வரும்... ஆனா, வராது... கூட்டுறவு சங்க தேர்தல் காமெடி

சென்னை : ""வரும்... ஆனா, வராது... என்ற காமெடி போல கூட்டுறவு சங்கங்களுக்கான தேர்தல் உள்ளது,'' என, பொள்ளாச்சி ஜெயராமன் தெரிவித்தார். பல்வேறு சட்டதிருத்த மசோதாக்கள் ஆய்வுக்கு சட்டசபையில் எடுத்துக் கொள்ளப்பட்ட போது நடந்த விவாதம்: ரவிச்சந்திரன் - அ.தி.மு.க: பதவி காலத்தில் எம்.எல்.ஏ., இறந்தால் அவரது குடும்பத்துக்கு ஒரு லட்ச ரூபாய் வழங்குவதை, இரண்டு லட்ச ரூபாயாக உயர்த்தி வழங்க சட்ட திருத்த மசோதா கொண்டு வரப்பட்டுள்ளது.

ஏற்கனவே எம்.எல்.ஏ.,க்களுக்கு சம்பளம் வழங்கப்படுவது போல, முன்னாள் எம்.எல்.ஏ.,க்களுக்கு பென்ஷன் வழங்கப்படுகிறது. அதேபோல, மருத்துவ வசதிகளும் வழங்கப்படுகின்றன. எனவே, முன்னாள் எம்.எல்.ஏ.,க்கள் இறந்தாலும் ஒரு தொகையை வழங்குவது தான் சரியாக இருக்கும்.

நிதியமைச்சர் அன்பழகன்: இவ்விஷயத்தில் வேறு விதமாக தீர்மானிக்க இடமில்லை.

கே.பி.அன்பழகன் - அ.தி.மு.க: நகராட்சிகளில் சொத்துக்களின் மாற்றத்தின் போது வசூலிக்கப்படும் முத்திரைத் தீர்வை மீதான மேல்வரியில், 50 சதவீதம் தமிழ்நாடு நகர்புற சாலை மேம்பாட்டு திட்டத்துக்கு ஒதுக்கப்படுகிறது. இதேபோல, பேரூராட்சிகளில் நடக்கும் சொத்து பரிமாற்றங்களுக்கும், மேல்வரியில் 50 சதவீதத்தை சாலை மேம்பாட்டுத் திட்டத்துக்கு ஒதுக்க அவசர சட்டம் கொண்டு வந்தது தவறு. இதனால், பேரூராட்சி பகுதியில் வளர்ச்சி பாதிக்கும்.

துணை முதல்வர் ஸ்டாலின்: சொத்துக்கள் உரிமையை பிறருக்கு மாற்றும் போது, பதிவுத் துறை 8 சதவீத முத்திரைத் தீர்வை, 1 சதவீத பதிவுக் கட்டணம் வசூலிக்கப்படுகிறது. இந்த 8 சதவீத முத்திரைத் தீர்வையில் 2 சதவீதம், அந்த சொத்து உள்ள உள்ளாட்சி அமைப்புகளுக்கு அளிக்கப்படுகிறது.

இது முத்திரைத் தீர்வை மீதான மேல்வரியாக கருதப்படுகிறது. இந்த மேல்வரியில் 50 சதவீதத்தை நகர்புற பேரூராட்சிகளுக்கும் கொடுத்து, அதை அந்த பேரூராட்சி மேல்வரியில் வரவு வைக்க சட்டம் கொண்டு வரப்பட்டுள்ளது. இதன் மூலம், பேரூராட்சி பகுதிகளும் நகர்புற சாலை மேம்பாட்டு திட்டத்தில் பயனடையவே இச்சட்டம் கொண்டு வரப்பட்டுள்ளது.

