பிழை

by யாதுமானவள் Sat Nov 13, 2010 11:45 am

பிழை

தென்னங்கீற்று என்னை
சுகமாகத் தீண்டவில்லை
சின்னக் குயிலோசை என்
செவிநாளம் வருடவில்லை

பச்சைப் பசுமரங்கள் என்
பார்வையில் படவில்லை
பழங்கதைகள் நான் பேச
பக்கத்தில் யாருமில்லை

காகம் கழுதை என்
கண்ணில் பட்டதில்லை
கற்பூரம் கொளுத்தி வைக்க ஒரு
கோவிலும் இங்கு இல்லை

துள்ளும் மீனினங்கள்
தடாகத்தில் கண்டதுவும்
தாவும் வானரங்கள்
ஆரணத்தில் அலைந்ததுவும்
பார்த்த நியாபகங்கள்
பத்திரமாய் வைத்துள்ளேன்

தெருவோர சண்டைகளும்
திருவிழா கூச்சல்களும்
தெருக்கூத்து வசனமும்
தெம்மாங்கு பாடல்களும்
தொலைந்து போனதுபோல
தொடர்ந்து வரும் ஏக்கங்கள்

வருமானம் தேடி நான்
வளைகுடா வந்த பின்
சுகமான புல்வெளியில்
பதியாத தடங்களாய்

வெளிநாட்டு நாட்களெல்லாம்
என் வாழ்க்கை வங்கியில்
செலவாகிப் போகிறது
சொச்சமின்றி அழிகிறது

பொடியான பாலும்
பதம் செய்த பழங்களும்
என்றோ உயிர் விட்டு
இன்று வறுத்த கோழியும்

புரியாத வாழ்க்கை தான்
தெரியாத தேடல் தான்

வியர்வை அத்தனையும்
வங்கியில் கனக்கிறது
வேதனை மட்டுமென்
நெஞ்சினில் நிலைக்கிறது

ஈட்டுகின்ற பொருள்களெல்லாம்
என்ன செய்வேன் தெரியவில்லை
சேர்த்து வைக்கும் சொத்தெல்லாம்
செலவு செய்ய வழியுமில்லை

அதிகபட்சம் ஐந்தாயிரம்
அம்மாவுக்கு அனுப்புகிறேன்
அவள் வாழுகின்ற முதியோர் இல்லம்
அதற்கு மேல் கேட்பதில்லை

அர்த்தமில்லா வாழ்க்கையின்
அடித்தளத்தில் நின்று கொண்டு
என் நிலையில் இங்குள்ள
எல்லோரையும் கேட்கின்றேன்
பிழைப்புத் தேடி நாம்
பிழை செய்து விட்டோமா?

- யாதுமானவள் yaadhumaanaval@gmail .com

by ayyaasamy Sat Nov 13, 2010 12:03 pm

அருமையான தவிப்பு. இதேபோல் தொலைக்காட்சியைப்பற்றி யாரோ எழுதிய ஒன்றினை சொல்லியே ஆகா வேண்டும்.

அம்மாவின் மடியிலே படுத்துறங்கி
அப்பாவின் தோள்களிலே விளையாடி
தாத்தா பாட்டியிடம் கதை கேட்ட காலங்கள்...?
வீட்டிலே தொ(ல்)லைக்காட்சி.

எழுதியது யார் என்பது தெரியாது. ஆனால் உண்மை.....

by கலைவேந்தன் Sat Nov 13, 2010 2:46 pm

புலம்பெயர்ந்து பொருள்தேடச்செல்லும் அனைவருடைய ஆதங்கமும் இதுதான்.. அந்த ஆழ்மன வருத்தங்கள் அழகுற இயம்பப்பட்டுள்ளன..

வாழ்த்துகளும் பாராட்டுக்களும் யாதுமானவள்..!