பாதுகாப்பு ஏற்பாடுகள் இல்லாமல் இயக்கப்படுகிறதா?

புதுடெல்லி: தாழ்தள பஸ்களை தயாரித்து அளித்த நிறுவனங்கள் அவற்றில் போதுமான அளவு பாதுகாப்பு ஏற்பாடுகளை செய்யவில்லை என்ற குற்றச்சாட்டு குறித்து பதில் அளிக்குமாறு மாநில அரசுக்கும், போக்குவரத்து துறைக்கும் நோட்டீஸ் அனுப்ப உயர் நீதிமன்றம் உத்தரவிட்டுள்ளது. டெல்லியில் தனியார்கள் இயக்கும் புளூலைன் பஸ்கள் அடிக்கடி விபத்துக்கு உள்ளானது செய்திகளில் வெளியானது. இதை தானே வழக்காக பதிவு செய்து கொண்டு உயர் நீதிமன்றம் விசாரணை நடத்தியது. இந்த வழக்கில், புளூலைன் பஸ்களை படிப்படியாக அகற்றி, ஜி.பி.எஸ். உட்பட நவீன பாதுகாப்பு அம்சங்கள் கொண்ட பஸ்களை இயக்க வேண்டும் என்று உயர் நீதிமன்றம் உத்தரவிட்டது.இந்நிலையில், நீதிபதிகள் ஏ.கே.சிக்ரி, ரேவா கேத்ரபால் ஆகியோர் முன் நேற்று முன்தினம் விசாரணைக்கு வந்தது. இந்த வழக்கில் நீதிமன்றத்துக்கு உதவுவதற்காக நியமிக்கப்பட்ட மூத்த வக்கீல்கள் கைலாஷ் வசுதேவ், அனூப் பாம்பானி ஆகியோர் நீதிமன்றத்தில் வாதாடியதாவது:டெல்லியில் ஏற்கனவே பல தாழ்தள பஸ்கள் ஓடிக் கொண்டிருக்கும் நிலையில், காமன்வெல்த் போட்டிக்காக மேலும் 600 பஸ்களை வாங்க மாநில அரசு திட்டமிட்டுள்ளது. ஆனால், இந்த பஸ்களை தயாரித்து அளித்த நிறுவனங்கள், அவற்றில் தேவையான பாதுகாப்பு ஏற்பாடுகள் செய்யவில்லை என்பது தெரியவந்துள்ளது. இதை சரிபார்க்க அதிகாரிகளும் தவறிவிட்டனர். தாழ்தள பஸ்கள் போதுமான பாதுகாப்பு அம்சங்களுடன் உள்ளன என்று சான்றிதழ் அளித்த மத்திய சாலை போக்குவரத்து கழகத்தின் சில அதிகாரிகள் மீது சி.பி.ஐ. விசாரணை நடைபெற்று வருகிறது. இவ்வாறு அவர்கள் வாதாடினர்.இதைத்தொடர்ந்து நீதிபதிகள் தங்கள் உத்தரவில், ‘‘தாழ்தள பஸ்களில் போதுமான பாதுகாப்பு ஏற்பாடுகள் செய்யப்பட்டுள்ளனவா என்பது குறித்து வரும் 31ம் தேதிக்குள் மாநில அரசும், போக்குவரத்து கழகமும் நீதிமன்றத்தில் அறிக்கை தாக்கல் செய்யவேண்டும்’’ எனறு கூறினர்.