மொபைல் போன் அழைப்பு அதிர்வால் இயங்கும் ரோபோ : வாலிபர் அசத்தல் கண்டுபிடிப்பு

தர்மபுரி: தர்மபுரியை சேர்ந்த வாலிபர் மொபைல்போன் அழைப்பு அதிர்வுகள் மூலம் இயங்கும் ரோபோவால், தொலைவில் இருந்து இயக்கி துப்பாக்கியால் சுட கூடிய புதிய வடிவமைப்பை கண்டுபிடித்துள்ளார்.

மதுரையை சேர்ந்தவர் ஜெயபாண்டியன் (30). இவர் எளிய பொருட்களை கொண்டு அறிவியல் கண்டுபிடிப்புகளை உருவாக்கி வருகிறார். மாணவர்களுக்கு அறிவியல் கண்டுபிடிப்பு மீது ஆர்வமும், கண்டுபிடிப்புகளை உருவாக்கவும், உயர் தொழில் நுட்பங்கள் இல்லாமல் எளிதில் உள்ளூரில் கிடைக்கும் பொருட்களை கொண்டு பல்வேறு கண்டுபிடிப்புகளை செய்து வருகிறார். மாணவர்கள் பயிற்சி பெறும் வகையில் தர்மபுரியில் இந்தியன் கல்வி அறக்கட்டளையை உருவாக்கியுள்ளார்.

சமீபத்தில் இவர் நீர் நிலைகளில் ஓட்டும் வகையில் கார் வடிவமைத்து பாராட்டு பெற்றார். தற்போது, ராணுவ பணிக்கு உதவிடும் வகையிலும் தீவிரவாத அச்சுறுத்தல்கள் உள்ள இடங்களில் 3ஜி மொபைல்மூலம் கண்காணித்து, மொபைல்ஃபோன் அழைப்பு அதிர்வுகளில் இருந்து வெளிவரும் மூன்று வேல்ட் மின் பவரை பயன்படுத்தி ரோபோவை இயக்க வைத்து, துப்பாக்கியால் சுடும் புதிய கண்டுபிடிப்பை கண்டுபிடித்துள்ளார்.

தர்மபுரியை அடுத்த நாகாவதி அணை அரசு துவக்கப்பள்ளி தலைமையாசிரியர் கோவிந்தராஜ் நிதியுதவியுடன் 30 ஆயிரம் மதிப்பில் எளிய பொருட்களை கொண்டு இதை வடிவமைத்துள்ளார்.வெப்கேமரா மற்றும் 3ஜி மொபைல் போன் ஆகியவை இணைப்புடன் கொண்டு சிறிய நான்கு சக்கர கார் போன்ற அமைப்புடன் கூடிய வடிவமைப்பில் நான்கு திசையிலும் நகரும் வகையில் மேல், கீழ், பக்கவாட்டு பகுதியில் துப்பாக்கி நகரும் வகையில் பொருத்தப்பட்டுள்ளது.தொலைவில் இருந்து வெப்கேமரா, 3ஜி ஆகியவை உதவியுடன் ரோபோ உள்ள பகுதியில் உள்ளவைகளை கண்காணிக்கவும், வெப்கேமரா மற்றும் 3ஜி மொபைல் இணைப்பை தொலைவில் உள்ள அறைகளில் கம்ப்யூட்டர் மூலம் கண்காணித்து, துப்பாக்கியை இயக்க வைத்து சுடும் வகையில் வடிவமைத்துள்ளார்.

இவரது புதிய கண்டுபிடிப்பை தர்மபுரி இலக்கியம்பட்டி அரசு மேல்நிலைப்பள்ளியில் கலெக்டர் அமுதா முன்னிலையில் இயக்கி பாராட்டை பெற்றூர். விரைவில் மாணவர்களுக்கு ரோபோ இயக்கம் குறித்தும், துப்பாக்கி சுடும் பயிற்சி அளித்து திறந்த வெளியில் ரோபோவை வைத்து அறையில் இருந்து மாணவர்களை கொண்டு துப்பாக்கியை இயக்கி சுடும் செய்முறையை செய்து காண்பிக்க உள்ளார்.தற்போது, கண்டுபிடித்துள்ள இந்த ரோபோ துப்பாக்கி சுடும் வடிவமைப்பு கருவி 6 மொபைல்போன்களின் அழைப்பு அதிர்வுகளில் இருந்து இயக்கும் வகையில் செயல்படுத்தப்பட்டுள்ளது.நான்கு மொபைல்போன் எண்களுக்கு அழைப்பு கொடுத்தால், அதில் வரும் அழைப்பு அதிர்வுகளில் இருந்து துப்பாக்கி மேல், கீழ் இயக்கவும், கார் முன் பின் நகரும் வகையில் செய்யப்பட்டுள்ளது.

கார் வடிவமைப்புக்கு நான்கு சைக்கிள் வீல்கள் மற்றும் சிறிய கார் வடிவான தகரம் மற்றும் இரும்பாலானவை மூலம் உருவாக்கப்பட்டுள்ளது. டூவீலர்களுக்கு பயன்படும் பேட்ரி மூலம் துப்பாக்கி மற்றும் கார் இயக்கத்துக்கு கிரைண்டரில் பயன்படுத்தும் புள்ளி, கார் கண்ணாடியை துடைக்க அசையும் சிறிய வீல், கிரைண்டர் மேட்டார், டேப்ரிக்கார்டர் மோட்டார், ரோடியோவில் பாண்டு மாற்றும் பகுதி ஆகியவை மூலம் உருவாக்கி ஆச்சரியப்பட வைத்துள்ளார்.

கண்டுபிடிப்பு குறித்து ஜெயபாண்டியன் கூறியதாவது:மாணவர்கள் அறிவியல் கண்டுபிடிப்பில் ஆர்வம் வரவும், எளிய பொருட்கள் மூலம் உயர் தொழில் நுட்பங்கள் இல்லாமல் பல்வேறு கண்டுபிடிப்புகளை உருவாக்க முடியும் என்பதற்காக இதை உருவாக்கியுள்ளேன். மாணவர்கள் பயன்பெறும் வகையில் அறிவியல் மியூசியம் அமைக்க வேண்டும். இதற்காக தனி இணைய தளம் துவங்கியுள்ளேன். இணைய தள முகவரி www.indiansciencetrust.com என்ற முகவரியில் அறிவியல் எளிய கண்டுபிடிப்புகள் குறித்து அறிந்து கொள்ளலாம். மாணவர்கள் பயிற்சி பெற எனது மொபைல் போன் 96982 48008 என்ற எண்ணில் தொடர்பு கொள்ளலாம், என்றார்.

தினமலர் ....