இந்திரவிழா - திரை விமர்சனம்

குமுதம் விமர்சனம்

கணக்குப் போட்டு ஆட்களைக் கவிழ்க்கிற நமீதாவும், அவரைக் காதலித்து ஏமாந்த ஸ்ரீகாந்த்தும் பல வருடங்களுக்குப் பிறகு சந்திக்கும் போது நடக்கிற எஜமானி-தொழிலாளி சண்டைதான் கதை.

""மச்சான்'' களை நமீதா ஏமாற்றவில்லை.நடிப்பதற்கு நிறையவே வாய்ப்புத் தருகிற ""நீலாம்பரி'' ரக கேரக்டர் என்றாலும், வழக்கம்போல உடைக்குறைப்பில் மட்டுமே கவனம் செலுத்துகிறார்.கில்லாடிப் பெண்கள் பகடைக்காயாய் உருட்டி விளையாடுகிற அப்பிராணிக் கேரக்டருக்கு ஸ்ரீகாந்தின் ""அமுல் பேபி'' முகம் ரொம்பவே உதவுகிறது.

திரைக்கதையின்படி, ஸ்ரீகாந்த்துக்கும் ஹீரோயினுக்கும் இடையே அறிமுகத்தை ஏற்படுத்துவதற்காக ஹீரோயினைக் குறி வைத்து ஸ்ரீகாந்த் அண்ட் கோ நடத்துகிற டிவி ÷ஷா கலாட்டாக்கள் எரிச்சலூட்டும் நீளம்.

நமீதா, ஸ்ரீகாந்த்தை வறுத்தெடுக்கிற ஆபீஸ் மீட்டிங்கைப் போல இன்னும் சில காட்சிகள் வைத்து, ஈகோ விளையாட்டை நீட்டித்திருக்கலாம். அடுத்த காட்சியிலேயே நமீதா அவரைத் திருட்டுத் தனமாக வரவழைத்து கட்டிப் பிடிக்கும்போது ""ரொம்ப அலைகிற பார்ட்டியோ ?'' என்று நமக்கு சந்தேகம்.

வேலையைப் பறித்த நமீதாவுக்கு எதிராக ஸ்ரீகாந்த் வழக்கு தொடுப்பது திடுதிப் திருப்பம்தான். அதைத் தொடர்ந்து ராதாரவி, ஒய்.ஜி. மகேந்திரன் கோஷ்டி அடிக்கும் கோர்ட்டு லூட்டிகள் உப்பில்லாத தயிர்சாத ரகம். ஸ்ரீகாந்துக்காக வாதாடுகிற விவேக் புண்ணியத்தில் தவிச்ச வாய்க்கு சிரிப்பு.

செக்ஸையும், உறவுச் சிக்கல்களையும் அலசுகிற படங்களுக்கு நச்சென்ற வசனங்களும் முக்கியம். ""என்னை வேவு பார்க்குறியா ?'' என்று நமீதா சீற, ""துரோகம் பண்ணப்பட்டவன் பண்ற கடைசி வேலை'' என ஸ்ரீகாந்த் சொல்வதைத் தவிர, மற்ற இடங்களில் அந்தப் புத்திசாலித்தனம் மிஸ்ஸிங்.


குமுதம் ரேட்டிங் - சுமார்

தினமலர் விமர்சனம்

பழிவாங்கும் காதல் கதையை காமெடியாக சொல்கிறேன் பேர்வழி என கவர்ச்சியாக சொல்லி பழிவாங்கி இருக்கின்றனர் ரசிகர்களை! கதைப்படி, முன்னணி தனியார் தொலைக்காட்சி ஒன்றில் முக்கிய ப‌ொறுப்பில் இருப்பவர் ஹீரோ ஸ்ரீகாந்த். அவர்களது தயாரிப்பில் ஒளிப்பரப்பாகும் பொதுமக்களை முட்டாளக்கும் நிகழ்ச்சி ஒன்றினால் பெரிதும் பாதிப்பிற்கு உள்ளாகிறார் ஹீரோயின் ஹேமமாலினி.

அதற்கு பிரயாசித்தமாக ஸ்ரீயே ஹேமாவிற்கு வசதியான வாழ்க்கை துணை ஆகிறார்! இந்நிலையில் ஸ்ரீ வேலைபார்க்கும் தொலைக்காட்சி முதலாளியின் மூன்றாவது மனைவி நமீதாவின் ஆசைக்கும், இச்சைக்கும் அவர் அடிபணியாததால் ஸ்ரீயின் வேலை பறிபோகிறது. இதனால் கோர்ட்டுக்கு போகிறார் ஸ்ரீ! இத்தருணத்தில் பணத்தாசை பிடித்த நமீக்கும், ஸ்ரீக்கும் திருமணத்திற்கு முன்பிருந்த காதல், திரையில் ப்ளாஷ்பேக்காக விரிகிறது. ஆனாலும் மனைவிக்கு துரோகம் செய்யக் கூடாது எனும் கொள்கையில் உறுதியாக இருக்கும் ஸ்ரீயை, கணவர் நாசருக்கு துரோகம் செய்வதையே தொழிலாக வைத்திருக்கும் நமீ, தன் கணவர் மூலமே பழி வாங்குவதே... மீதி கதை! இந்த பழிவாங்கல் படலத்தால் பாதிக்கப் பட்டது ஸ்ரீயா? நமீயா? என்பதுதான் கிளைமாக்ஸ்.

இப்படி ஒரு அழகான கதையை எப்படி, எப்படி எல்லாம் இழுத்தடித்து படம் பிடிக்க முடியுமோ., அப்படியெல்லாம் இழுத்தும், அலுத்தும் படம் பிடித்திருப்பதுதான் கொடுமை! ஸ்ரீகாந்த் நடிப்பில் ஸ்கோர் செய்திருந்தாலும் கேரக்டரோடு ஒட்டமளிப்பது குறை! படம் முழுக்க பரவி கிடக்கும் நமீதாவின் பெருங்கவர்ச்சியை விட ரகசியாவும், ஹேமமாலினியும் பெட்டர்! நடிப்பிலும் சரி கவர்ச்சியிலும் சரி... இந்த இருவரும் நமீயை தூக்கி சாப்பிட்டு விடுகின்றனர். பேஷ், பேஷ்!

வில்லன் நாசருக்கு எங்கோ மச்சம்! இல்லை என்றால்., நமீக்கு ஜோடியாக முடியுமா? விவேக்கின் சில காமெடிகள் சிரிப்பை வரவழைத்தாலும் நீதிமன்றத்தில் எதிர்தரப்பு வக்கில் ஒய்.ஜி.மகேந்திரனுடனும், நீதிபதி ராதாரவியுடனும் அடிக்கும் லூட்டி ரொம்ப ஓவர் சுத்த போர்! அமரன், கோவில்பட்டி வீரலட்சுமி உள்ளிட்ட படங்களை இயக்கிய ரா‌ஜேஸ்வரா இதன் இயக்குனர்? என கேட்க வேண்டிய நிலையில் சாதாரணமாக இருக்கிறது இயக்கம்! சீரியஸான பழிவாங்கும் காதல் கதையை சிரிப்பாக சொல்ல முற்பட்டு சிரிப்பாய் சிரித்திருக்கின்றனர் பாவம்! ஆறுதல் ஜெய் கேமில் அலெக்ஸின் ஒளிப்பதிவும், யதிஷின் இசையும்!

மொத்தத்தில் 'இந்திர விழா'வா? 'நமீதா' உலாவா? இயக்குனருக்கே வெளிச்சம்!