யானைகளின் உருக்கமான காதல் கதை..

by **சிவா** Sun Oct 10, 2010 9:57 pm

காடுகளில் கூட்டமாக வாழும் யானைகளுக்குள் காதல் வந்தது என்றால் அது அதிசயம் இல்லை. இரு வேறு இடத்திலிருந்து ஒரு முகாமுக்குள் கொண்டுவரப்பட்ட ஏராளமான யானைகளில் இரண்டு யானைகள் மட்டும் காதல் செய்து, யாரும் எதிர் பார்க்காத வண்ணம், கர்ப்பமாகி குட்டியும் பிறந்தது என்றால் எல்லோருக்கும் ஆச்சரியம் தானே?!

மேற்கு வங்காளத்தில், ஜல்வைகுரியில் உள்ள துப்ஜோரா முகாமில் நூற்றுக்கணக்கான யானைகள் உள்ளன. அவை அங்கே உள்ள கோருமாரா தேசிய பூங்காவில் கும்கி (பழக்கப்படுத்தப்பட்ட) யானைகளாக பணிபுரிகின்றன. அந்த கூட்டத்திற்குள் இரண்டு யானைகள் மட்டும் கடந்த ஐந்து வருடங்களாக காதலித்து வந்தன.

காதல் ஆண் யானைக்கு சூர்யா என்று பெயர். பெண் யானையின் பெயர் ஆமன். இவை இரண்டும் காதலித்து இனச் சேர்க்கை கொண்டதால் பெண் யானை கர்ப்பமடைந்தது. அப்போதுதான் முகாமில் இருந்த வன ஊழியர்களுக்கே விஷயம் தெரிந்தது. கடந்த செப்டம்பர் மாதம் 3-ம்தேதி பெண் யானை, குட்டியை ஈன்றது. பொதுவாக யானைகளின் கர்ப்ப காலம் 18 மாத காலமாகும். ஆனால் இந்த யானை 23 மாதம் கழித்தே குட்டியை பிரசவித்தது.

இதுகுறித்து துப்ஜோரா முகாமின் அதிகாரி டெப் கூறுகையில், ``இவைகளின் காதலை எங்களால் நம்பவே முடியவில்லை. 2002-ம் ஆண்டில், ஆண் யானையான சூர்யாவுக்கு 16 வயதாக இருக்கும்போது பங்குரா காட்டிலிருந்து பிடித்து இங்கே கொண்டு வந்தோம். அதேபோல், அதே வருடத்தில் 14 வயதான பெண் யானையான ஆமன் யானையை புருல்லியா காட்டிலிருந்து பிடித்து கொண்டு வந்தோம். கோருமாரா மத்திய யானை முகாமில் இரண்டு வருடங்கள் இவை வளர்க்கப் பட்டன. பின்னர் 2005-ம் ஆண்டில் இந்த முகாமுக்கு கொண்டு வரப்பட்டன. அப்போதே இரண்டு யானைகளுக்கும் காதல் உணர்வு வந்திருக்கிறது!

நூற்றுக்கணக்கான யானைகள் உள்ள இந்த முகாமில், இந்த இரண்டு யானைகள் மட்டுமே மிகவும் நெருங்கி, உறவாடியதை நானே பலமுறை பார்த்துள்ளேன். இங்கே மோத்திராணி, சிலாவதி என இரண்டு பெண் யானைகள் உள்ளன. ஆனாலும் சூர்யாவை பார்த்தவுடன் ஆமன் யானைக்கு மட்டும் குஷி பிறந்து விடும். அதன் நடவடிக்கைகளும் மாறிவிடும்.

தினமும் யானைகளை பக்கத்தில் இருக்கும் ஆற்றில் குளிப்பாட்டுவது வழக்கம். அப்படி ஒருமுறை அனைத்து யானைகளையும் குளிப்பாட்ட அழைத்துச் செல்லும்போது சூர்யாவும், ஆமனும் இனச்சேர்க்கை கொண்டதை நாங்கள் பார்த்து விட்டோம்.

இவைகளின் காதல் உணர்வு மிக ஆழமானது என்பதை உணராமல் ஆமன் யானையை மட்டும் இன்னொரு முகாமுக்கு அழைத்துச் சென்றோம். அப்போது அந்த யானையின் செயல்பாடுகள் வித்தியாசமாக இருந்தது. எப்போதும் சோர்வாக உற்சாகமின்றி காணப் பட்டது. சாப்பாட்டை எட்டிக்கூட பார்க்கவில்லை. தூங்காமல் எப்போதும் எதையோ பறி கொடுத்தது போல் சோகமாக இருந்தது. இதனால் அதன் உடல் மெலிந்தது. தோல் சுருக்க நோய் வந்தது. ஆமனுக்கு ஏற்பட்ட பாதிப்பிற்கு ஜோடியை பிரிந்ததுதான் காரணம் என் பதை அறிந்தோம்.

இதே நிலை இனியும் நீடித்தால் பெண் யானை பிடிவாதமாக உயிரை விட்டு விடும் என்று தோன்ற, உடனே சூர்யா யானையை அந்த முகாமுக்கு கொண்டுவர ஏற்பாடு செய்தோம். காதல் கண்ணாளன் சூர்யாவை பார்த்தவுடன், ஆமன் யானையிடம் ஒரு உற்சாகத் துள்ளல். அடுத்த கணமே அதன் நடவடிக்கைகள் மகிழ்ச்சிகரமாக மாறின! கிட்டத்தட்ட ஒரு மாதத்தில் ஆமன் யானையிடம் பெரிய மாற்றம். காதல் கணவனை திரும்பவும் பார்க்க முடிந்த சந்தோஷத்தில் அதன் உடலும் பழைய நிலைக்கு வந்துவிட்டது'' என்றார்.

தற்போது இரண்டு யானைகளும், தங்களது குட்டியோடு சந்தோஷமாக முகாமில் வாழ்க்கையை நடத்திக் கொண்டிருக்கின்றன.

ஞாயிறு மலர்!