களவாணி – ஒரு பார்வை

by குடந்தை மணி Sat Jul 24, 2010 5:56 pm

சென்ற புதன்கிழமை “களவாணி” படம் நண்பர்களோடு பார்த்தேன். படத்தின் கதை களமானது
தஞ்சை மாவட்டம் ஒரத்தநாடு அருகில் உள்ள இரண்டு கிராமங்களிடையே நடைபெறுவதாக அமைந்த
ஒன்று.
தஞ்சை வட்டார வழக்கு மொழி மிக இயல்பாக படம் முழுதும் நிறைகிறது
கதையின் நாயகி ஓவியா ‘கிராமத்து பெண்னோவியமாக’ அழகாய் மிளிர்கிறார்.
எருக்கம்பூவினை வெடித்து பாஸ் பெயில் பார்ப்பதும், நெல் திருடுவதும், பைக்-கில்
சிறுவனை அழைத்து செல்ல கேட்பதும்…. திறம்படவே செய்திருக்கிறார்.
“பசங்க’ விமல் எப்பொழுதும் வேட்டி சட்டையுடனும், துபாய் கைலியுடனும் தஞ்சை
கிராமத்து தமிழில் நண்பர்களுடன் சேர்ந்து பின்னுகிறார்.
உர மூட்டை திருடுவதும், யமஹா பைக் பம்பர்-ரில் கம்பியினை உள்ளே வைத்து கலகம்
வரும்போது பயன்படுத்துவதும், பார்க்கும் பெண்களை எல்லாம் “என்னை கட்டிகிரேன்னு
சொல்லு-னு கேட்பதும், அறிக்கி LC112 என்று ஊர் முழுக்க எழுதிவைப்பதும், வீட்டில்
உள்ள அணைத்து பொருட்களையும் உடைத்தே அம்மாவிடம் காசு வாங்குவதும் ….களவாணி யாகவே
வாழ்த்திருக்கிறார். தண்ணியடித்து விட்டு நண்பனுக்காக ஒரு பெண்ணை கடத்தும்
சம்பவமும் களேபரம்…
ஒவியாவிடம் ரெகார்ட் நோட் எழுதி கொடுத்து அவள் மனம் கவர்கிறார்.. அவள் நட்டு
வாய்த்த நாற்றுக்கு நிறைய உரம் போட்டு, பூச்சி மருந்து தெளித்து காதலையும்
வளர்க்கிறார். இயக்குனர் மிக அழகான விரசமில்லாத காதலை காட்சிகளை
வைத்திருக்கிறார்.

பஞ்சாயத்து ஆக வரும் கஞ்சா கருப்பு – திரையரங்கில் குலுங்க குலுங்க சிரிக்க
வைக்கிறார். படத்தின் நகைச்சுவை காட்சிகள் கதையின் ஊடாக அமைந்தது சிறப்பு.
கலை இயக்குனரை பாராட்டியே ஆக வேண்டும், கிராமத்து எளிய வீடு, சொசைட்டி உரக்கடை,
மோட்டார் கொட்டகை என அனைத்தும் மிகையில்லாமல் ஒரு முழு கிராமத்தையே கண்ணில்
நிறுத்துகிறார்.

சரண்யா தென்னங்கீற்று சீவுவதும், பணம் வரும்போது பையனிடம் பொய் சொல்லுவதும்,
அவனுக்காக கணவனிடம் பரிந்து பேசுவதும் வழக்கம்போல் நடிப்பில் அசத்துகிறார்.

ஆறு பாடல்கள், நான்கு சண்டை காட்சிகள் என்று மசாலா படங்களுக்கிடையே
குடும்பத்துடன் காண கூடிய நல்ல திரைப்படம்.
கிராமங்களில் வேலை தேடி வெளிநாடு செல்வதும், வரும்போதும் கோடாளி தைலம், துபாய்
கைலி, பாரின் சரக்கு, கொண்டுவந்து அக்கம்பக்கம் உள்ளவர்களுக்கு கொடுப்பதும் என
அனைத்தும் அருமையாக பதிந்துள்ளார் இயக்குனர் சற்குணம்.
கிராம திரு விழாக்களில் ரெகார்ட் டான்ஸ் போடுவதும், அம்பாசிடர் காரில் ஒலி
பெருக்கி கட்டி – அச்சு அசலான கிராம பின்னணி.

நன்செய் மற்றும் புன்செய் நிலங்களை கண்ணுக்கு குளிர்ச்சியாய் களவாண்டுள்ளார்
ஒளிப்பதிவாளர்.

பின் குறிப்பு: பெங்களூரில் இத்திரைப்படம் திரையரங்கில் வெளிவராத காரணத்தினால்
குருவட்டினில் பார்க்க நேர்ந்தது