வாலிப வயதை தாண்டினால் மைனாவும் கதைக்காதாம்

by kirupairajah Mon Aug 17, 2009 9:48 am

ராமேஸ்வரம் மீனவ குடும்பத்தில் வளர்க்கப்படும் மைனா மழலைத் தமிழ் பேசி அசத்துகிறது. வீடுகளில் ஆடு, மாடு, நாய், கிளி, புறாக்கள் வளர்ப்பதை கேள்விப்பட்டிருக்கிறோம்.

அதுபோல வளர்க்கப்பட்ட மைனா ஒன்று, கிளிப்பிள்ளை போல் குழந்தைகளுடன் மழலைத் தமிழ் பேசுகிறது. ராமேஸ்வரம் சேரான்கோட்டையை சேர்ந்தவர் அமராவதி.

இவர் வீட்டுக்கு 2 ஆண்டுக்கு முன்பு அழையா விருந்தாளியாக வந்ததுமைனா குஞ்சு.

விரட்டினாலும் போக மறுத்த மைனாவுக்கு உணவு கொடுத்தார் அமராவதி. காலப்போக்கில் மைனா அந்த மீனவ குடும்பத்தின் ஒரு உறுப்பினராகவே மாறிவிட்டது. அதற்கு மல்லிகா என பெயரிட்டு குழந்தைகளோடு, குழந்தையாக வளர்த்து வந்தனர்.

இப்போது மைனா குழந்தைகளோடு மழலைத் தமிழ் பேசுகிறது. அம்மா, அப்பா, அக்கா, மாமா என்ற வார்த்தைகளை மழலைத் தமிழில் பேசுகிறது. என்ன உச்சரித்தாலும் பதிலுக்கு அதை அப்படியே சொல்கிறது.

இந்த விளையாட்டுகளெல்லாம் குழந்தைகள் மற்றும் தன்னை வளர்க்கும் அமராவதியோடு மட்டும்தான்.

இந்த மைனாவோடு கொஞ்சி பேசுவதற்கு அப்பகுதி குழந்தைகள் நாள்தோறும் முற்றுகையிடுவது வழக்கமாகி விட்டது. வாலிப வயதை தாண்டி வெளிநபர்கள் யார் வந்தாலும் மைனா மல்லிகா பேசுவதில்லையாம்.

இதுகுறித்து அமராவதி கூறுகையில், மைனா எனது குழந்தைகளோடு கொஞ்சி விளையாடுகிறது. எங்கு சென்றாலும் அரை மணி நேரத்தில் அதுவாகவே வந்துவிடும். மைனா வந்த பிறகு எனது குடும்பத்தில் மகிழ்ச்சி அதிகரித்துள்ளதுÕ என்றார்.