இந்தியா & ஆஸ்திரேலிய முதல் டெஸ்ட் இன்று தொடக்கம்

சண்டிகர் : இந்தியா & ஆஸ்திரேலிய அணிகள் மோதும் முதல் டெஸ்ட் போட்டி மொகாலியில் இன்று தொடங்குகிறது. இந்தியா வந்துள்ள ஆஸ்திரேலிய அணி 2 டெஸ்ட் மற்றும் 3 ஒருநாள் போட்டிகளில் விளையாடுகிறது. முதல் டெஸ்ட் போட்டி மொகாலி, பஞ்சாப் கிரிக்கெட் சங்க மைதானத்தில் இன்று தொடங்குகிறது.

சமீபத்திய தொடர்களில் சிறப்பாக விளையாடி வெற்றிகளைக் குவித்து வரும் இந்திய அணி, டெஸ்ட் போட்டிக்கான ஐசிசி தரவரிசையில் நம்பர் 1 இடத்தில் உள்ளது. நட்சத்திர வீரர்கள் கில்கிறிஸ்ட், ஹேடன், மெக்ராத் ஆகியோர் ஓய்வு பெற்றதால் தடுமாறி வரும் ஆஸ்திரேலிய அணி தரவரிசையில் 4வது இடத்துக்கு தள்ளப்பட்டுள்ளது.

தொடக்க வீரர்கள் சேவக், கம்பீர், அனுபவ வீரர்கள் டிராவிட், சச்சின், லஷ்மண், இளம் வீரர் ரெய்னா, கேப்டன் டோனி ஆகியோர் அடங்கிய இந்திய பேட்டிங் வரிசை மிரட்டலாக அமைந்துள்ளது. இவர்களைக் கட்டுப்படுத்துவது ஆஸ்திரேலிய பந்து வீச்சாளர்களுக்கு சவாலாகவே இருக்கும். ஜாகீர், இஷாந்த், ஸ்ரீசாந்த் வேகமும், ஹர்பஜன், மிஷ்ரா, ஓஜா சுழற்பந்து வீச்சும் ஆஸி. பேட்ஸ்மேன்களுக்கு நெருக்கடி கொடுக்கும்.

ஹர்பஜன் சந்தேகம்: தசைப்பிடிப்பால் அவதிப்படும் ஹர்பஜன் சிங் முதல் டெஸ்டில் களமிறங்குவது சந்தேகமாகவே உள்ளது. போட்டி தொடங்குவதற்கு சற்று முன்புதான் அவர் விளையாடுவது பற்றி முடிவு செய்யப்படும். அவர் விளையாடாத பட்சத்தில் மிஷ்ரா அல்லது ஓஜாவுக்கு வாய்ப்பு கிடைக்கும். பான்டிங் தலைமையிலான ஆஸ்திரேலிய அணி இந்த தொடரில் சிறப்பாக விளையாடும் உறுதியுடன் உள்ளது. அடுத்து இங்கிலாந்துடன் ஆஷஸ் டெஸ்ட் தொடரில் மோதவுள்ளதால், இந்திய தொடர் ஆஸி. அணிக்கு மிகவும் முக்கியத்துவம் வாய்ந்ததாக அமைந்துள்ளது.

இந்திய கிரிக்கெட் வாரியத் தலைவர் அணியுடனான பயிற்சி ஆட்டத்தில் ஆஸி. தொடக்க வீரர்கள் ஷேன் வாட்சன், சைமன் கேடிச், மார்கஸ் நார்த் ஆகியோர் அபாரமாக சதம் விளாசினர். வாட்சன் இரண்டு இன்னிங்சிலும் சதமடித்து அசத்தினார். இவர்களுடன் கேப்டன் பான்டிங், துணை கேப்டன் மைக்கேல் கிளார்க், மைக்கேல் ஹஸி ஆகியோரையும் இந்திய பந்து வீச்சாளர்கள் சமாளிக்க வேண்டியிருக்கும். சமபலம் வாய்ந்த அணிகள் மோதும் இந்த தொடர் விறுவிறுப்பாக அமையும் என எதிர்பார்க்கலாம்.

நேரடி ஒளிபரப்பு: நியோ /டிடி.