நேற்று முதலாளி; இன்று கூலித் தொழிலாளி: பணத்தை பறிகொடுத்தவரின் சோகக் கதை

by **உமா** Fri Jul 02, 2010 12:12 pm

சென்னை : "நிதி நிறுவனம் செய்த மோசடியால், முதலாளியாக இருந்த நான், இன்று கூலித் தொழிலாளியாகி குடும்பத்தை காப்பாற்றி வருகிறேன்' என, பல்லாவரத்தைச் சேர்ந்த துரை கூறினார்.நிருபர்களிடம், துரை நேற்று கூறியதாவது: நான், பல்லாவரம் பகுதியில் எம்.டி.எஸ்., புளூ மெட்டல் நிறுவனம் நடத்தி வந்தேன். 2000ம் ஆண்டு கிஷ்கிந்தா அருகே உள்ள இடத்தையும், பல்லாவரத்தில் உள்ள வீட்டையும் அடமானம் வைத்து, சென்னையில் உள்ள ஒரு நிதி நிறுவனத்தில் 10 லட்சம் ரூபாய் கடன் வாங்கினேன். 36 மாத தவணையுடன் கூடிய கடனுக்கு, முன்பணமாக ஒரு லட்சம் ரூபாயும், 11 மாதங்கள் தவணைத் தொகையாக ஒரு லட்சத்து 71 ஆயிரம் ரூபாய் கட்டினேன்.

தவணைக் காலம் இருந்தும், விதிமுறைக்கு மாறாக, 12வது மாதத்தில் எனது இடத்தை நிதி நிறுவனத்தினர் விற்று விட்டனர். இதுபற்றி கேட்டபோது, நிதி நிறுவனத்தினர் துப்பாக்கியைக் காட்டி கொலை செய்து விடுவதாக மிரட்டியதோடு, அடியாட்களை விட்டு தாக்கினர். அசோக் நகர் போலீசில் புகார் செய்தேன். போலீசார் விசாரித்து, வழக்கை, மத்திய குற்றப்பிரிவுக்கு மாற்றினர். நிதிநிறுவனம் மீது எந்த நடவடிக்கையும் எடுக்கவில்லை.உயர் அதிகாரி ஒருவரின் மனைவி, நிதி நிறுவனத்தில் இயக்குனராக இருப்பதால், போலீசார் உரிய நடவடிக்கை எடுக்க தயக்கம் காட்டி வருகின்றனர்.அன்று ஒரு நிறுவனத்திற்கு முதலாளியாக இருந்த நான், இன்று கூலி வேலைக்கு போய் குடும்பத்தை காப்பாற்றி வருகிறேன். நீதி கேட்டு பத்து ஆண்டுகளாக போராடி வருகிறேன். தமிழக முதல்வர் தலையிட்டு எனக்கு நீதி கிடைக்கச் செய்ய வேண்டும். சொத்தை மீட்டுத் தர வேண்டும். இல்லாவிட்டால், விற்ற பணத்தில் கடன் தொகை போக, மீதி பணம் கிடைக்கச் செய்ய வேண்டும்.