நிர்வாண நிலையில் பிணம்: ஆசிரியை கற்பழித்து கொல்லப்பட்டாரா?

தண்டையார் பேட்டை கருணாநிதி நகர் 2-வது தெருவைச் சேர்ந்தவர் சந்திரசேகர் (51). தங்கச்சாலையில் உள்ள அரசு அச்சகத்தில் ஊழியராக வேலை பார்க்கிறார். இவரது மனைவி மஞ்சுளா (47) வீட்டிற்கு அருகில் உள்ள பள்ளியில் ஆசிரியையாக வேலை பார்த்தார். இவர் களுக்கு தீபக் (25) என்ற ஒரு மகன் உள்ளார்.

நேற்று இரவு 8 மணி அளவில் சந்திரசேகர் வேலை முடிந்து வீட்டிற்கு வந்தார். அப்போது வீடு தாழ்பாள் போடப்பட்டிருந்தது. அதனை திறந்து உள்ளே சென்றார். அங்கு படுக்கை அறையில் மஞ்சுளா நிர்வாண நிலையில் கழுத்து அறுக்கப்பட்ட நிலையில் ரத்த வெள்ளத்தில் பிணமாக கிடந்தார். அவரது கழுத்தில் கிடந்த தாலி செயின் மற்றும் பீரோவில் இருந்த 25 பவுன் நகைகள் திருடப்பட்டிருந்தது.

இதனை கண்டு அதிர்ச்சி அடைந்த சந்திரசேகர் ஆர்.கே. நகர் போலீசுக்கு தகவல் கொடுத்தார். போலீஸ் உதவி கமிஷனர் குமார், இன்ஸ்பெக்டர் சரவண பிரபு தலைமையில் போலீஸ் படை விரைந்தது.

பிணத்தை ஸ்டேன்லி மருத்துவமனைக்கு அனுப்பி வைத்தனர். மோப்ப நாய் ரூபி வர வழைக்கப்பட்டது. அது தெருமுனை வரை சென்றது. யாரையும் கவ்வி பிடிக்க வில்லை. தடயவியல் நிபுணர்கள் கைரேகைகளை சோதனை நடத்தினர்.

இதுபற்றி போலீஸ் உயர் அதிகாரி ஒருவர் கூறுகையில், மஞ்சுளா தொடர்பாக அவரது கணவரிடம் விசாரித்தோம். பக்கத்து வீட்டில் உள்ளவர்களிடம் கேட்டதில், அவர் எப்போதும் செல்போனில்தான் பேசிக் கொண்டிருப்பார் என்றனர். அதனால் செல்போனை கைப்பற்றி உள்ளோம். அதில் கடைசியாக யாரிடம் எல்லாம் பேசியுள்ளார். எங்கிருந்து போன் வந்துள்ளது என்று விசாரிக்கிறோம்.

மஞ்சுளா வீடு இருக்கும் பகுதி நெருக்கமான வீடுகள் நிறைந்தவையாகும். கொள்ளையர்கள் நுழைய வாய்ப்பு இல்லை. அதனால் யாரோ தெரிந்த நபர்களே இந்த கொலையை செய்திருக்கலாம் என்று தெரிகிறது. அவர் நிர்வாண நிலையில் இருந்ததால் கற்பழித்து கொலை செய்யப்பட்டிருக்கலாமா? என்று சந்தேகத்தை ஏற்படுத்தி உள்ளது.

கொலை நடந்த இடத்தில் கத்தியின் உறை கிடந்துள்ளது. இவரது வீட்டிற்கு அடிக்கடி ஒரு நபர் வந்து சென்று உள்ளார். அவர் யார்? என்பது குறித்து தீவிர விசாரணை நடக்கிறது என்றார்.