காமன்வெல்த் போட்டிகளில் ஊழல்: சுப்ரீம் கோர்ட் கண்டனம்

by கார்த்திக் Thu Sep 30, 2010 8:28 am

காமன்வெல்த் விளையாட்டு போட்டி ஏற்பாடுகளில் நடந்துள்ள பெரும் முறைகேடுகள் மற்றும் ஊழலுக்கு சுப்ரீம் கோர்ட்டு கடும் கண்டனம் தெரிவித்தது.

காமன்வெல்த் விளையாட்டு போட்டி ஏற்பாடுகளில் விதிமுறைகள் மீறப்பட்டு இருப்பதாகவும், சரித்திரப் பிரசித்தி பெற்ற மற்றும் தொல்லியல் முக்கியத்துவம் வாய்ந்த ஜந்தர் மந்தர் பகுதியில் 100 மீட்டருக்கும் மேல் உயரமான கட்டிடம் கட்டப்படுவதை எதிர்த்தும் மத்திய அரசின் தொல்லியல் துறை சுப்ரீம் கோர்ட்டில் வழக்கு தொடர்ந்தது.

நீதிபதிகள் சிங்வி மற்றும் கங்குலி ஆகியோர் அடங்கிய பெஞ்ச் முன்பு இந்த வழக்கு 29.09.2010 அன்று விசாரணைக்கு வந்தது.

தொல்லியல் துறை சார்பாக ஆஜரான வழக்கறிஞர், டெல்லியில் சரித்திரப் புகழ் பெற்ற ஜந்தர் மந்தர் பகுதியில் விதிமுறைகளை மீறி உயரமான கட்டிடம் கட்ட டெல்லி மாநில அரசு அனுமதி அளித்தது செல்லாது. அதற்கு தடை விதிக்க வேண்டும் என்றும், விதிமுறைகளை மீறி அனுமதி அளிக்கப்பட்டதில் பெரும் ஊழல் நடந்துள்ளது என்றும் வாதிட்டார்.

இதைக்கேட்ட நீதிபதிகள், காமன்வெல்த் விளையாட்டு போட்டி அமைப்பாளருக்கும், டெல்லி மாநில அரசுக்கும் கடும் கண்டனம் தெரிவித்தனர்.

காமன்வெல்த் விளையாட்டு போட்டிகள் 70 ஆயிரம் கோடி ரூபாய் செலவில் நடத்தப்பட உள்ளன. இதில் மிகப்பெரிய அளவில் ஊழல்கள் நடைபெற்று உள்ளதாக தெரிய வருகிறது. பணிகள் முழுமையாக நடைபெறாமலேயே பணம் பட்டுவாடா செய்யப்பட்டு உள்ளன.

புதிதாக கட்டப்பட்ட பாலம் சீட்டுக்கட்டு போல சரிந்து விழுந்துள்ளது வேதனை அளிக்கிறது. இதற்காக டெல்லி அரசு விதிமுறைகளையும் மீறி உள்ளது. தொல்லியல்துறை முக்கியத்துவம் வாய்ந்த பகுதியில் இப்படி பலவீனமான கட்டிடம் கட்ட டெல்லி அரசு அனுமதி கொடுத்தது ஏன்?

இதுபோன்ற நிகழ்வுகளைக் கண்டு, சுப்ரீம் கோர்ட்டு கண்ணை மூடிக்கொண்டு சும்மா இருக்க முடியாது என, நீதிபதிகள் தெரிவித்தனர்.

நக்கீரன்