நர்சை கொன்று ஓடையில் உடல்வீச்சு: வாடகைக்கு குடியிருந்த வாலிபர் கைது

திருநெல்வேலி: பாளை. அருகே நர்ஸை கொலை செய்து தங்க நகைகளை கொள்ளையடித்த
வாலிபர் கைது செய்யப்பட்டார். அவர் மனைவி, கூட்டாளியிடம் போலீசார் விசாரணை
நடத்திவருகின்றனர்.
பாளை. என்.எச்.காலனி எட்டாவது குறுக்குத்தெருவை
சேர்ந்த சுகிர்தராஜன் மனைவி அற்புதமணி விக்டோரியா(75). இவர் பாளை.
ஐகிரவுண்ட் ஆஸ்பத்திரி, தனியார் ஆஸ்பத்திரிகளில் நர்ஸாக
பணியாற்றியுள்ளார். இவருக்கு பேபிசுகந்தி, பேபிசுகுணா ஆகிய மகள்கள்
உள்ளனர்.
பேபிசுகந்தி நான்குநேரி அருகே ஆழ்வாநேரியில் ஆசிரியையாக
உள்ளார். மூலக்கரைப்பட்டியில் குடும்பத்துடன் வசித்துவருகிறார். இவருடன்
தந்தை சுகிர்தராஜனும் வசித்து வருகிறார். பேபிசுகுணா கோயம்புத்தூரில்
ஆசிரியையாக உள்ளார். அற்புதமணி விக்டோரியா பாளை. வீட்டில் தனியே
வசித்துவந்தார். மகள் பேபிசுகந்திக்கு அவர் அவ்வப்போது போனில் பேசுவது
வழக்கம்.
கடந்த சில வாரங்களுக்கு முன்பிருந்து அற்புதமணி விக்டோரியாவை
பேபிசுகந்தி போன் மூலம் தொடர்பு கொள்ள முடியவில்லை. உடனே அவர் தாய்
வீட்டுக்கு வந்து பார்த்தார். அங்கு அற்புதமணி விக்டோரியா இல்லை.
அக்கம்பக்கத்தில் விசாரித்த போது எந்த தகவலும் கிடைக்கவில்லை. இதுகுறித்து
பேபிசுகந்தி கடந்த 18ம்தேதி பெருமாள்புரம் போலீசில் புகார் அளித்தார்.
போலீசார் வழக்குப்பதிவு செய்து விசாரித்து வந்தனர்.
அற்புதமணி
விக்டோரியாவின் வீட்டில் வாடகைக்கு குடியிருந்த இலந்தைக்குளத்தை சேர்ந்த
இசக்கிப்பாண்டி(24), அவர் மனைவி ராதிகா(33), கூட்டாளி கருப்பசாமியிடம்
"பணநடமாட்டம்' தாராளமாக இருந்ததால் போலீசாருக்கு சந்தேகம் ஏற்பட்டது.
மூவரையும் போலீசார் பிடித்து விசாரித்தனர்.
விசாரணையில், "திடுக்'
தகவல்கள் வெளியாகின. அற்புதமணி விக்டோரியாவிடம் தங்கநகைகள் இருப்பது
மூவருக்கும் தெரியவந்துள்ளது. ஜூலை மாதம் கடைசிவாரத்தில் வீட்டின்
பின்புறம் இருந்த அற்புதமணி விக்டோரியாவிடம் தாலிச்செயின், கம்மல்,
மோதிரம் உட்பட 5 பவுன் தங்கநகைகளை மூவரும் பறித்துள்ளனர். வீட்டில் இருந்த
டிவியையும் எடுத்துச்சென்றனர். பின்னர் சேலையால் அற்புதமணி விக்டோரியா
கழுத்தை நெரித்து கொலை செய்து உடலை போர்வையில் சுற்றி யாருக்கும்
தெரியாமல் பெருமாள்புரம் ரயில்வே கேட் அருகேயுள்ள ஓடையில் புதர்களுக்கு
இடையே வீசியது தெரியவந்தது.
அதிகாரிகள் விசாரணை: உதவி கமிஷனர்கள் ராமச்சந்திரன், ஸ்டேன்லிஜோன்ஸ்,
இன்ஸ்பெக்டர்கள் முகம்மதுமுகைதீன், பொன்னரசு மற்றும் போலீசார் நேற்று
ஓடையில் கிடந்த அற்புதமணி விக்டோரியா உடலை மீட்டனர். கொலை செய்யப்பட்டு 40
நாட்களுக்கு மேல் ஆனதால் உடல் முழுமையாக அழுகி இருந்தது. பேபிசுகந்தி தாய்
உடலை அடையாளம் காட்டினார். அதே இடத்தில் உடல் போஸ்ட்மார்ட்டம்
செய்யப்பட்டது. இசக்கிப்பாண்டி கைது செய்யப்பட்டார். மற்ற இருவரிடமும்
தொடர்ந்து விசாரணை நடக்கிறது. அற்புதமணி விக்டோரியா வீட்டில் போலீசார்
சோதனை மேற்கொண்டனர். கொள்ளையடிக்கப்பட்ட நகைகளை கைப்பற்றும் முயற்சியில்
போலீசார் ஈடுபட்டுள்ளனர். போலீஸ் துணை கமிஷனர் அவினாஷ்குமார் கூறும்போது,
""விசாரணைக்கு பின் இச்சம்பவத்தில் தொடர்புடைய மற்ற இருவரும் கைது
செய்யப்படுவர். கொள்ளையடிக்கப்பட்ட நகைகள் மீட்கப்படும்'' என்றார்.