மனம் மாறினாலும் ஹைதர் பாகிஸ்தான் அணிக்கு திரும்ப முடியாது

தனது ஓய்வு முடிவில் இருந்து ஹைதர் மனம் மாறிலும் பாகிஸ்தான் கிரிக்கெட் அணிக்கு இனி திரும்ப முடியாது என்று தெரிகிறது.

மனைவி வற்புறுத்தல்

சூதாட்ட புரோக்கர்களின் மிரட்டலுக்கு பயந்து சர்வதேச கிரிக்கெட்டில் இருந்து ஓய்வு பெறுவதாக பாகிஸ்தான் வீரர் ஜுல்கர்னைன் ஹைதர் அறிவித்தது, அவரது குடும்பத்தினருக்கு மகிழ்ச்சியை அளிக்கவில்லை. மிரட்டலுக்கு பயப்படாமல் அவர் மீண்டும் அணியுடன் இணைய வேண்டும் என்று விரும்புகிறார்கள்.

லாகூரில் உள்ள அவரது மனைவி பத்திரிகை ஒன்றுக்கு அளித்த பேட்டியில், `ஒட்டு மொத்த குடும்பத்தினரும் அவரிடம் பேசினோம். மீண்டும் துபாய் சென்று அணியுடன் இணையும்படியும், எந்தவித சூழ்நிலையையும் தைரியமாக சந்திக்க வேண்டும் என்றும் அவரை 4 மணி நேரம் சமாதானப்படுத்தினோம்' என்றார். இங்கிலாந்தில் தஞ்சமடைவீர்களா? என்று கேட்ட போது, `வாழ்வோ, சாவோ அது பாகிஸ்தானிலேயே எனக்கு நடக்க வேண்டும். வேறும் எங்கும் செல்ல எனக்கு விருப்பமில்லை' என்றும் கூறினார்.

ஹைதரின் தந்தை ஹைதர் ராஸா கூறும் போது, `எல்லோருக்கும் சாவு ஒரு நாள் உறுதி. எனவே மிரட்டலை கண்டு பயப்படக்கூடாது என்று ஹைதரிடம் கூறினேன்' என்றார்.

உத்தரவாதம் கிடைத்தால்...

குடும்பத்தினர் வற்புறுத்திய பிறகு ஹைதர் கொஞ்சம் மனம் இறங்கி வந்திருக்கிறார். `நான் மற்றும் எனது குடும்பத்தினரின் பாதுகாப்புக்கு பாகிஸ்தான் அரசு உத்தரவாதம் அளித்தால் பாகிஸ்தானுக்கு திரும்ப தயார். அத்துடன் பாகிஸ்தான் கிரிக்கெட் வாரியம் விரும்பினால், நான் மீண்டும் பாகிஸ்தான் அணிக்காக விளையாடுவதில் எந்த பிரச்சினையும் இல்லை' என்றார்.

ஆனால் கிரிக்கெட் வட்டாரத்தில் சலசலப்பை உருவாக்கி இருக்கும் ஹைதரை சமாதானப்படுத்தி அணியில் சேர்த்துக் கொள்ளும் எண்ணத்தில் பாகிஸ்தான் கிரிக்கெட் வாரியமும் இல்லை.

மீண்டும் இடம் இல்லை

பாகிஸ்தான் அணியின் முன்னாள் கேப்டனும், பாகிஸ்தான் கிரிக்கெட் வாரியத்தின் தலைமை செயல் அலுவலருமான ரமீஸ் ராசா கூறுகையில், `பாகிஸ்தானுக்கு அவர் ஆடிய கடைசி போட்டி (தென்ஆப்பிரிக்காவுக்கு எதிரான 4 ஆட்டம்) இது தான். மீண்டும் அணிக்கு திரும்பி விளையாடும்படி அவரை ஊக்கப்படுத்தமாட்டோம். ஏனெனில் இந்த விஷயம் ஒட்டுமொத்தத்தில் தர்மசங்கடத்தை ஏற்படுத்தி விட்டது' என்றார்.

அத்துடன் பாகிஸ்தான் அணியிலும் ஹைதரின் நடவடிக்கை அதிருப்தியை ஏற்படுத்தி இருக்கிறது. பாகிஸ்தான் வீரர் அப்துல் ரசாக் கூறுகையில், `ஹைதர் செய்தது சரி கிடையாது. அவர் மிகப்பெரிய தவறு செய்து விட்டார். எந்த பிரச்சினையாக இருந்திருந்தாலும் அவர் சீனியர் வீரர்களிடமோ அல்லது அணி நிர்வாகத்திடமோ சொல்லி இருக்க வேண்டும். ஹைதர் இளம் மற்றும் வளர்ந்து வரும் வீரர். ஆனால் அவர் இல்லாதது அணியின் எதிர்கால நலனில் எந்த பாதிப்பையும் ஏற்படுத்தாது' என்றார்.

ஹைதர் அணியை விட்டு வெளியேறி லண்டனுக்கு சென்ற விதம் உண்மையிலேயே அவமானகரமான சம்பவம் என்று முன்னாள் கேப்டன் இம்ரான்கான் கருத்து தெரிவித்துள்ளார்.

கண்டிப்பாக அவர் அணியின் நிர்வாகத்தினரிடம் சொல்லி இருக்கலாம் ,,,,,,
கண் கெட்டபிறகு சூர்ய நமஸ்காரம் பண்ணை என்ன பயன் ?