மூடாத ரயில்வே கேட்டை கடந்த சரக்கு ரயில்; வாகன ஓட்டிகள் சுதாரித்ததால், விபத்து தவிர்ப்பு

by நவீன் Sat Aug 21, 2010 8:37 am

விக்கிரவாண்டி: விழுப்புரம் காட்பாடி ரயில்வே கேட் மூடாதிருந்தபோது,
சரக்கு ரயில் வந்ததால் பொதுமக்கள் அலறி அடித்துக் கொண்டு ஓடினர். சென்னை,
திண்டிவனம், செஞ்சி பகுதிகளில் இருந்து வரும் வாகனங்கள் விழுப்புரம்
நகருக்குள் காட்பாடி ரயில்வே கேட் வழியாக வர வேண்டும். நேற்று பிற்பகல்
12.40 மணியளவில், விழுப்புரத்திலிருந்து வேலூர் நோக்கி 46 பெட்டிகளில்,
பொருட்களுடன் சரக்கு ரயில் புறப்பட்டது. பகல் 12.44 மணியளவில், காட்பாடி
ரயில்வே கேட்டை சரக்கு ரயில் கடந்து செல்ல இன்ஜின் டிரைவருக்கு சிக்னல்
கிடைக்கவில்லை. காட்பாடி ரயில்வே கேட் ரயில் கடந்து செல்ல வசதியாக
மூடாமல் திறந்த நிலையில் இருந்தது. கேட் மூடாமல் இருந்ததால், ரயில்
இன்ஜின் டிரைவர் இன்ஜின் வேகத்தை குறைத்து ஹாரன் அடித்தார். ஆனால், கேட்
மேன் அறை பூட்டப்பட்டிருந்தது. ரயில்வே ஊழியர்கள் யாரும் இல்லை. அப்போது
கேட் அருகில், ரயில் வருவதை கண்டு அதிர்ச்சியடைந்த இரு சக்கர வாகனத்தில்
பின்னால் அமர்ந்திருந்தவர்கள் அலறி அடித்துக் கொண்டு இறங்கி ஓடி வந்தனர்.
பின்னர், இரு சக்கர வாகனத்தை ஓட்டி வந்தவர்களும் தங்கள் வாகனத்தை வந்த
பக்கமே, பின்னால் இழுத்துக் கொண்டு வந்து தப்பினர். மேலும் ஆட்டோ, வேன்,
லாரி டிரைவர்களும் நடக்க இருந்த ஆபத்தை உணர்ந்து, தங்கள் வாகனங்களை
வரிசையாக நிறுத்தினர். இதை பார்த்த பொதுமக்கள் இரு புறமும் நின்று,
வாகனங்களில் வருபவர்களை எச்சரித்து நிறுத்தினர். அது வரை பணியிலிருந்த
கேட்மேன் தனது அறைக்கு வரவில்லை. பின்னர், ரயில் இன்ஜின் டிரைவர்
விழுப்புரம் ரயில் நிலையத்திற்கு, காட்பாடி ரயில்வே கேட்டில் கேட் மேன்
இல்லாதது குறித்து புகார் தெரிவித்தார். கேட் அருகே, வாகனங்கள் நிற்பதை
ஊர்ஜித படுத்திக் கொண்டு, பலத்த ஹாரன் சத்தத்துடன் மெதுவாக ரயில்வே கேட்டை
சரக்கு ரயில் கடந்து சென்றது. சரக்கு ரயில் கடந்த பிறகும் கேட்மேன்
அறைக்கு வராததை பார்த்த பொதுமக்கள், ரயில்வே ஊழியரின் கடமை உணர்வை
பார்த்து புலம்பி தீர்த்தனர். இந்த மார்க்கத்தில் ரயில் டிரைவரும்,
பொதுமக்களும் விழிப்பாக இருந்ததால் பெரிய விபத்து தவிர்க்கப்பட்டது.
ரயில் கடந்து சென்ற 20 நிமிடத்திற்கு பிறகு, எங்கிருந்தோ கேட்மேன் வந்து
அவசரமாக தனது அறையை திறந்து உள்ளே சென்றார். கண்காணிக்க வேண்டிய
அதிகாரிகளும், பொறுப்புடன் இல்லாமல் இருந்தது பொதுமக்களுக்கு அதிர்ச்சியை
ஏற்படுத்தியுள்ளது.