தமிழர்கள் மனங்களை ஜெயித்தால் - நடிகர் ரஜினிகாந்த்

by drrajmohan Sun Aug 22, 2010 8:43 pm

தமிழர்கள் மனங்களை ஜெயித்தால் இந்தியாவிலேயே பெயர் வாங்கியது மாதிரி என்று நடிகர் ரஜினிகாந்த் பேசினார்.

சென்னை பல்கலைக்கழக நூற்றாண்டு விழா அரங்கில் இன்று நடைபெற்ற திரைக்கலைஞர்களுக்கு வீடுகட்டி தரும் பையனூர் கலைஞர் நகர அடிக்கல் நாட்டு விழாவில், நடிகர் ரஜினிகாந்த் வாழ்த்தி பேசியதாவது:

மத்திய அமைச்சர் தாசரி நாராயணராவ் பேசும் போது, இங்கே குழுமியிருந்தவர்கள் கைதட்டியது பற்றி நடிகர் ஜிதேந்திரா என்னிடம் கேட்டார்.

அதற்கு நான் சொன்னேன், அவர்களுக்கு தெலுங்கு புரியும், ஆங்கிலம் புரியும், மலையாளம் புரியும், தமிழர்களுக்கு தெரியாத பாஷையே கிடையாது. அவர்களுடைய அறிவுக்கு எட்டாத விஷயமில்லை.

அவர்களுடைய மனங்களை புரிந்து ஜெயித்து விட்டால், அவர்களிடம் பெயர் வாங்கிவிட்டால் இந்தியாவிலேயே பெயர் வாங்கின மாதிரி என்று சொன்னேன். இது சினிமாவாகட்டும், அரசியலாகட்டும் இது எல்லாத்துறைக்குமே பொருந்தும்.

இது நம்முடைய குடும்ப விழா. இது இவ்வளவு சீக்கிரமே நடைபெறுவது ரொம்பவும் சந்தோஷம்.

. ஒரு மகான் எழுதிய புத்தகத்தை படித்தேன். அதில் போட்டிருந்தது,

சுயநலத்திற்காக யாராவது வேலை செய்தால் உடனடியாக களைப்படைந்து விடுவார்கள். ஆனால் ஒரு மனிதன் பொதுநலத்திற்காக வேலை செய்தால் களைப்படைய மாட்டான் என்று அந்த புத்தகத்தில் போட்டிருந்தது.

இந்த திட்டத்திற்கு பெருமுயற்சி எடுத்த அனைவரையும் இந்த நேரத்தில் பாராட்டுகிறேன். இந்த திட்டம் பற்றி சில விஷயங்களை கேள்விபட்டேன். 99 வருடம் குத்தகை, வாடகை, முதலில் பணம் கட்ட வேண்டும் என்றெல்லாம் சிலபேர் சென்னார்கள்.

வீடு, நிலம் ஆகியவற்றை வாங்கும் போது அதனை பார்த்து விட்டு வேண்டாம் என்று திரும்ப வரக்கூடாது. அப்படி வேண்டாம் என்று வந்து விட்டால், இவன் வேண்டாம் என்று சொல்கிறானே என்று மூதேவி நினைப்பாளாம். அதற்காக பின்னால் வருத்தப்பட வேண்டி வரும்.

எனவே வீடு, நிலம் வாங்கும் போது எந்த கஷ்டம் இருந்தாலும் அதை ஏற்று கொண்டு வாங்க வேண்டும். எனவே இந்த அருமையான திட்டத்தில் சேர்ந்து பயன்பெற வேண்டும்.

இவ்வாறு அவர் பேசினார்.