இல்லறம் இனிக்க....

by **Tamilzhan** Thu Jul 30, 2009 12:05 am

இல்லறம் இனிக்க..!

1. திருமணத்தின் போது கணவன், மனைவி இருவரும் ஒரே அந்தஸ்தாக இருக்கலாம். ஆனால் போகப் போக கணவரது சொந்தக்காரர்களின் (மைத்துனர், நாத்தனார்) குடும்ப நிலை மாறக்கூடும். திடீரென்று செல்வப்படியில் ஏறலாம்.. இறங்கலாம், ஆனால் அந்த மாறுதல்கள் உங்கள் குடும்ப வாழ்வில் குறுக்கிட அனுமதி கொடுக்காதீர்கள்.

2. பண விஷயத்தில் ஓரளவு ரகசியம் இல்லாதிருத்தல் நல்லது. ஆபீஸ் நண்பர்களுக்கு உதவுவதோ, வேறு சுற்றத்தாருக்கு உதவுவதோ நல்ல கொள்கைதான். ஆனால் எல்லாவற்றையும் மனைவியிடம் தெரிவித்து விடுவது உசிதம். தொகை குறைவாக இருந்தால் பரவாயில்லை. சற்று பெரிய தொகையாயிருந்து மறைத்து வைத்துப் பின் மற்றவர் மூலம் தெரிய வந்தால் நிம்மதி போய் விடும். வேலை பார்க்கும் பெண்களுக்கும் இது பொருந்தும்.

3. நீங்கள் பணி புரிகிற துறை பற்றி ஞானம் இல்லாதிருந்தாலும் சரி. பட்டம் பெறாத மனைவியாக இருந்தாலும் சரி. சீரியஸான அலுவலகப் பிரச்சினைகள் எழுந்தால் யோசனை கேட்பது முக்கியம். மன உறுத்தலுக்கு வடிகால் கிடைப்பதுடன் அபூர்வமான புதிதான தீர்வும் கிடைக்க வாய்ப்பு உண்டு.

4. கணவரோ, மனைவியோ யாராக இருந்தாலும் சரி, மறுபாதியின் குறையை, குறிப்பாக உடற்குறையைக் கிண்டலடிக்காதீர்கள். கணவனின் பருமன் மனைவியின் கீச்சுக்குரல் இவற்றை ஏதோ ஜோக் அடிக்கிறதாக எண்ணி நாலு பேர் முன் ஏதாவது சொல்லாதீர்கள்.

5. மற்றவரை மிகையாக சில வேளைகளில் ரசித்துப் பாராட்டினால் அதைப் பெரிதும் பொருட்படுத்தாதீர்கள். --ன் சமையல் பிரமாதமாயிருக்கும், --கணவர் மகா கெட்டிக்காரர்- என்பன போன்ற விமரிசனங்கள் எழுந்தால் 'ஏன், எனக்கென்ன" என்று சண்டைக் கோழி மாதிரி பாயாதீர்கள். இவையெல்லாம் நீல வானத்தில் ஓடும் மேகம் மாதிரி.

6. விருந்தாளி முன் யாராவது ஒருவர் முற்றிலும் மாறான கருத்தை வெளிப்படுத்தினால் (அரசியல், சமூக கருத்துக்கள்) மௌனமாக இருங்கள். ஒரு வேளை நாக்கு துறுதுறுத்தால், 'அது சரி" என்று சொல்லி விட்டு பிறகு உங்கள் கருத்தைக் கூறலாம்.

7. வீட்டில் விவாதிக்க இயலாத சில பிரச்சினைகளை வெளியே செல்லும் போது மனம் விட்டுப் பேசுங்கள். மனதுக்குள் அடைத்து வைத்து 'நீ எப்போதுமே ---உதவுகிறாய், உனக்கு கெட்ட பெயர்தான்" என்று திடுமென்று பாயாதீர்கள்.

8. இது புதுயுகச் சிக்கல். உரையாடல் இடைவெளி. கடைக்குப் போய்- மாமா வீட்டுக்குப் போய் விட்டு வாருங்கள் என்று சொன்னால் சரி என்று தலையாட்டி விட்டு பிறகு மறந்து விடுவது. நீ சொல்லவே இல்லையே என்று குறை கூறுவது. காரணம் சின்னத்திரை, செல்போன் போன்றவற்றில் கவனம் செலுத்தி, முக்கிய சமாச்சாரங்களை காது கொடுத்துக் கேளாதிருப்பது. வெளிப்பார்வைக்கு அற்பமாகத் தோன்றினாலும், பிரச்சினை பெரிதாக வெடிக்க வாய்ப்பு உண்டு. இதைத் தவிருங்கள். 'பல்கலைக்கழகமாக" மாற வேண்டாம். ஆனால் கலகக் குடும்பமாக மாற வேண்டாமே!