அதிசயத் தீவில் அபூர்வ புதையல்...

by **சிவா** Wed Nov 17, 2010 10:36 pm

கலாபாகோஸ் தீவுகள் உங்களுக்கு நினைவிருக்கிறதா? `மனிதன் குரங்கில் இருந்து வந்தவன்' என்று விஞ்ஞானி டார்வின் அறிவிப்பதற்கு, அடிப்படை ஆதாரங்களை இந்தத் தீவில்தான் கண்டுபிடித்தார். ஆமாம் இந்த அதிசயத் தீவில் தற்போது மேலும் ஒரு அபூர்வ, அதிர்ச்சிப் புதையல் கிடைத்துள்ளது.

ஈகுவடார் நாட்டின் கட்டுப்பாட்டில் இருக்கும் தீவுக் கூட்டம்தான் இது. இதில் பார்தலோம் தீவு என்றொரு குட்டித் தீவு இருக்கிறது. இந்தத் தீவிற்கு சில சுற்றுலாப் பயணிகளை ஏற்றிக் கொண்டு ஒரு மீனவர் சென்றார்.

அவர்கள் தீவில் காலடி வைத்ததும் ஏதோ பெரிய மீன்கள் கரை ஒதுங்கிக் கிடந்ததுபோல் தெரிந்தது. சுற்றுலாப் பயணிகளும், அவரும் ஆர்வத்தோடு ஓடிச் சென்று அவற்றை சூழ்ந்து கொண்டனர். அப்போதுதான் அது வெடி குண்டுகள் என்று தெரியவந்தது.

உடனே போலீசாருக்கு தகவல் தெரிவிக்க, சோதனை நடத்தப்பட்டதில் ஒரு டஜன் (12) குண்டுகள் புதையல் போல இருப்பது கண்டுபிடிக்கப்பட்டது. ஆள் நடமாட்டம் இல்லாத தீவில் ராட்சத குண்டுகளை பதுக்கியது யார் என்று விசாரித்தபோது அவை இரண்டாம் உலகப்போரில் அமெரிக்காவால் பயன்படுத்தப்பட்ட குண்டுகள் என்று தெரியவந்தது.

70 ஆண்டுகளாக வெடிக்காமல் இருந்தாலும், அவை சக்தியை இழக்காமல் இருந்ததுதான் இதில் கவனிக்கத்தக்கது.