முறைகேடாக உரம் சப்ளை மேலும் ஒரு டீலர் கைது

காரைக்கால்: காரைக்கால் குளோரைடு தொழிற்சாலைகளுக்கு, மானிய விலை பொட்டாஷ்
உரங்களை முறைகேடாக விற்பனை செய்த டீலர்களில் மேலும் ஒருவரை சி.பி.ஐ.,
அதிகாரிகள் கைது செய்தனர். காரைக்கால் மேலகாசாக்குடியில் உள்ள வைகை
குளோரைடு மற்றும் காரைக்கால் குளோரைடு தொழிற்சாலைகளில் பொட்டாஷ் உரங்களை
கொண்டு தீப்பெட்டி மற்றும் வெடிமருந்து தயாரிக்க தேவையான பொட்டாஷ்
குளோரேட் தயாரிக்கப்படுகிறது. இந்த இரு தொழிற்சாலைகளும், விவசாயிகளுக்காக
மானிய விலையில் வழங்கப்பட்ட பொட்டாஷ் உரங்களை முறைகேடாகப் பெற்று,
பொட்டாஷ் குளோரேட் தயாரிப்பதாக புகார் எழுந்தது. இதனையடுத்து சி.பி.ஐ.,
அதிகாரிகள் கடந்த ஆண்டு ஜூன் மாதம் இரு தொழிற்சாலைகளிலும் ஆய்வு செய்தனர்.
அப்போது அளவுக்கு அதிகமாக பதுக்கி வைத்திருந்த பொட்டாஷ் உரங்களை பறிமுதல்
செய்து குடோன்களுக்கு சீல் வைத்தனர். இரு தொழிற்சாலைகளுக்கும் மானிய
உரங்களை முறைகேடாக வழங்கிய உர டீலர்களான மதுரையைச் சேர்ந்த ஜெய்ஜவகர்,
ஜெயசீலன், ரவீந்திரன், ஜெய்சங்கர், ஏசுராஜா, ராஜபாண்டியன் ஆகிய ஆறு பேரை
சி.பி.ஐ., அதிகாரிகள் கடந்த 13ம் தேதி மதுரையில் கைது செய்து காரைக்கால்
கோர்ட்டில் ஆஜர்படுத்தி சிறையில் அடைத்தனர். இதில் தொடர்புடைய மற்றொரு
டீலரான ராஜபாண்டியன் மனைவி லாவண்யா தன் கைக்குழந்தையுடன் காரைக்கால்
கோர்ட்டில் சரணடைந்தார். அவர் ஜாமீனில் விடுவிக்கப்பட்டார்.
தொழிற்சாலைக்கு மானிய உரங்களை மேலும் பல டீலர்கள் சப்ளை செய்திருப்பது
சி.பி.ஐ., விசாரணையில் தெரிந்தது. இதையடுத்து மதுரையைச் சேர்ந்த உர டீலரான
திருமூர்த்தி ஏஜன்சி திருநாகேஸ்வரம் என்பவரை சி.பி.ஐ., அதிகாரிகள் கைது
செய்து, நேற்று காரைக்கால் கோர்ட்டில் ஆஜர்படுத்தி சிறையில் அடைத்தனர்.
கடந்த 13ம் தேதி கைது செய்யப்பட்ட உர டீலர்களான ஜெய்ஜவகர், ஜெயசீலன்
உள்ளிட்ட ஆறு பேரும் ஜாமீன் கேட்டு காரைக்கால் கோர்ட்டில் மனு தாக்கல்
செய்தனர். மனுவை விசாரித்த நீதிபதி சுந்தரராஜன், தலா 10 ஆயிரம் ரூபாய்
பிணைத் தொகையுடன், தினந்தோறும் காரைக்கால் கோர்ட்டில் கையெழுத்திட
வேண்டும் என்ற நிபந்தனையுடன் ஜாமீன் வழங்கி நேற்று உத்தரவிட்டார்.

உஷ்.......................... முடியல. திருந்தவே மாட்டாங்க