ஓமலூர் அருகே குழந்தை நரபலி?

ஓமலூர்:

ஓமலூர் அருகே ஆழமான கிணற்றிலிருந்து பிணமாக மீட்கப்பட்ட பெண்
குழந்தையின் காதுகள் அறுக்கப்பட்டு, கண் தோண்டி எடுக்கப்பட்டிருந்ததால்,
நரபலி கொடுத்து குழந்தையை கிணற்றில் வீசியிருக்கலாம் என்று பொதுமக்கள்
பீதியடைந்துள்ளனர். சேலம் மாவட்டம் ஓமலூரை அடுத்த குப்பாண்டியூரைச்
சேர்ந்தவர் ராமச்சந்திரன். தச்சுத்தொழிலாளியான இவருக்கு சுமதி என்ற
மனைவியும், கோவிந்தராஜ், மோகன்குமார் என்ற மகன்களும் உள்ளனர். இவரது மகள்
வனிதா (10) அதே பகுதியில் உள்ள அரசு பள்ளியில் ஐந்தாம் வகுப்பு படித்து
வந்தார். நேற்று முன்தினம் வீட்டின் முன் விளையாடிக் கொண்டிருந்த வனிதா
திடீரென மாயமானார். காணாமல் போன மகளை ராமச்சந்திரன் பல இடங்களில்
தேடினார். ஆனால், வனிதா கிடைக்கவில்லை. நேற்று காலை வரை வனிதா வீடு
திரும்பாததால், ராமச்சந்திரனும், அவரது உறவினர்கள் மற்றும் கிராம மக்கள்
குப்பாண்டியூர் பகுதியில் உள்ள கிணறுகளில் தேடினர். சிவரங்கன் என்பவருக்கு
சொந்தமான கிணற்றிலும், ராமச்சந்திரனுக்கு சொந்தமான கிணற்றிலும் இருந்த
தண்ணீரை மோட்டார் மூலம் வெளியேற்றி, வனிதாவை தேடினர். அந்த கிணறுகளில்
வனிதா கிடைக்காததால், பெருமாள் என்பவருக்கு சொந்தமான கிணற்றுக்கு சென்று
பார்த்தனர். அப்போது, வனிதாவின் செருப்பும், பிளாஸ்டிக் தோடும் கிணற்று
தண்ணீரில் மிதப்பதைப் பார்த்து அதிர்ச்சியடைந்தனர். உடனே, கிணற்றில்
தண்ணீர் அதிகமாக இருந்ததால், கிராம மக்கள் ஓமலூர் தீயணைப்பு துறைக்கு
தகவல் கொடுத்தனர். அவர்கள் வருவதற்குள், கிராம மக்கள் கயிறு மூலம் கிணற்று
நீரில் மூழ்கியிருந்த வனிதாவின் உடலை மீட்டனர். கிணற்றில் இருந்து
மீட்கப்பட்ட வனிதாவின் உடலை பார்த்ததும், அவரது பெற்றோரும், பொதுமக்களும்
அதிர்ச்சியடைந்தனர். வனிதாவின் வலது காது முழுவதும், இடது காதில்
பாதியும், உதடு பாதியும் அறுக்கப்பட்டிருந்தது. வலது கண்ணும்
தோண்டியெடுக்கப்பட்டது போல் இருந்தது. கழுத்திலும் கத்தியால் குத்தி
கிழிக்கப்பட்டிருந்ததால் ஓமலூர் போலீசாருக்கு தகவல் கொடுத்தனர். சம்பவ
இடத்திற்கு வந்த போலீசார் வனிதாவின் உடலை பிரேத பரிசோதனைக்காக ஓமலூர்அரசு
மருத்துவமனைக்கு அனுப்பி வைத்தனர். இது குறித்து கிராம மக்கள் கூறியதாவது:
இரண்டு மாதங்களாக குப்பாண்டியூர் பகுதியில் புதையல் இருப்பதாகவும், அதை
எடுப்பதற்காக ஒரு மர்ம கும்பல் முகாமிட்டுள்ளதாகவும் கூறப்படுகிறது.
அந்த கும்பலைச் சேர்ந்தவர்கள் தான் வனிதாவை கடத்தி, நரபலி கொடுத்து
கிணற்றில் வீசியிருக்க வேண்டும். இவ்வாறு அவர்கள் தெரிவித்தனர். கிணற்றில்
இருந்து பிணமாக மீட்கப்பட்ட பெண் குழந்தையின் காதுகள் அறுக்கப்பட்டு, கண்
தோண்டி எடுக்கப்பட்டிருந்ததாலும், கொண்டலம்பட்டியில் காயத்ரி என்ற சிறுமி
பிணமாக கிடந்த சம்பவத்தாலும், ஓமலூரில் சமீபத்தில் சந்தோஷ் என்ற சிறுவன்
காணாமல் போனதாலும் இது புதையலுக்காக குழந்தைகளைக் கடத்தி நரபலி கொடுக்கும்
கும்பலின் செயலாக இருக்கலாம் என்று பொதுமக்களிடையே பீதி ஏற்பட்டுள்ளது.

மூட நம்பிக்கையில் ஒரு உயிர் பலி ..........

திருந்தாத ஜென்மங்கள் ......