிறோம்' என்றார். வேறு சில காங்கிரஸ் எம்.எல்.ஏ.,க்களும், "முதல்வர் பதவி ஒன்றும் குடும்பச் சொத்தல்ல' என்று ஜெகனுக்கு எதிர்ப்பு தெரிவித்தனர்.

ஆனால், ராஜசேகர ரெட்டியின் சமாதியில் நேற்று ஜெகன்மோகன் ரெட்டியும், அவரது ஆதரவாளர்களும், குடும்பத்தினரும் மலரஞ்சலி செலுத்தினர். ராஜசேகர ரெட்டியின் இளைய சகோதரர் விவேகானந்தா ரெட்டியும், சமாதிக்கு வந்து அஞ்சலி செலுத்தினார். ஒரு சில நிமிடங்கள் அவர், ஜெகன்மோகனிடம் பேசினார்.

பின்னர் நிருபர்களிடம் விவேகானந்தா ரெட்டி கூறியதாவது:நான் இன்னும் காங்கிரஸ் கட்சியின் தொண்டனாகத் தான் இருக்கிறேன்; தொடர்ந்து இருப்பேன். டில்லிக்கு சென்று சோனியாவை நான் என்னுடைய விருப்பத்தின் பேரில் தான் சந்தித்து பேசினேன். இதனால், தற்போது ஏற்பட்ட பிரச்னைக்காக மன்னிப்பு கேட்டுக் கொள்கிறேன். சோனியா, எங்கள் குடும்பத்தை பிளவுபடுத்த முயற்சிப்பதாக ஜெகன்மோகன் எழுதியுள்ள கடிதத்தில் உண்மையில்லை.சோனியா, பிரதமர் பதவியையே தியாகம் செய்தவர். காங்கிரஸ் கட்சியில் உள்ள அனைவரையும் அரவணைத்து செல்கிறார். ஜெகன்மோகனை கூட தன் குழந்தையாகத் தான் அவர் கருதினார். ஆனால், ஜெகன்மோகன் தான் அவசரப்பட்டு கட்சியிலிருந்து விலகியுள்ளார். தொடர்ந்து காங்கிரஸ் கட்சிக்காக பாடுபடுவேன்.என்னுடைய சகோதரர் மறைந்த ராஜசேகர ரெட்டிக்கு, மாநில காங்கிரஸ் தலைவர் பதவியையும், முதல்வர் பதவியையும் அளித்தவர் சோனியா தான். எனவே, கட்சி மேலிடம் உத்தரவிட்டால், புலிவெந்துலா தொகுதியில் சுயேச்சையாக போட்டியிட திட்டமிட்டுள்ள ஜெகன்மோகனை எதிர்த்து, காங்கிரஸ் கட்சி சார்பில் போட்டியிட தயாராக உள்ளேன்.இவ்வாறு விவேகானந்தா ரெட்டி கூறினார்.

ஜெகன்மோகன் கட்சியிலிருந்து விலக, காங்கிரஸ் மேலிடம் காரணமாக இருந்ததாகக் கூறி சில இடங்களில் நேரு சிலை அவமதிக்கப்பட்டது; சோனியாவின் உருவ பொம்மைகள் எரிக்கப்பட்டன. இது போன்ற செயல்களை தவிர்க்கும்படி ஜெகன்மோகன், தனது ஆதரவாளர்களை கேட்டுக் கொண்டுள்ளார்.

சிக்கல்: ராஜசேகர ரெட்டியின் ஒன்று விட்ட சகோதரர் சுப்பா ரெட்டி, ஜெகன்மோகனுக்கு பக்கபலமாக இருக்கிறார். இருப்பினும் அவர் அரசியலில் இல்லை; வர்த்தகம் செய்கிறார். கட்சியிலிருந்து விலகியதும் தன்னுடன் தன் சித்தப்பா விவேகானந்தா ரெட்டியும் ராஜினாமா செய்வார் என, ஜெகன்மோகன் எதிர்பார்த்தார்.ஆனால், விவேகானந்தா ரெட்டி காங்கிரஸ் கட்சிக்கு விசுவாசமாக இருப்பதால், தன் தந்தை பெயரில் தனி கட்சி துவக்க திட்டமிட்டுள்ள ஜெகன்மோகனுக்கு சிக்கல் ஏற்பட்டுள்ளது. ராஜசேகர ரெட்டியின் சகோதரர் என்ற முறையில் ஜெகன்மோகனின் விசுவாசிகள், விவேகானந்தா ரெட்டியின் பக்கம் சாயக்கூடும் என எதிர்பார்க்கப்படுகிறது.

தினமலர்!

சிறு பிள்ளை வெள்ளாமை வீடு பொய் சேராது என்பார்கள் ,,,,அந்த நிலைதான் இப்போ ஜெகன் மோகனுக்கும் ,,ஜெகனுக்கு அவங்க அப்பான்னு நினைப்பு போல