நாயை ஏவி விட்டு கர்ப்பிணியை சித்ரவதை செய்து ரசித்த காவலாளி

ராமநாதபுரம் : நாயை ஏவி விட்டு கர்ப்பிணியை சித்திரவதை செய்த
காவலாளியின் செயலால், படுகாயம் அடைந்த பெண் ஏழ்மை காரணமாக சிகிச்சை
பெறமுடியாமல் தவித்து வருகிறார்.
ராமநாதபுரம் மாவட்டம் அரியமானை சேர்ந்தவர் கருப்பாயி(30).
கூலித்தொழிலாளி. கணவர் இறந்த நிலையில் தனது குழந்தைகளுடன் கிராமத்தில்
வசித்து வருகிறார். இவரது மகள் நாகேஸ்வரிக்கு(18) திருமணம் முடிந்து
கர்ப்பிணியாக தாயுடன் வசித்து வருகிறார். அதே ஊரை சேர்ந்த கண்ணன்
குத்தகைக்கு எடுத்த தென்னந்தோப்பில், கூலி வேலைக்கு கருப்பாயி, நாகேஸ்வரி
உட்பட பலரும் சென்றனர். அங்கு இருந்த பெரிய நாயை பார்த்து கூலி வேலைக்கு
சென்றவர்கள் அச்சம் அடைந்தனர். வேலையாட்கள் வரும் நேரத்தில் நாயை கட்டி
வைக்குமாறு, தோப்பு காவலாளி கோவிந்தனிடம் கண்ணன் கூறினார். ஆத்திரமடைந்த
கோவிந்தன், நாயை அவிழ்த்து விட்டார். அப்போது அங்கு வந்த நாகேஸ்வரியை நாய்
கடித்து குதறியது. தலை உள்ளிட்ட பல பகுதிகளில் காயம் ஏற்பட்டது.
கர்ப்பிணியாக இருந்த நாகேஸ்வரிக்கு தீவிர சிகிச்சை அளிக்க வேண்டிய
கட்டாயத்தில் 15 ஆயிரம் ரூபாய் வரை செலவு செய்ய நேர்ந்தது.
சிகிச்சைக்கு பிறகும் நாகேஸ்வரி அடிக்கடி மயக்கம் அடைந்து வருவது அவரது
தாய் கருப்பாயிக்கு கவலையை அளித்துள்ளது. தனது இழப்புக்கு உதவுமாறு
காவலாளி கோவிந்தனிடம் கருப்பாயி கேட்டும், அவர் மறுத்துள்ளார். இது
குறித்து போலீசில் புகார் செய்தும், போலீசார் பொருட்படுத்தவில்லை.
மனமுடைந்த கருப்பாயி, கலெக்டர் ஹரிஹரனிடம் புகார் செய்தார்.
கருப்பாயி கூறியதாவது: எனது மகள் கர்ப்பிணி என்று கூட
பார்க்காமல் தோட்ட காவலாளி நாயை ஏவி விட்டு கடிக்க செய்துள்ளார். தலையில்
நாய் கடித்து குதறியது. காயம் ஆறிய போதும், அடிக்கடி மயக்கம் அடைந்து
வருகிறார். ஏற்கனவே செலவு செய்து வைத்தியம் பார்த்த என்னால் , மேலும்
வைத்தியம் பார்க்க போதிய வசதியில்லை, என்றார்.