பழமொழிகளும் விளக்கங்களும்!

by **சிவா** Wed Nov 24, 2010 10:30 am

இந்தப் பகுதியில் இன்று மருவியுள்ள பல பழமொழிகளின் உண்மையான அர்த்தம் என்ன என்பதைத் தெரிந்தவர்கள் எழுதலாம்!

சோழியன் குடுமி சும்மா ஆடாது

சோழியன் குடுமி சும்மாடு ஆகாது என்பதுதான் இந்த பழமொழியின் சரியான வடிவம். சோழ நாட்டை சார்ந்த ஆண்கள் முற்காலத்தில் தலையின் முன்புறம் குடுமி வைத்திருப்பார்கள்.பாரம் தூக்கும்போது பெண்கள் தம் சீலையை சுற்றி தலை மீது வைத்து அதன் மேல் பாரம் வைத்துக் கொள்வார்கள் .இதற்கு சும்மாடு என்று பெயர்.( பிரம்பு, கோரைகளை கொண்ட சேலை சுற்றிய பொருளும் சும்மாடு என்பதில் அடங்கும் ) . ஆனால் முன்புறம் குடுமி வைத்த சோழ நாட்டவர் தங்களது முன்புற குடுமியை சும்மாடு ஆக பயன்படுத்த முடியாது.ஆகவேதான் அதை குறிக்க சோழியன் குடுமி சும்மாடு ஆகாது என்று வந்த சொல் வழக்கு இன்று வேறாகி திரிந்து விட்டது.

by **ராஜா** Wed Nov 24, 2010 10:32 am

நன்றி தல ,

by **சிவா** Wed Nov 24, 2010 10:33 am

கொலையும் செய்வாள் பத்தினி

கொலையும் செய்வாள் பத்தினி யென்றால் சகல குணங்களும் பொருந்திய ஒரு பெண்,ஏழ்மை நிலையில் உள்ள ஒருவனை மணமுடித்தாளேயானால் அவள் தன் கணவன் நிலையை உணர்ந்து,குடும்ப சூழ்நிலையை உணர்ந்து அக்குடுப்பத்தில் உள்ள ஏழ்மையும்,வறுமையும்,கொலை செய்வாள் என்று பொருள் கொள்ள வேண்டும். கொலையும் செய்வாள் பத்தினி என்று பெண்களை துன்புறுத்தி ஏசக்குடாது.அவள் அடி எடுத்து வைத்த குடும்பத்தை எல்லா வழிகலிலும் உயர்த்தி காட்டுவாள். ஏழ்மையும்,வறுமையும்,கல்லாமை,இல்லாமை இவற்றை கொலை செய்வாள் என்று அர்த்தம்.

by **சிவா** Wed Nov 24, 2010 10:38 am

ஆயிரம் பேரைக் கொன்றவன் அரை வைத்தியன்!

இந்தப் பழமொழியை அப்படியே பார்த்தால் ஆயிரம் பேரைக் கொன்றால்தான் அவன் அரை வைத்தியன் என்று பொருள்படும்! அதற்காக செல்பவர்களை எல்லாம் கொன்றால் அவர் மருத்துவரா? அடுத்து யாராவது அந்தப் பக்கம் செல்வார்களா? கொலைகாரன் என்று ஜெயிலில் தள்ளி விடுவார்கள்!

இதன் உண்மையான அர்த்தம் “ஆயிரம் வேரைக் கொண்டவன் அரை வைத்தியன்” என்பதாகும். அந்தக் காலத்தில் சித்த மருத்துவம் தானே! அதற்குத் தேவை மூலிகைகள், அந்த மூலிகைகளில் ஆயிரம் வரை அறிந்தவன் தான் அரை வைத்தியன் என்று பொருள்!

by **சிவா** Wed Nov 24, 2010 10:43 am

இங்கு உள்ள பழமொழி விளக்கங்களில் தவறு இருந்தால் அறிந்தவர்கள் சுட்டிக் காட்ட வேண்டுகிறேன்!

by **ராஜா** Wed Nov 24, 2010 10:45 am

சிவா wrote:ஆயிரம் பேரைக் கொன்றவன் அரை வைத்தியன்!

மிகசிறந்த விளக்கம் , பழமொழிகளும் விளக்கங்களும்! 678642

by **சிவா** Wed Nov 24, 2010 10:55 am

ஆயிரம் பொய் சொல்லியாவது ஒரு கல்யாணம் செய்

இந்த பழமொழியை மக்கள் தங்களின் தேவையை (பொய் சொல்லித் திருமணம் செய்தல்) நிறைவேற்றிக் கொள்வதற்காக பழமொழியையும் மாறிக் கொண்டுவிட்டார்கள்.

இதன் உண்மையான அர்த்தம் “ஆயிரம் முறையாவது போய் சொல்லி ஒரு திருமணத்தை நடத்து” என்பதாகும்!

by **சிவா** Wed Nov 24, 2010 11:01 am

ஊரான் பிள்ளையை ஊட்டி வளர்த்தால் தன் பிள்ளை தானே வளரும்.

மற்றவர்களின் பிள்ளையை ஊட்டி வளர்த்தால் அதைப் பார்த்து நம் பிள்ளை வளராது, ஏங்கிப் போகும்!

இதன் உண்மையான பொருள்: ஊரான் பிள்ளை என்றால், இன்னொருவர் மகளாகிய, பிள்ளையாகிய உன் மனைவியை (கருவுற்றிருக்கும் பொழுது மட்டும்) ஊட்டி வளர்த்தால், தன் பிள்ளை, அவள் வயிற்றில் இருக்கும் உன் பிள்ளை (Fetus) தானாக வளரும் ஆகும்.

by **சிவா** Wed Nov 24, 2010 11:12 am

மண் குதிரையை நம்பி ஆற்றில் இறங்கலாமா?

இந்தப் பழமொழிக்கும், குதிரைக்கும் எந்தத் தொடர்பும் இல்லை. குதிர் என்பதே சரி! குதிரை அல்ல!

மண் குதிரை நம்பி ஆற்றில் இறங்கலாமா?

இந்தப் பழமொழி மண் குதிரை நம்பி ஆற்றில் இறங்காதே. குதிர் என்பது ஆற்றின் நடுவே தோன்றும் திட்டு, அதன் இரண்டாம் வேற்றுமை குதிரை, குதிரையை என்பது தவறும் மண் குதிரை நிலத்திலும் நடவாது!

விளக்கம்: நந்திதா