பொள்ளாச்சி ஜெயராமன் - அ.தி.மு.க: "நடக்கும் என்பார் நடக்காது; நடக்காது என்பார் நடந்துவிடும்' என்ற கண்ணதாசன் பாடல் போல கூட்டுறவு சங்கங்களுக்கான தேர்தல் நடத்துவது உள்ளது. ஒவ்வொரு ஆறு மாதத்துக்கு ஒரு முறையும், கூட்டுறவு சங்கங்களின் தனி அலுவலர்களது பதவிக் காலத்தை நீட்டிக்க மசோதா நிறைவேற்றப்படுகிறது. வடிவேலு காமெடி போல, "வரும்... ஆனா, வராது...' என்பது போல உள்ளது. எப்ப தான் தேர்தல் வரும். கூட்டுறவு சங்கங்கள் பயனடைய விரைவில் தேர்தல் நடத்த வேண்டும்.

அமைச்சர் கே.என்.நேரு: ஐந்து ஆண்டுகளாக கூட்டுறவு அமைச்சராக இருந்தவர் நீங்கள். கடந்த 1977ல் எம்.ஜி.ஆர்., தலைமையில் வந்த அ.தி.மு.க., ஆட்சி 1987 வரை 10 ஆண்டுகள் நீடித்தது. அதன்பிறகு, ஜெயலலிதா 10 ஆண்டுகள் ஆட்சி செய்துள்ளார். இந்த 20 ஆண்டுகளில் கூட்டுறவு சங்க தேர்தல் பற்றி சிந்தித்துள்ளீர்களா? வேறு யாராவது இது பற்றி கேட்கலாம். நீங்கள் கேட்கக் கூடாது.

ஞானசேகரன் - காங்கிரஸ்: கூட்டுறவு சங்கங்களுக்கு தேர்தல் நடத்தப்படாததால், தனி அலுவலர்களால் சில முடிவுகளை எடுக்க முடியாமல் திணறும் நிலை உள்ளது. கூட்டுறவு சங்கங்களில் பணியாளர்களுக்கு சம்பளம் கொடுக்க முடியவில்லை. தொடக்க வேளாண்மை கூட்டுறவு சங்க பணியாளர்கள், மத்திய கூட்டுறவு சங்கங்களுக்கு எடுக்கப்பட்டு பணிபுரிகின்றனர். ஆனால், அவர்களை நிரந்தரம் செய்ய முடியவில்லை.

நன்மாறன் - மார்க்சிஸ்ட்: கூட்டுறவு சங்கங்களுக்கு தேர்தல் நடத்துவது கூட்டு உறவுக்கு நல்லது. அது நடக்காததால் தவறான செயலுக்கு ஆட்படுத்தப்படுகிறது. எனவே, விரைவில் தேர்தல் நடத்த வேண்டும்.

நிதியமைச்சர் அன்பழகன்: கூட்டுறவு சங்கங்களுக்கு தேர்தல் நடத்துவது என்ற ஒரே நோக்கத்தில் தான் இந்த அரசு உள்ளது. ஆனால், சட்டப் பிரச்னை குறுக்கிடுகிறது. புதிய உறுப்பினர்களை சேர்க்க தடை உள்ளது. ஏற்கனவே உள்ள உறுப்பினர்களை கொண்டு தேர்தல் நடத்தவும் தடை உள்ளது. இதை எல்லாம் நீக்கி எவ்வளவு விரைவில் தேர்தல் நடத்த முடியுமோ அவ்வளவு விரைவில் நடத்த ஆசை உள்ளது.

செ.ம.வேலுசாமி - அ.தி.மு.க: கூட்டுறவு சங்கத் தேர்தலை ரத்து செய்து, முறையாக தேர்தல் நடத்த அனைத்து கட்சிகளுடன் ஆய்வு செய்து முடிவெடுக்கப்படுமென அறிவித்தீர்கள். முறையாக தேர்தல் என அறிவித்துவிட்டு, தற்போது கோர்ட் வழக்கு என சொல்கிறீர்கள்.

அமைச்சர் எ.வ.வேலு: சுப்ரீம் கோர்ட்டில் வழக்கு நிலுவையில் உள்ளது. அந்த வழக்கு முடிந்தால் தான் தேர்தல் நடத்த முடியும். இவ்வாறு விவாதம் நடந்தது. இவை தொடர்பான மசோதாக்கள், குரல் ஓட்டெடுப்பு மூலம் நிறைவேற்றப்பட்டன.

தினமலர்!