தீபாவளி பயணத்திற்கு ரயிலில் முன்பதிவு:இன்னும் மூன்று நாட்களே அவகாசம்

சென்னை:தீபாவளி பண்டிகைக்கு சொந்த ஊருக்கு ரயிலில் செல்ல கூட்டம்
அதிகம் இருக்கும் என்பதால், முன்கூட்டியே முன்பதிவு செய்வது நல்லது. கடைசி
நேரத்தில் டிக்கெட்டின்றி ரயிலிலோ, ஆம்னி பஸ்களிலோ இடைத்தரகர் மூலம்
இரண்டு, மூன்று மடங்கு கூடுதல் கட்டணம் செலுத்தி பயணம் செய்வதை
தவிர்க்கலாம்.தீபாவளி பண்டிகை வரும் நவம்பர் 5ம் தேதி வருகிறது.
தீபாவளிக்கு இன்னும் 93 நாட்கள் உள்ளன. நவம்பர் 5ம் தேதி (வெள்ளிக்கிழமை)
தீபாவளி வருவதாலும், மறுநாள் சனி, ஞாயிறு தினங்கள் விடுமுறை நாட்கள்
என்பதாலும் மொத்தம் மூன்று நாட்கள் விடுமுறை கிடைப்பதால், இவ்வாண்டு
தீபாவளிக்கு சொந்த ஊருக்கு செல்லும் பயணிகளின் எண்ணிக்கை அதிகரிக்க
வாய்ப்புள்ளது.
இதனால், தீபாவளிக்கு ரயிலில் பயணம் செய்பவர்கள் முன்கூட்டியே டிக்கெட்
முன்பதிவு செய்துவிட்டால், நெருக்கடியில்லாமல் ரயில் பயணம்
உறுதியாகிவிடும். முன்பதிவு செய்யத் தவறினால், தீபாவளி நேரத்தில் டிக்கெட்
கிடைக்காமல் இடைத்தரகர்களிடம் கூடுதல் தொகை கொடுத்து டிக்கெட் வாங்கி
பயணம் செய்ய வேண்டும் அல்லது ஆம்னி பஸ்களில் வழக்கமான கட்டணத்தை விட
இரண்டு மடங்கிற்கு மேல் கூடுதல் கட்டணம் செலுத்தி பயணம் செய்ய வேண்டிய
நிலையாகிவிடும் என்பதால், 90 நாட்களுக்கு முன், ரயிலில் டிக்கெட்
முன்பதிவு செய்வதில் பயணிகள் அதிகம் கவனம் செலுத்த வேண்டிய நிலை
ஏற்பட்டுள்ளது.தீபாவளி பண்டிகைக்கு முன்கூட்டியே ஊருக்கு செல்ல நவம்பர்
2ம் தேதி பயணம் செய்ய நினைப்பவர்கள் இன்றும், நவம்பர் 3ம் தேதி பயணம்
செய்ய நாளையும், நவம்பர் 4ம் தேதி பயணம் செய்ய நாளை மறுநாளும் காலையில்
டிக்கெட் எடுக்க முந்திக்கொண்டால், இடவசதியுடன் முன்பதிவு செய்து
கொள்ளலாம்.தாமதித்தால் டிக்கெட் கிடைக்குமோ கிடைக்காதோ என்று
நினைத்தவர்கள் நவம்பர் 1ம் தேதி பயணம் செய்ய நேற்று முன்பதிவு செய்தனர்.
சென்னை எழும்பூரிலிருந்து இயக்கப்படும் கன்னியாகுமரி எக்ஸ்பிரஸ்
ரயிலில் 50 சதவீத டிக்கெட்டுகள் முன்பதிவு செய்யப்பட்டது. முத்துநகர்,
பொதிகை, நெல்லை, பாண்டியன், நாகூர் எக்ஸ்பிரஸ் ரயிலில் இரண்டாம் வகுப்பு
(தூங்கும் வசதி) மற்றும் "ஏசி' மூன்றாம் வகுப்பில் குறைந்த அளவு
டிக்கெட்டுகளே முன்பதிவு செய்யப்படாமல் உள்ளது.ராமேஸ்வரத்திற்கு
இயக்கப்படும் இரண்டு எக்ஸ்பிரஸ் ரயில்களிலும், சேலம் எக்ஸ்பிரஸ், கூடல்,
வைகை எக்ஸ்பிரஸ் ரயில்களில் 50 சதவீத டிக்கெட்டுகள் முன்பதிவு
செய்யப்பட்டு விட்டன.நவம்பர் 2ம் தேதி பயணம் செய்ய நினைப்பவர்கள் இன்றும்,
நவம்பர் 3ம் தேதிக்கு நாளையும், நவம்பர் 4ம் தேதி பயணம் செய்ய நாளை
மறுநாளும் முந்தினால், படுக்கை வசதியுடன் டிக்கெட்டுகள் கிடைத்துவிடும்.