வீடுகளை சேதப்படுத்திய யானைகள்

by நவீன் Wed Aug 04, 2010 12:42 pm

பந்தலூர் : பந்தலூர், கூடலூர் பகுதிகளில் உள்ள சில வீடுகளை காட்டுயானைகள்
சேதப்படுத்தின.பந்தலூர் கூவமூலா குரும்பர்பாடியை சேர்ந்தவர் மாதன். கடந்த
இரண்டு நாட்களுக்கு முன்பு இரவு இப்பகுதிக்கு வந்த யானை கூட்டம் மாதனின்
குடியிருப்பை சேதப்படுத்தியது. அதில் வீட்டின் ஒரு பக்க சுவர் இடிந்து
விழுந்ததுடன், வீட்டினுள் இருந்த பொருட்களும் நாசமடைந்தன. ஆனால்
வீட்டிற்குள் உறங்கிக்கொண்டிருந்த யாருக்கும் எந்த ஆபத்தும் ஏற்படவில்லை.
பாதிக்கப்பட்ட குடியிருப்பை தேவாலா வனச்சரக வனவர்கள் ராஜேந்திரன்,
முத்துசாமி, கார்டு கேசவன், வாச்சர் செல்வராஜ் ஆகியோர் பார்வையிட்டனர்.*
கூடலூர் கோழிக்கோடு சாலை நர்த்தகி பகுதியில் காங்., மாவட்ட துணை தலைவர்
வக்கில் கோஷிபேபி வீட்டின் கேட்டை உடைத்து உள்ளே புகுந்த ஒன்றரை கொம்பு
யானை அங்கிருந்த தென்னை மரங்களை நாசப்படுத்தியது; பின்னர் அங்கிருந்து
வெளியேறி அருகில் இருந்த லாரியை சாய்க்க முயற்சித்துள்ளது. லாரியில்
தூங்கி கொண்டிருந்த டிரைவர் எழுந்து தப்பி ஓடியுள்ளார். தொடர்ந்து,
அருகேயிருந்த வாழை தோட்டத்தில் புகுந்து வாழை மரங்களையும் நாசம் செய்தது.
சப்தம் கேட்டு அப்பகுதியை சேர்ந்த பொது மக்கள் யானையை விரட்டினர். அதிகாலை
5 மணியளவில் யானை வனப்பகுதிக்குள் சென்றது. நேற்றுகாலை அப்பகுதியை கூடலூர்
வனவர் செல்வராஜ் மற்றும்வனத்துறையினர் ஆய்வு செய்தனர்.இது குறித்து வன
அலுவலர் சதிஷ் கூறுகையில், "" யானை நடமாட்டம் குறித்து வன ஊழியர்கள்
கண்காணித்து, அதனை வனப்பகுதிக்கு விரட்ட நடவடிக்கை எடுப்போம்,'' என்றார்.