குஷ்புவை அழ வைத்த தயாரிப்பாளர்!

by ரபீக் Sat Jul 17, 2010 11:58 am

கடந்த வாரம் சென்னையில் நடந்த ஒரு நிகழ்ச்சிக்கு வந்திருந்தார் 'வின்னர்' பட தயாரிப்பாளர் ராமச்சந்திரன். (தற்போது ஒரு ஓட்டலில் வேலை பார்த்துதான் வாழ்க்கையை ஓட்டுகிறார்) அன்றாட வாழ்க்கையே கேள்விக்குறியாகிவிட்டது அவருக்கு. இந்த நிலையில் கடந்த மாதம் இவரது மகன் சாலை விபத்தில் சிக்கி பெரும் துயரத்தை ஏற்படுத்திவிட்டார். அந்த சம்பவத்தை கண்ணீரோடு பகிர்ந்து கொண்டார் ராமச்சந்திரன். அதே மேடையில்தான் உட்கார்ந்திருந்தார் குஷ்பு.

ரத்தமும் மயக்கமுமா என் பையனை கொண்டு வந்து வடபழனியில் உள்ள ஒரு தனியார் ஆஸ்பத்திரியில சேர்த்திருந்தாங்க. உடனே பணத்தை கட்டினாதான் ட்ரீட்மென்ட்டையே ஆரம்பிப்போம்னு டாக்டர்கள் சொல்லிட்டாங்க. கையில பணமே இல்லை. கோ...ன்னு அழ ஆரம்பிச்சிட்டேன். அப்போதுதான் தயாரிப்பாளர் சங்க செயலாளர் சிவசக்தி பாண்டியன் சாருக்கு போன் பண்ணி விஷயத்தை சொன்னேன். நள்ளிரவுன்னும் பார்க்காம அடுத்த பத்தாவது நிமிஷம் ஆஸ்பத்திரிக்கு ஒடோடி வந்தார். உடனே பணத்தை கட்டி என் பையனுக்கு ட்ரிட்மென்ட் கொடுக்க வச்சதுடன் டாக்டர்களிடம் 'எவ்வளவு செலவானலும் கவலைப்படாதீங்க. பையன் உயிரு முக்கியம்'னு சொல்லி என் மனசில பால் வார்த்தார். அவரு மட்டும் இல்லைன்னா என் பையன் இப்போ உயிரோட இருந்திருக்க முடியாது என்று கதறி அழ, துக்கம் தாங்காமல் கண்களை துடைத்துக் கொண்டார் குஷ்பு. இதே வின்னர் படத்தின் டைரக்டர்தான் குஷ்புவின் கணவர் சுந்தர்சி என்பது குறிப்பிடத்தக்கது.

தினந்தோறும் சின்னத்திரையில் எல்லாரையும் சிரிக்க வைக்கும் 'வின்னர்' பட கிளிப்பிங்சையும், தற்போது அழுது கொண்டிருக்கும் ராமச்சந்திரனையும் ஒப்பிட்டு பார்த்தால் நம்மையறியாமல் ஒரு வேதனை சிரிப்புதான் வருகிறது.