பாகிஸ்தானில் காய்கறி தட்டுப்பாடு: இந்தியாவில் இருந்து இறக்குமதி

by **சிவா** Fri 12 Nov 2010 - 9:14

இஸ்லாமாபாத்:இந்தியா உள்ளிட்ட அண்டை நாடுகளிலிருந்து, காய்கறிகளை இறக்குமதி செய்ய பாகிஸ்தான் அரசு முடிவு செய்துள்ளது.கடந்த ஜூலை மாதம், பாகிஸ்தானில் வரலாறு காணாத வெள்ளப்பெருக்கு ஏற்பட்டது. இதில், ஆயிரக்கணக்கான ஏக்கர் விவசாய நிலங்கள் தண்ணீரில் மூழ்கி கடும் பாதிப்பு ஏற்பட்டது. தவிர, காய்கறி விளைச்சலும் பாதிக்கப்பட்டு, அங்கு கடும் தட்டுப்பாடு ஏற்பட்டுள்ளது. இதனால் காய்கறிகளின் விலைகள் தாறுமாறாக எகிறி உள்ளன.

இந்த நிலையில், காய்கறிகள் தட்டுப்பாட்டை போக்குவதற்கு,அந்நாட்டு அரசு அதிரடி நடவடிக்கை மேற்கொண்டுள்ளது. இந்தியா உள்ளிட்ட அண்டை நாடுகளிலிருந்து காய்கறிகளை இறக்குமதி செய்ய, பாகிஸ்தான் வர்த்தக அமைச்சகம் அளித்த பரிந்துரையை அந்நாட்டு அரசு ஏற்றுக்கொண்டுள்ளது. இதையடுத்து, வாகா எல்லை வழியாக இந்தியாவிலிருந்து கேரட், காலி பிளவர், வெண்டைக்காய், முட்டைக்கோஸ், முள்ளங்கி, குடை மிளகாய், பச்சை மிளகாய் மற்றும் இஞ்சி ஆகியவற்றை இறக்குமதி செய்ய அனுமதி வழங்கப்படும் என வர்த்தக அமைச்சகம் நேற்று வெளியிட்ட அறிவிப்பில் தெரிவிக்கப்பட்டுள்ளது. இந்தியாவிலிருந்து காய்கறிகளை இறக்குமதி செய்வதற்கான உரிமம் பெறுவதற்காக, பாகிஸ்தானை சேர்ந்த 42 மொத்த வணிகர்கள், அந்நாட்டு வர்த்தக அமைச்சகத்தை அணுகி உள்ளதாக தகவல்கள் தெரிவிக்கின்றன.

தினமலர்!